appeiris to be ane diuine gift of God grantit and now laitlie manifestit to the greit support and aduancement of helth in cure of sic disesis as hes bene obseruit in diueris persounis. Quhairfoir I seing the samin to haue bene obscure from the beginning to thir dayis, ȝit being ane ornament and ane publict vtilitie to the Realme & Burgh, thocht gude to mak the qualiteis and profeit thairof acknawledgeit to sic persoūis as be vexit with sic disesis as it is good for. For of treuth it is of Medicinall qualitie and, and flowis from di­uers minerallis, as hes bene obseruit be the ope­ratioun taist & minerall vre, quhilk being drun­kin, is laxatiue to sindrie, and so must neidis be het of qualitie, be ressoun on na wayis it laxis nor molefeis the exteriour partis, or the skyn of mannis body: thairfoir it is laxatiue of the inte­riour partis, and promouis gude passage of the bellie, as wrytis Celsus lib. 2. Ca. 12. To vtheris it is womatiue, quhilk also testifeis the het qua­litie thairof, farther it geuis gude appetyte to thame quha at destitute thairof, and gif ony mā drink twentie pound wecht of this Fontaine he findis no charge nor burding of the stomak nor bellie be the watter. Quhilk also approuis the minerall qualitie thairof, be ressoun all naturall and pure sweit watter is flaw in passage, difficill of concoctioun, flatuous & heuie in the stomak, and generis distillatiounis, as wrytis Aetius Te­trab. 1. Serm. 3. Ca. 165. Sa this watter being of contrarious effectis must neidis be of contrarious [Page]qualiteis to cōmoū watteris. Ane notabill prufe of the samin hes bene obseruit be ane Indweller in Abirdene, quha laitly causit brew Aill of this watter, of the quhilk na beist wald taist, nor eit of the draf thairof, nouther Hors, Kow, nor Ox, sa it being laxatiue, attenuatiue, liquefactiue, di­gestiue, and discussiue, it must neidis be of het qualitie, for thir ar ye properteis of het watteris, quhilkis hes bene obseruit be the happy succes in cure of diuers disesis in this watter, quhairof the taist is sūquhat vnplesand, as gif it wer brint with Irin, the vre thairof as it rynnis vpon the staines and ground ar of diuers cullouris, the ane cullour sad blew, quhilk promisis Iryn, as the taist dois also, the vther cullour being reid declyning to zallow cullour, testifeis Brasse, quhilkis twa minerallis of proper qualitie cōfortis the stomak and Melt, as sayis Auicen lib. 2. Tract. 2. Ca. 19. Cano. Also wrytis Auicen lib. 1. Fen. 2. doct. 2. ca 16. Sic watter as be of the qualitie of Iryn geuis strenth to the Interiour partis of mānis body, & keipis the stomak frō corruptioū, and promouis the haill faculteis quhilkis gouernis mānis body. So ar the wordis of Gal. wrytand vpon Hip. in his buik of Aere watter and places Ca. 3. Sic wat­ter (sayis he) quhilkis ar not abill to burding the stomak and ar of facill digestioun must neidis to be laxatiue, and procure passage of the womb be Medicinall het qualitie. Gif the watter of this notabill Fontaine be builȝeit it becūmis of mair blak cullour, & the dreggis thairof beiris witnes [Page]of the minerallis befoir writtin, as alswa being caryit cūmis haistely to corruptioun, quhilk be­ing profitabill as it is for the stomak and Melt, it must neidis spring from Iryn, also being na wayis byndand nor of desiccatiue qualitie, bot rather laxatiue and diureticall, thair is na suspitioū to be takin of Alme, ȝit in respect it is discussiue, laxatiue, remollitiue, and vomitiue, it appeiris be gude ressoun to be participant of bryntstane, as the cullour thairof also witnessis. And in re­spect the countrie is of nature minerall, this wat­ter being drunkin cuirand sair Eyn, Catarris, sair mouth, prolapsioū of the vult, and dolour of the Tonsallis, it must neidis spring from Brasse, as te­stifeis Aetius Tetrab. 