[...]
[...]
She sholde not goo / this make I goo auow
Ha my good sone she sayth by heuen kynge
That made this worlde / and euery other thynge
Ye may as surely and withouten drede
Suffre her to go as for to saye your crede
Thus they departe and on theyr waye be gone
And as they goo / these wordes than sayth one
Vnto an other he hath some Ialousye
It semeth wele he dredeth Ieopardye
Thus is he mocked by these womens arte
For now come galauntes forth on euery parte
Whiche at the feest afore by auenture
This foresayd werke haue made and put in vre
And there awaytynge ben vpon theyr nede
For to conclude and so forth to procede
But how this wyfe now fested is & serued
For loue of her good man all vndeserued
And god wote how she doth her selfe applye
To reuell dauncé / and for to synge on hye
Also she maketh good and mery chere
But god wote how she prayseth her bedfere
The husbande lefte at home whyle she is oute
And seeth herselfe so praysed amonges the route
Certes these galauntes than her do aduyse
And se she is apparaylled in suche wyse
Perceyuynge well her chere and countenaunce
Shortely to her eche one hym doth auaunce
One profreth moche / an other offreth more
Harde is to me the cause to tell wherfore
The Ioly chere the praty trotte and pace
With the demeanynge of a womans face
Wyll gyue these louers cause & hardynesse
To sewe for grace vnto theyr worthynesse
[Page] One to her wordes gracyous dooth saye
An other cometh as nygh her as he may
And setteth his fote a lofte on hers playne
Eke by the honde quyckly he doth her strayne
Also an other his loke casteth a syde
Full pyteously and sharpely for a tyde
An other than vnto her dooth present
A dyamonde ryght fayre and oryent
Or elles a ryche rubye with a rynge
Whiche she receyueth with some other thynge
By whiche thynges may she well vnderstande
Of theyr entent / and fele it with her hande
If she haue ony reason brayne or wyt
And other whyles by fortune happeth it
That from her chayre alyght wyll she adown
To doo some werkes of deuocyon
Or vnto Venus to doo sacrefyse
But how can I not saye ne in what wyse
This sely man at home in poore degree
Is made and brought vnto necessytee
For thylke estate that his wyfe doth pretende
The mater thus hath dryuen to an ende
And made her goo to gaderynges & feestes
Amonges a wycked company of gestes
For vnto her they yolden be in trust
To haue theyr pleasures appetytes and lust
Vpon none other thynge do they aweyte
But how they may doo this poore man deceyte
The stroke wherof he hath without escape
Whiche comynly is called but a Iape
So he is causer of his propre shame
None other wyght therof is for to blame
And thus it happeth by contynuaunce
[Page] That what by sygnes speche or countenaunce
Trouth of the thynge wherof he was in doute
All openly reported is aboute
Wherby he falleth Ialouse in a rage
Out of the whiche there is no wyght so sage
That hym can moue / for who that feruently
Of woman feieth the cruell malady
There is noo medycyne that may hym cure
The sekenesse is so sharpe without mesure
Than wyll he bete her bytterly and curse
Wherby the werkes maketh he moche worse
For chastyce can he not by daye ne nyght
His wyfe but by his betynge maketh lyght
And hote the loue bytwene her & her frende
Thus dryueth he the mater to an ende
And son he other whyles fortune may
One of her lymmes breke or kytte away
Wherby his castell or his pyle he loseth
Than as a mased beest he hym dysposeth
Withouten care and all he setteth at nought
Thus hath he foūde ye payne whiche he hath sought
And neuer after wyll she loue hym more
Bycause that he hath beten her soo sore
But for to passe the tyme and make a shewe
And of fayre wordes speketh she but fewe
There this poore man in turment payne & woo
Lyueth and yet he thynketh not soo
And all these sorowes / he for Ioyes doth take
Soo in the lepe he is I vndertake
Enclosed depe / and yf he were withoute
Yet shortely wolde he in withouten doute
There vseth he his lyfe in payne alwayes
And wretchedly / thus endeth he his dayes
¶ Thus endeth the seconde Ioye of maryage
¶ Here begynneth the thyrde Ioye of maryage.
AN other Ioye whiche named is the thrydde
Of maryage in no wyse may be hydde
The whiche I purpose shortely to declare
Accordynge to myn auctour and not spare
The whiche is whan a man in youth doth wedde
A yonge mayde / and whan they bothe in bedde
Haue had theyr pleasures largely and desyre
And well aswaged is the brennynge fyre
The hoot heruest is well ouerblowe
As it with me and other is I trowe
Soone after this her bely dooth aryse
[...]
[...]