O Myghty fader in heuen on hye
One god and persones thre
That made bothe daye & nyght
And after as it was thy wyll
Thy nowne sone thou sente vs tyll
In a mayden to lyght
Syth the Iewes that were wylde
Hanged hym that was so mylde
And to dethe hym dyght
Whan he was deed the sothe to saye
To lyfe he rose on the thyrde daye
Thorughe hys owne myght
Then to helle he wente anone
And toke out soules many one
Out of that holde he hent
Maugre the fendes that were bolde
He toke the prysoners out of holde
With them to heuen he wente
On his faders ryght hande he hym sette
That all sholde knowe withouten lette
That he was omnypotente
And after wysdome he was sent
That all sholde kepe his commaundemen
And for to byleue in hym verray
That is our sauyoure
That borne was of that blyssed floure
That hyght Mary I saye
That shall vs deme withouten mysse
Some to payne and some to blysse
It drede full domes daye
[Page] The lady commaun [...]ed anone soone
That the gates were vndone
And brynge them all before me
For well at ease shall they be
They toke theyr pages horse and all
These two men wente in to the hall
Ipomydon on knees hym set
And the lady fayre he gret
I am a man of straunge countre
And praye you yf it your wyll be
That I myght dwell with you this yere
Of your nurture for to lere
I am come out of ferre lande
For I herde tell before hande
Of your nurture and your seruyse
Is holden of so grete empryse
I praye you that I may dwell here
Some of your seruyce for to lere
The lady behelde Ipomydan
And semed well a gentyll man
She knewe none suche in all her lande
So goodly a man and well farande
She sawe also by his nurture
He was a man of grete valure
She cast full soone in her thought
That for no seruyse came he nought
But it was worshyp her vnto
In her seruyse hym to do
[Page] To [...]yne and Ioye for aye
Now Ihesu as thou bought vs dere
Gyue them Ioye this gest wyll here
And herken on a ryght
Some men loueth to here tell
Of doughty knyghtes that were fell
And some of ladyes bryght
And some myracles that are tolde
And some of venterous knyghtes olde
That for our lorde dyde fyght
As Cherles dyde that noble kynge
That hethen downe dyde brynge
Thrughe the helpe of god almyghty
He wanne fro the hethen houndes
The spere and nayles of crystes wounds
And also the croune of thorne
And many a ryche relyke mo
Maugre of them he wanne also
And kylled them euen and morne
The turkes and the paynyms bolde
He felled doune many a folde
Durst none stande hym beforne
Charles gan them so affraye
That the catyues myght curse the daye
And the tyme that they were borne
[...]