CE jour la Cour les Chambres assemblées en presence de Belchefer Substitud pour le Procureur General du Roy Monsieur le Duc d'Orleans, & apres luy le sieur Prince de Condé ont dit qu'ils avoyent assez fait cognoistre de vive voix & par leurs Declarations faites en la Cour que le sujet pour lequel ils avoyent pris les armes, n'estoit que pour l'esloigne­ment du Cardinal Mazarin hors le Royaume. Que sur les advis à eux donnez ils apportoyent à la Cour leurs Declarations signées, continue en ces termes:

LA Resolution qu'a pris le Roy de faire sortir le Cardinal Maza­rin hors du Royaume, dans la conjoncture presente, justifie d'une telle sorte ce que nous avons fait pour l'empescher d'y r'en­trer: Et depuis qu'il y est de retour, pour le faire sortir, que per sonne ne peut plus blasmer nostre conduite avec raison. Aussi ceux qui ont voulu authoriser sa demeurer en France n'ont-ils eu la har­diesse d'alleguer autre chose smon qu'il n'estoit que le pretexte de la guerre, & qu'elle avoit des causes que son esloignement ne se­roit pas capable d'oster: Mais comme nous protestons qu'il a esté le seul & veritable motif que nous a mis les armes à la main. Nous venons dans la Compagnie pour l'asseurer que nous sommes prests de les poser &c d'executer sincerement les Declarations que nous y avons faites, presuposant que sa sortie hors du Royaume soit ef­fective: Et pourveu qu'il plaise à sa Majesté de faire ce qu'il con­vient pour le repos de son Estat. Et ce qui s'est tousiours pratiqué en de semblables occasions qui consiste seulement à donner une Amnistie Generale en bonne forme, & esloigner les troupes des [Page 3] environs de Paris, & retirer celles qui sont dans la Guyenne & lans les Provinces, pour les empescher allieurs sur les Frontieres: Et à restablir les choses au mesme estat qu'elles étoyent avant les presens mouvemens, & particulierement ce qui concerne la re­union du Parlement, & donner une route & seureté pour la re­traite des trouppes estrangeres qui sont sous nostre Commande­ment, Nous sommes tous disposez à envoyer exprés à sa Ma­jesté pour luy faire entendre les mesmes choses avec tout le respect que Nous luy devons, ne doutant point que la Com­pagnie ne le juge ainsi à propos, & de Nous conformer aux sen­timens qu'elle prendra dans une occasion aussi importante qu'est celle-cy, & d'où despend la tranquillité publique. En tes­moing dequoy Nous avons signé la presente Declaration. Ladite Declaration leve, ouy sur ce ledit Substitud, qui a dit que c'est par une exuberance de bonté & affection que Monsieur Duc d'Orleans & Monsieur le Prince ont voulu reïterer verballement, & par escrit les mesmes Declarations qui ont esté cy-devant par eux fai­tes en ce lieu, sans qu'il en fut besoin, parce que des la premiere fois qu'elles y ont esté faites il n'y a personne qui n'ait persuadé qu'elles ne fuissent entierement sinceres & mieux escrites & con­signées dans leur coeur tout Royal que dans le Registre de la Cour: mais puis qu'ils tesmoignoyent tant de bonne volonté pour le bien & le salut de l'Estat & pour cette Compagnie qu'il estoit encore necessaire de les supplier de s'employer vers le Roy pour moyen­ner son retour en cette ville de Paris pour l'honnorer & conserver par sa presence, & de la part de la Cour, le Roy ayant desia par sa bonté fait la premiere démarche pour luy faire ressentir ses gra­ces, La Compagnie estoit obligée de faire tout ce qu'elle scauroit estre agreable au Roy pour repondre à ses volontez & luy tesmo­igner avec quelle affection l'on luy veut rendre les submissions & obeissances qu'il peut desirer, & pour cét effet il luy semble estre expedient de deputer pour aller vers le Roy le remercier tres-humblement de ce qu'il a eu esgard aux remonstrances de son Par­lement, Que s'il s'est passé quelque chose qui luy ait pû deplaire, [Page 4] le supplier d'oublier, & asseurer des bonnes intentions de la Com­pagnie, luy faire pareille supplication de retourner dans Paris pour asse [...]rer les peuples & estouffer toutes les deffiances qui se sont formées de part & autre pour formenter les divisions. Si la Cour trouve bon d'adjouster que la Garde des portes soit levée, & cesser la levée des taxes qui ont esté imposées, ce sera chose agre­able au Roy, & que la deliberation soit portée par tels de Messieurs qu'il plaira à la Cour deputer apres que l'on aura sceu que le Roy trouvera bon de les ouïr.

LADITE COUR a arresté & ordonné que le Roy sera tres-humblement remercié par deputez d'icelle de ce qu'il luy a pleu accorder l'esloignement dudit Cardinal Mazarin, Que les Compagnies souveraines & les Corps de la ville seront advertis & conviez de faire mesme deputation, supplier ledit Seigneur Roy de revenir à Paris, & l'asseurer de tous devoirs, respects, soubmis­sions, & obeissances, de ses Officiers & sujets. Que ledit sieur Duc d'Orleans, & ledit sieur Prince seront aussi remerciez de leur bon­ne volonté, priez de continuer leur affection pour la paix du Ro­yaume, & d'envoyer incessamment, & au plustost qu'il se pourra pardevers sa Majesté pour parachever ce qui est necessaire au bien & repos de l'estat, & a cette fin demeurera ladite De­claration au Greffe de ladite Cour. Fait en Parlement le 22. jour du mois d'Aoust mil six cens cinquantedeux.