1. Serm. 3. Ca. 167. Farther I haue obseruit in diueris persounis quha had drunkin the samin, that it mitigatis the heit of the Liuer, stancheit drouth, perfytlie cuiris Ne­phritick dolouris baith of Neiris and Bledder, corroborattis the stomak, takis away obstructioū of the Melt, perfytlie cuiris distillatioun frō the harnis, hes cuirit sindrie Hydropicall persounis, specially that kynd callit Anasarca and Aschitis. It is gude also be experience for resolutionn of the body, or ony pairt thairof callit Paralysis, pro­fitabill also for sterilitie contractit be suffocatioū of the barne bed, or ony vther natural caus, writ­tin be Hip. lib. de sterilibꝰ. It is gude also for pal­pita [...]ioun & trymbling of the body being drun­kin, in few dayis it cuiris all sort of cauld guttis be purgatioū of sic humouris as ar the caus thair­of. [Page]It bringis to gude cullour all Cathetik per­sounis quhilkis being of euil habitude & cōstitu­tioun of body. Being also laxatiue and prouokis womitine, sa it oppinnis the obstructiounis & op­pillatioūis of the Liuer, quhairby mony hes bene cuirit of the Gusoch, also it hes cuirit mony of ye feuer Terce, & last it perfytlie cuiris (being drun­kin) the exteriour scabbis, wyldefyre, darteris, & vther filthines of the skyn. Sa it is maist profitabil for sic as be of het intemperance of the Liuer, & constitutioū of them quha be burdinnit be greit and heuie cōstitutioun of body, maist propeus to Hydropesie, Apoplesie, or Paralisie. Sa albeit I haue red the qualiteis of the maist anciēt Bathis and springis of Medicinall watteris: I find this spring of the woman hill besyde Abirdene to be not far different from the nature of the Bath of Cornelius callit sa in Aquisgran ane notabil toun in Gallia Belgica, and repugnant to the nature of the Portitanis Bath, quhilkis dois rather gender Grauel & staine in Neiris & Bledder, nor to pro­cure the help or dissolutioun of the samin. Ane greit fault I find in the vse of this watter, that Ilk persoun drinkis thairof at thair awin plesure, ne­ther hauing respect to the present diseis, naturall cōstitutioun of body, nor tyme of the ȝeir, quhair by the said watter be the abusaris thairof is ra­ther vilipendit nor cōmendit. Quhairfoir I wald sic as wald haue profeit of the samin prepairit thair bodyis conforme to thair nature, strenth, aige, diseis, & rest of circūstances requytit thairto, [Page]sic as the time of the ȝeir, quantitie of the watter and time of the vse heirof, for it is not aggreabill to all persounis at all times, not to be takin at plesure of euery one in quantitie, as nane vther mi­nerall watter. Ȝit this watter is of greitest vertew in the Monethis of Iunij, Iulij, August Efter the xx. day of Septēber it tynes the Medicinal strēth quhill the nixt ȝeir thairefter. Quhairfoir the cōmodious time suld be obseruit, asweill of the day, as of the Moneth, and to be drunkir at mor­ning, fastand thairefter thre houris, as efter ane Medicinall potioun. The negligent vse heirof hes frustrat mony of thair cure, quha sone efter the drinking of this Medicinall watter, hes ta­kin outher meit or drink, quhairby thay stoppit the operatioun of the watter drunkin of befoir. I will not mak reheirsall of the mony particular persounis quha hes obtenit thair helth, being vexit with diueris disesis be the vse of this wat­ter, be ressoun it war to lang. I traist albeit I speik na farther at this tyme, nor that quhilk hes bene obseruit be experience, the ȝeirly vse thairof sall giue occasioun to leirnit Phisicianis to Intreit the gude suc­ces thairof mair largely in tymes cumming.