[figure]

¶The loue and complayntes bytwene Mars and Uenus.

O Lade ye fowles / of this morowe gray
Lo Uenꝰ is risen amōg you rowes rede
And floures fresshe / honoure ye this May
For whā the sonne vpryst thēne wyll ye sprede
But ye louers / taht lye in ony drede
Fleeth / leste wyckde tunges yon espye
Loo yonde the sonne / the candell of Ialousye
with terys blewe / and with a wounded herte
Take ye your leue with saynt Iohn̄ to borowe
[Page]Appease ye som what / of your sorowes smerte
Tyme cometh oft / ye cessen shall your sorowe
The glad nyght / is worth an heuy morowe
Saynt valentyn a fowle / thus herde I synge
Upon thy day / er the sonne gan vpsprynge
yet songe this foule / I rede you all awake
Rnd ye that haue not chosen in humble wyse
withoute repentyng / chese ye your make
And ye that haue full chosen / as I deuyse
yef atte leste / renoucleth your seruyse
Conferme ye it perpetully tendure
And pacyently / take y your auenture
And for the worshyp / of this hye feste
yet well I in my byrdes wyse synge
The sentence of the complaynt atte leste
That wofull Mars / made atte departynge
Of fresshe Uenus / in a morenynge
whan phebus / with his fyry torches rede
Rausaketh had / euery louer in his drede
whylom the thyrde heuens lord aboue
As well by heuenysshe reuolucyos
As by deserte / hath wonne Uenus his loue
And she hath tak hym in subieccyon
And as a maystres taught hym his lession
Cōmandyng / that neuer in her seruyse
[Page]He nere soo bolde / noe louer to despyse
For she forbad hym Ialousye at all
And cruelt / boost / and tyrannye
She made hym at hyr lust so humble and tall
That whan her deyned caste on hym her eye
He toke in pacyence to lyue or deye
And thus she holdeth hym in her manere
with nothyng but with scourgyng of her chere
who regneth now in blysse but Uenus
That hath this worthy knyght ī gouernance
who syngeth now but Mars that serueth thus
The fayr Uenus / causer of playsaunce
He byndeth hym / to perpetuell obeysaunce
And she byndeth hyr / to loue hym for euere
But soo be that hys trespaas it disseuere
Thus ben they knyt / and regnyng in heuen
By lokyng moost / tyll it fyll on a tyde
That by theyr bothe assent / was set a steuen
That Mars shall enter / as fast as he may glyde
In to her next palays / and there abyde
walkyng his cours / tyll she had hym atake
And he prayeth her to haste for his sake
Thenne sayd he thus / myn hertes lady swete
ye knowe well my myschyef in that place
[Page]For sekerlyetyll that I with you mete
My lyf stand there in aduenture and grace
But whan I see / the beawte of your face
There is noo drede of deth / may do me smerte
For all your luste / is ease to myn herte
She hath soo grete compassyon of her knyght
That dwelleth in solytude / tyll she come
For it stode soo / that tylke tyme noo wyght
Coūceylled him there ne sayd to him welcome
That nyghe her wytte for woo was ouercome
wherfore she sped her as fast in her weye
All moost in one day / as he dyde in tweye
The grete Ioye that was bytwene theym two
whan they ben met / ther may noo tunge telle
There is nomore / but vnto bed the go
And thus in Ioye and blys / I let hem dwell
This worthy Mars yt was of knyghthode well
The flour of fayrnes / lappeth in his armes
