Heic jacet
Bellicosissimus Ille ROBERTUS BARTU
Per Quem
Vacillatrix quondam stetit, ceciditque Britannia
Ab Illo, vitam simul, vulnusque sentiens.
A Fortibus procreari Fortes
Hic Heros illustravit seculo
Patrizans Filius magnanimi Patris PEREGRINI
Baronis de Willoughby, summi (que) tunc Britonum Strategi,
Hinc quum despera bundi Batavi, conflagrante Belgio,
Et illinc Henricus Franciae quartus, tumultuante Gallia
Elizabethae nuperae suppetias imploraverant.
His armatus, adfuit, interfuit, Praefuitque
Pugnacissimus Ille Peregrinus:
Et cum Militaribus (Quas in Scuto praeportabat) Machinis
Hostium muros Arietavit, Arietatos delevit,
Victor misericors sic ubique praecavens
ut Balantum greges, Gregum Duces defenderent Arietes,
vel saltim Virtus Ariete Fortior WILLOUGHBAEI:
Cujus Magnalia,
Si nostri posthaec conticescerent Annales,
In Threnodiis Senes, Canticisque Pueri memorarent Exteri.
Hunc habuit ROBERTUS Genitorem.
Nec fas fuit, ut de minore Parente in Mundi prodiret Theatrum
Actor Ille, deinde, maximus,
Paternae Famae par Haeres, ac Forrunae,
Sed Honorum foelicior multo Foenerator.
Evasit, & excessit enimvero
Comes Lindisii, Baro de Willoughby, Beak & Earsby;
Praecelsus Regni Proto-camerarius; Periscelidis Eques perillustris;
A Regis Consiliis unus, & tantum non instar omnium;
Semel supremus Angliae Constabularius;
Bis Auspex Anglicanae Classis Admirallus;
Omnium denique sub Augusto CAROLO Copiarum
Imperator Primus, Secundusque nemini.
Quem perexcellentem Generalissimi titulum tenuit, & ad mortem retinuit;
Suamque mortem pro Regis vita Sexagen̄arius accelerans
Oct. 23. MDCXLII▪ in Edge-hillii Campo fatali, Britanniae plane Pharsalico
Eminenter à Ballistae Ferreo percussus Globo, concessit:
Plumbeo, vulgarive non debuit
Imperator Ille plusquam Romanus
Qui (vita carò vendita, nec empta vili victoria)
Tanquam Quercus inter Iaetantes Laurus, & flentes pariter Cupressus
Ibidem stando, gloriose cecidit:
Invulnerabilem suae Christianissimae virtutis Panopleam
Paludatis Europae Ducibus induendam,
Famam Posteris, Genium Filiis
elargitus.
Et certe Filios habuit Complures,
Prolem numerosam, quodque plus est, nobilem:
Liberos Illi nimirum Tredecim
Montacutum Comitem Lindisii, Baronem de Willoughby, Beak & Earsby,
Praecelsum Regni Proto-camerarium; Periscelidis Commilitonem;
A Cubiliarchis Caroli Primi; necnon utriusque Regis à Consiliis , &c.
Tunc Rogerum, Peregrinum, Franciscum, Robertum, Henricum,
Verum, Edoardum,
Cum Catharina, Elizabetha, Anna, Sophia, Maria)
Uxor ejus Elizabetha
Edoardi dudum Baronis Boughtonii, Filia
In futura Familiae suae Columina
Foecunda peperit.

MONTACUTUS

Metempsychose, de spiranti Genitoris Trunco
(Quem diu vel ad miraculum defenderat) Heroas Dotes imbibens,
ut inde plures saeculo disseminaret ROBERTOS,
MARTHAM primam duxit in Uxorem
Celeberrimi Gulielmi Cockain equitis aurati Filiam,
Nobilissimi vero nuperi Comitis Holdernessii Viduam:
Per Quam
Luculentam fanè lautamque Sobolem suscepit;
ROBERTƲM nunc Comitem Lindisii tertium, Baronem de Willoughb [...]
Beak, & Earsby, Praecelsum Regni Proto-camerarium, &c.
Ac Peregrinum, Richardum, Verum, Carolumque
Cum Elizabetha, Bridgetta, Catharina;
ut utroque sexu Coronatam Montacuti Mensam
Laurus ambiant ac Olivae.
In Secundam duxit Uxorem BRIDGETTAM WRAY
Baronissam de Ricot, honorabilis Edoardi Sackvillii Viduam,
Quae
JACOBUM jam Dominum de Norreis, Baronem de Ricot,
Et Edoardum, Henricum, Mariamque
Secundi Solamina Conjugii, Marito tulit Montacuto
Qui, cum Roberto Patre, Marthaque peramoena Conjuge
Sub hâc marmorea coopertus, quiescit culcitra:
Bridgettae vero cineres
Apud Avitam suam Norreiseorum collati gentem,
In Eorum magnifico, Westmonasterii, Monumento,
Miscentur.
Sic plusquam semel Beatus, eminuit Pater Ille Bigamus,
Et de Binarum Conjugum Prole Bissenâ
Antiquam Majorum Domum, novo Constellavit Zodiaco,
Proque duodecim Signis, duodena Sobole supplevit.
Hinc Atlante magno major MONTACƲTƲS,
Splendidiorem Bartuadum Quem fecit, suffulcit Globum,
vel Ipso Praenomine, Patriis Promontorium Penatibus.
Et Ille proculdubio futuris stabit Pharos Nepotibus;
Transcendens Comes, condescendens Christianus.
Uniformis Heros, Homo quadratus;
Aulicus apprime Justus; Paterfamilias Prudens,
In exemplum Temperans, Fortis ad Mortem.
Idcirco non immerito (praeter praedicta Munia)
Praegrandi Regii Corporis Satellitio, Tribunus
Honorificè, praefuit:
Idemque Corpus, proh constantiam!
Quod multoties inter Tela turmasque sospes stipaverat,
A maleferiatis tandem vita spoliatum
Intrepidus Ipse (tribus tantisper assistentibus Ipsi Satrapis)
Excepit pallidum,
Suffusoque lachrymarum succino delibutum,
Tumulo commisit.
Et indies ab illo tempore, tumulum contemplabatur proprium,
Nec multo longius quam tria lustra Regi suo superstes CAROLO,
Julii 25. Aetatis Anno suae 59. Dom. MDCLXVI.
En! Duorum Decus, & Deliciae Regum,
Duarum charus Maritus Conjugum,
Duodecim Pater indulgens Liberorum,
Duodecim Fratrum, Sororumque Frater integer,
Bonorumque quotquot dolor saltim vel desiderium,
Permemorabilis Ille MONTACƲTƲS
Immigrabat Mortuos
vel heic etiam dignissimus in Aeternum vivere.

Optimis & amantissimis suis Parentibus PEREGRINUS, RICHARDUS, VERUS, CAROLUSQ; Filii, Patrisque Supremi Curatores Testamenti, Hoc posuere Monumentum Flentes, & cum Sympathetico semper fleturi Marmore.

Hoc Epitaphium praedictorum Procerum Tumulo mox insculpendum per THOMAM STANTON Lapicidam perquam peritum Scripsit, & Typis exa ravit P. Fisher, olim militum Serviens-Major. Jan. 1. MDCLXVIII.

This keyboarded and encoded edition of the work described above is co-owned by the institutions providing financial support to the Text Creation Partnership. This Phase I text is available for reuse, according to the terms of Creative Commons 0 1.0 Universal. The text can be copied, modified, distributed and performed, even for commercial purposes, all without asking permission.