Lettre a son altesse Monseigneur le Duc de Monmouth. Par le Sieur des-Chants.

A Son Alteſſe MONSEIGNEUR LE DUC DE MONMOUTH. MONSEIGNEUR,

JE ne ſçay ſi V. A. approuuera le Zéle, auec le quel je luy offre cet ouurage, puiſque tout ce qui vient d'vne perſonne auſsi peu conſiderable que moy doit eſtre indigne d'Elle. Neantmoins je me perſuade que ſi Elle veut ſe donner la peine de jetter les yeux deſſus, Elle demeureta d'acord que je ne pouuois pas me diſpenſer de le luy offrir, puiſque je le tiens d'Elle, & qu'il luy doit retourner.

J'acheuois de payer mon tribut à Morphée, Et l'Aurore éveillée Auoit chaſſé la nuict, Lors qu'éloigné du bruict, Le Phantoſme viuant d'vn Mortel Adorable Vint s'offrir à mes yeux: Il vous est ſi ſemblable, Qu'on peut ſans ſe tromper, ne faire qu'vn des deux.

Les autres jetrent de la terreur dans les eſprits, quelques perſonnes qu'ils puiſſent repreſenter: mais celuy-cy me parût ſi charmant & ſi beau, que la crainte de perdre ſon idée, & d'eſtre priué de la plus agreable choſe du monde me fit ſans, perdre tems, recourir à la plume, pour en conſeruer les traits. Voicy tout ce que ma plus grande application me fit remarquer de luy.

Son AIR n'auoit rien que de Grand, de Majeſtueux, & pourtant de Modeſte. Je n'y reconus point cette affectation que beaucoup de gens étudient, pour faire baiſſer deuant ſoy les ye ux de quiconque les regarde, & pour arracher, pour ainſy dire, le reſpect de tout le monde. Tout y pareſſoit, libre, natured & non forcé auſſy je ne me fis aucune violence pour luy rendre tous mes reſpects & tous mes hommages.

Les Grands, pour la plus part, ont tous cette baſſeſſe, Du moins, cette foibleſſe De contraindre les coeurs & de forcer les yeux A ſe proſterner deuant eux: Mais ceux dont l'ame est céleſte & Diuine, Auſſi bien que leur origine, Ces mortels Demi-Dieux S'éleuent au deſſus de ces ames vulgaires, Et par vn noble inſtinct que leur donnent les Cieux, Ils enleuent les coeurs, ils éleuent les yeux De ceux dont leur vertu ſe fait des tributaires.

C'eſt ce qui me charma d'abord en luy, & ce qui me donna lieu d'apliquer ma veüe à le contempler auec atention.

Son ASPECT doux & graue, où j'apperceus vne affable Fierté, me fit auſſi-toſt juger qu'il ſortoit d'vne race illuſtre & vertueuſe, & qu'il faloit que le Dieu du Parnaſſe euſt pris vn ſoin particulier pour ſon éducation.

Il pareſſoit doux comme Octane; Jamais Caton ne fût plus graue, Et l'on peut dire auec raiſon, Que puiſque la Nature en ſa perſonne aſſemble Et les vertus d'Octaue & celles de Caton, Il vaut mieux que tous deux enſemble.

Ce qui me ſurprit dauantage & ce qu'on auroit peine à croire, Ce fût de voir en luy ce qu'on voit rarement, D'vne floriſſante Jeuneſſe Et d'vne profonde Sageſſe L'aſſemblage noble & charmant.

Le tour de ſon VISAGE imitoit à peu prés celuy de la face du Soleil; & comme les ouurages les plus exquis qui ſortent de la main de l'Auteur de la Nature ont tous la forme circulaire, je n'eus pas beaucoup de peine à conclure ſur le champ, que ce qui ſaiſoit lors le ſujet de mes admirations pouvoit paſſer pour vne merveille du monde & pour vn chef-d'oeuure de l'Immortel.

Si le contour de ſon Viſage Imitoit celuy du Soleil, Il brilloit à mes yeux auec méme auantage Que ce bel Aſtre ſans pareil.

Son FRONT me parût eſtre de ceux qui déſignent vn grand Jugement & vne merveilleuſe force d'eſprit. Il ſembloit que la Prudence y auoit empraint ſon charactere pour le remarquer entre tous ceux qui l'approchent.

Et de là je conclus que ce grand Perſonage, Que la Prudence auoit remarqué de ſon ſçeau, Ne pouuoit s' égarer dans le cours de ſon âge, Et qu'on l'y trouueroit méme dans le tombëau.

Ses YEUX eſtoient de la couleur du Ciel, lors qu'il eſt riant & ſerain, autant qu'il le peut eſtre. Ils me fauoriſerent d'vn regard ſi doux & ſi affable, que je m'imaginay reſſentir les agreables influences d'vn Soleil de Printems, lors qu'il rend la vie & les beautez à la Nature que la rigueur de l'hyuer luy auoit à demy rauies. L'éclatante lumiere qui en ſortoit n'eſtoit point confuſe; car elle auoit autant d'iſſüe qu'il luy en faloît pour toute ſa ſplendeur.

Le Ciel n'eut jamais l'auantage Dans ſon plus brillant appareil De faire voir plus d'vn Soleil; Mais ce Diuin Mortel dans ſon charmant viſage M'en fit remarquer deux: Et de plus, au trauers du cryſtal de ſes yeux Je vis vne ame & ſi belle & ſi pure, Qu'on peut dire hardiment & ſans faire vne injure Au grand Maiſtre des Cieux Qui fit cette ame & ſi belle & ſi pure, Qu'il ne fit jamais mieux.

