IN LAUDEM MUSICES Carmen Sapphicum.

Ciacona. A. 3. voci. Basso, Alto è Canto.
MƲsa quae sacro super astra cantu
Tollis Heroas, tibi temperatum
Barbitum sume, & proprias Thalia
Concine laudes.
Basso con. simfonia.
Rege prognatae superûm Camaenae,
Rege plus ipso Superûm potentes.
Carmen et coeli domus, & profundus
Sensit Avernus.
Leniit Tygres, revocavit Amnes,
Molliit rupes, rigidosque Thracas
Orphei plectrum; posuere murmur
Ventus & unda.
Basso solo.
Audiit longè Euridice canentem
Ditis ad portas, meminitque sponsi;
Nox neque obstabat, neque pota nigrae
Pocula Lethes.
Syderum caeli modulantur orbes,
Aequoris dulces habet unda musas;
Aera et Terras volucres perenni
Carmine mulcent.
Barbitum tenta, magicasque chordas,
Mensque cognato sonitu tremiscet;
Et Lyrâ motae salient recusso
Pectore fibrae.
Martis accedat furor incitatus,
Fata nigro sulphuris imbre spargens:
In neces, in tela adigunt feroci,
Classica cantu.
Laetior seu sors vocat ad Choreas,
Sive mordaces animum fatigant
Languidum Curae, fovet aequa cunctos
Carmine Musa.
Choro. a. 3. Voc. con. sim­fonia. di 2 Violini.
Mentis Interpres Lyra per remotos
Indiae fines, Lybiaeque transit:
Omnibus praesens, peregrina nullo
Cardine mundi.
Ritornello Alto solo.
Forte dum molli recubaret umbrâ,
Phyllidis blandos meditatus ignes,
Pastor incautus, tua sola questus
Tela Cupido;
Senserat saevam similemque Amoris
Vulneri plagam: latitans sub herbâ
Parva Lethali Juvenem petebat,
Vipera dente.
Laetus insanum jecur urit ignis,
Implet & venas hilari veneno;
Risit infaelix, tremuloque movit
Ora cachinno.
Turba pastorum Gregibus relictis
Arripit Plectrum, Cytharam (que) pulsat:
Laetus & morbus, pariterque morbi
Laeta medela est.
Languet, et somni nece torpet aeger;
Basso solo. Toccata. Modo Fry­gio.
Protinus celsum, Phrygiumque Nymphae
Concinunt carmen; biforem dat acris
Tibia cantum.
Surgit insano furibundus aestu:
Basso solo. Toccata. Modo Frigio.
Dores accurrunt, Tonat ore largo
Grande spondaeum, rabiemque sistit
Murmure Longo.
Lydium mox,
Ritornello Modo Lydio.
Aeoliumque melos
Accinunt aegro; Cytharam modosque
Morbus agnoscit, medicoque victum est
Carmine virus.
Pellitur doctis Numeris venenum:
Thessalas dicat modo Nympha voces,
Luridus retrò fugit, et canendo
Rumpitur anguis.
Has in Ascraeis agitavit artes
Vallibus pastor, docuitque Phaebus;
Ipse nam Phaebus pater est medendi;
Ipse canendi.
O sacrae vires Chelis!
Choro. a. 3. Voci. Basso. Alto è Canto.
O potentes
Carminum voces, Numerique dulces!
Pone nunc arcum, Cytharâ triumphas
Major Apollo.
  • Ritornello
  • Alamana
  • Sarabanda
  • Gavota.

This keyboarded and encoded edition of the work described above is co-owned by the institutions providing financial support to the Text Creation Partnership. This Phase I text is available for reuse, according to the terms of Creative Commons 0 1.0 Universal. The text can be copied, modified, distributed and performed, even for commercial purposes, all without asking permission.