And Uenus kysseth Mars / the dod of armes
So Iourned hath this Mars of whiche I rede
In chambre / amye the palays pryuely
A certayn tyme / tyll hym fyll a drede
Thorugh phebus / that was comyn hastely
within the palays yates sturdely
with torche ī hōde of whiche ye stremes bryght
[Page]On Uenus chambre / knockeden full lyght
The chamber ther as lay this fresshe quene
Depeynted was / with whyte boles grete
And by the lyght / she knewe ye shone soo shene
That phebus cam / to brēne hem with his here
This sely Uenus nyghe dreynt / ī teeris weete
Embraceth Mars / and sayd alas I deye
The torehe is come yt al this world wyll wreye
Up sterteth Mars / he lusteth not to slepe
whan he his lady herde / soo complayne
But for his nature was not for to wepe
In stede of teeris / from his eyen tweyne
The fyry sparkys / breken out for peyne
And hente his hawberke / that lay hym besyde
Flee wolde he not / ne he myght hem self hyde
He throweth on his helme of huge wyght
And grete hym with his swerd / & in his honde
His myghty spere / as he was wont to fyght
He shaketh soo / that all moost it to wonde
Full heuy was he / to walken ouer londe
He may not holde with Uenus companye
But bad her flee / lest phebus dide her espye
O wofull Mars / what mayst thou sayn
That in the palays of thy distourbaunce
[Page]Arte lefte behynde / in paryll to be slayn
And yet therto / dowble is thy penaunce
For she that hath / thyn herte in gouernaunce
Is passed half the stremes of thyn eyen
That you nere swyft / well mayst you wepe / & cryen
Now fleeth Uenus vnto Cylenius toure
with voyde / cours for fere of phebus lyght
Alas and there / hath she noo socoure
For she ne fonde / ne sawe noo maner wyght
And eke as there / she hath but lytyll myght
wherfore her seluen for to hyde and saue
withyn the caue / she fled in to a caue
Derke was the caue / and smoketh as the helle
Not but two / paces within the gate it stode
A naturell daye in derke I lete her dwelle
Now wyll I speke / of Mars suryoꝰ and wood
For sorow he wold haue sene his herte blod
Syn that he myght doo her noo companye
He ne rought not myte for doo dye
Soo feble he wexe for heete and for his woo
That nyhe he swelte / he myght not endure
He passed but one steyre in dayes twoo
But natheles for all his heuy armure
He folowed her that is his lyues cure
For whos departyng / he toke greter Ire
[Page]Than for all his brennyg in the fyre
After he walketh softely a paas
Complaynyng that it pyte was to here
O lady bryght / Uenus alas
That euer soo wyde a compas is my spere
Alas whan shall I mete you herte dere
This twelfth day of Apryll / I endure
Thurgh Ialous phebus / this mysauenture
Now god helpe / Sely Uenus all allone
But as god wold / it happed for to be
That while that Uenus made her mone
Cylenius rydyng in his chyuache
Fro Uenus balance / myght his palays see
And Uenus saleweth and doth chere
And her resseyueth / as his frende full dere
Mars dwellit forth in his aduersyte
Complaynyng euer / on her departyng
And what his complaynt was / remēbreth me
And therfore / in this lusty morenyng
As I best can / I wyll it seyn and syng
And after that / I wyll my leue take
And god yeue euery wyght / Ioye of his make

¶The campleynt. of Mars.