Sa BOUCHE me parût ſi rauiſſante que ma veüe ne ſuffiſoit pas pour l'examiner.

J'en penſay mille belles choſes, Sur tout, que Flore auec touttes ſes roſes, Et que le Dieu des eaux auec tout ſon coral N'auoient rien d'approchant, pour ne pas dire égal, De la viue couleur de ſes Leures charmantes; Que les perles les plus brillantes Cedoient à ſes dents en blancheur; Que l' Amour s'eſtoit fait honneur De former de ſes mains ce chef-d'oeuure admirable; Qu'enfin ce doux Tyran & des Dieux & des Rois Eſtoit contraint quelque fois D'emprunter le bel Arc de cette Bouche aimable Pour décocher des traits ſur vn coeur indomptable Et le reduire ſous ſes loix.

Le Coloris de ſon TEIN, qui n'eſtoit nitrop brun, ni trop paſle, releué d'vn agreable vermillon effacoit celuy des plus belles fleurs qui ſoient en la Nature. J'auoüe que j'en fûs ſurpris & charmé tout à la fois; & pour me rendre raiſon de ce qui cauſoit ma ſurpriſe & me charmoit dans ce Diuin & vivant Phantoſme, je me dis à moy-méme.

S'il eſtoit ſeulement fauori de l' Amour, Si Mars ſeul recevoit ſa Cour, Ou pourroit trouuer à redire A ce Coloris que jádmire: Mais eſtant de tous deux fidele adorateur, Chacun l'a reueſtu de ſa propre couleur, Et par ce mélange admirable, Tous deux en luy remarquent leur ſemblable.

Sa TAILLE eſtoit grande, fine, & bien dégagée; Elle n'auoit rien de groſſier ni d'élancé; mais tout ce qu'il faut pour eſtre parfaite, Pour pareſtre en Public auecque Majeſté, Dans vn noble exercice auec agilité, Dans le champ du Dieu Mars d'vne valeur extréme, Dans le champ des Amours autant que l' Amour méme.

A le voir marcher deux pas ſeulement je n'eus pas de peine à me perſuader, Qu'il excelloit dans la dance, Et que toute fierté (ſoit dit ſans offenſer Les Belles qui d'amour veulent faire abſtinence) Je le redis, & ſans trop l'encenſer, Toutte fierté, malgré ſa reſiſtance, Doit tomber en décadance Auſſi toſt qu'on le voit danſer.

Enfin tout en luy me parût acheuè, & je crûs que la Nature épuiſée en ſa faueur auroit peine à produire vn autre qui luy reſſemblaſt. Je ne pouuois me laſſer de le voir & j'euſſe paſſé toute ma vie à le conſiderer.

En vn mot, il parût à mes yeux Adorable, En Immortel humanizé, Ou pour le moins, autant aimable Qu'vn Mortel Immortalizé.

Tous mes ſens eſtoient penetrez du plaiſir quils reſſentoient à le contempler. L'extréme joye les auoit rendus inſenſibles pour toutte autre choſe, lors, Monſeigneur, que ce rauisſant objet diſparût à l'approche d'vne perſonne qui me vint prendre pour aller rendre à V. A. ce que ſes inſignes vertus exigent de tout le monde.

Dés-lors que jeus les yeux ouverts, Par vne diſgrace impreveûe, Je perdis auſſi tost la veüe Du plus aimable objet qui ſoit dans l'vnivers.

Je ne puis celer que cette perte me fût trés ſenſible. Le plaiſir que je me promettois de l'honneur de voir V. A. fût ſeul capable de me la rendre legere. Je ne me trompay pas dans ma penſée: car dés l'inſtant que j'eus l'auantage de l'enuiſager, mon bonheur me vint reſſaiſir, & je découuris en elle la verite de ce qui m'auoit charmé par imagination. En effect, Monſeigneur, je trouuay V. A. ſi Semblable à ce merueilleux Phantoſme, dont mes ſens auoient eſté rauis à la faueur des tenebres du Someil, que je crûs voir en Elle l'Original, dont je n'auois veu que la copie.

Ainſy donc mon bonheur qui n'eſtoit qu' imparfait Et qui m'auoit charmé ſeulement en idée, Me revint charmer en effect, Et mon ame fût poſſedée D'vn plaiſir ſolide & complet.

Je fûs obligé, Monſeigneur, de me retirer d'auprés V. A. & faiſant reflexion ſur cette agreable auanture, je trouuay qu'elle ne provenoit que de mon Imagination fortement préoccupée de vos rares qualitez & de vos ineſtimables perfections, dont on m'auoit fait recit quelque tems auparauant; Ou plutost, que le Ciel par vn ſecret préſage Preſentoit à mes yeux cette charmante Image, Pour la faire paſſer enſuitte dans mon coeur, Et d'vne inuiolable ardeur Luy rendre vn éternel hommage.

Je crûs auſſi quil eſtoit de mon deuoir de tracer ſur le papier cette prétieuſe Image, aprés l'auoir emprainte dans mon coeur, tant pour pouuoir rendre à V. A. ce que je tiens d'Elle, que pour auoir lieu de luy offrir mon encens aux yeux de toute le monde, & de faire voir à toutte la Terre que je mets ma plus grande gloire à luy conſacrer mes reſpects & mes voeux, eſtant auec vne extréme veneration,

MONSEIGNEUR, De Voſtre Alteſſe Le trés-humble, & trés-obeiſſant Seruiteur, DES-CHANTS