The ordre of cōpleynyng / requyreth skylfully
[Page]That yf a wyght / shall playne pytously
Ther must be cause / wherof he playne
Or men may deme / he pleynyth folily
And causeles / alas and that am not I
wherfore the ground & cause of all my peyne
Soo as my troubled wytte / may it atteyne
I wyll reherce / not for to haue redresse
But for to declare my ground of heuynesse
The fyrst tyme / alas that I was wrought
And for certayn effectes heder brought
By hym that lordeth eche intelligence
I gaf my trewe seruyse / and my thought
For euermore / how dere I haue it bought
To her that is of soo grete excellence
That what wyght / yt fyrst shewith his presēce
whan she is wroth / & maketh of hym noo cure
He may not long / in Ioye of loue endure
This is noo feyned mater / that I telle
My lady is the very sours and welle
Of beaute / lust / fredom / and gentylnesse
Of ryche araye / how dere men it selle
Of all disporte / in whiche men frendly dwelle
Of loue and playe / and of benygne humblesse
Of sown of instrumentis of all swetnesse
And therto soo well fortuned and thewed
That thurgh ye world / her goodnes is shewed
what wonder is thenne / though I besette
My seruyce on suche one / that may me knette
To weell or woo / syn it lyeth in her myght
wherfore myn herte / for euer I to her hette
Ne truly for my deth / shall I not lette
To ben her trewest seruaunt / and her knyght
I flater not that may knowe euery wyght
For this day in her seruyse shall I deye
But grace be / I see her neuer with eye
To whom shall I pleyne of my dystresse
who may me helpe who may my harm redresse
Shall I complayne vnto my lady fre
Nay certes for she hath suche heuynesse
For feer and eke for woo / as I gesse
In lytyll tyme / it wyll her bane be
But were she sauf / it were noo force of me
Alas that euer louers mote enduer
For loue / soo many peryllous auenture
For thought soo be / that louers be as trewe
As ony metall that is forged newe
In many a caas / hem tyden ofte sorowe
Somtyme theyr lady / wyll on hem not rewe
Somtyme / yf that Ialousye it knewe
They myghtē lightly their hede to borowe
Somtyme enuyoꝰ folke / with tunges horowe
Deprauen hem / alas whom may they please
[Page]But he be fals / no louer hath none ease
But what auaylleth suche a longe a sermon̄
Of auentures of loue / vp and doun̄
I wyll retorne / and speken of myn peyne
The poynt is this of my destruccyon
My ryght lady my saluacyon
Is in affray / and note to whom to pleyne
Of herte swete lady souereyne
For your disease wel ought I swowne & swelte
Though I none other harme ne drede felte
To what fyn made he that sytte so hye
Bynethe hym loue / or companye
And streynth folke / to loue magre theyr hede
And thenne her Ioye / for ougha I can espye
Ne lasteth not / twynklyng of an eye
And sōme haue neuer Ioye / tyll they be dede
what meneth this / what is this mystyhede
wherto constrayneth he / his folke soo faste
Thyng to desyre but yf it shold laste
And though he made a louer / loue a thyng
And makyth it stedfast and duryng
yet put he in it suche mysauenture
That rest is ther none his yeuyng
And that is wonder / that soo Iust a kyng
Doth suche hardenes / to his creature
[Page]Thus whether loue breke orellys dure
Algates he that hath with loue to done
Hath ofter woo / than chaunged is the mone
It semeth / he hath to louers enemyt
And lyke a fyssher / as men alday see
Bayteth his angle hook with some plesaūce
Tyll many a fysshe is wode / tyll that he be
Seasyd therwith / and thenne at erst hath he
All his desyre / and therwith all myschaūce
And though the lyne breke / he hath penaūce
For with the hoke / he wornded is so sore
That he his wages hath for euermore
¶Of the broche of Thebes
The broche of thebes / was of suche a kynde
Soo full of rubyes / and of stones ynde
That euery wyght / that set on it an eye
He wend anone to worthe out of his mynde
Soo soor the beaute / wolde his herte bynde
Tyll he it had / hym thought he must deye
And whan it was his / thnne he shold dreye
Suche woo for drede / ay whyle yt he it hadde
That welnyghe for the feere / he sholde madde
And whan it was for his possessyon
Thenne had he double woo and passyon
For he / soo fayr a tresour hath forgoo
But yet this broche as in conclusyon
[Page]was not the cause of his confusyon
But he that wrought it / Infortuned it soo
That euery wyght that had it shold haue woo
And therfore in the werker was the vyce
And in the coueyter that was soo nyce
Soo fareth it by louers and by me
For though my lady haue soo grete beaute
That I was mad / tyll I had her grace
She was not cause of myn aduersytee
But he that wrought her / also mote I thee
And put suche a beaute in her face
That made me coueyten and purchace
Myn owen deth / hym wyte I that I dye
And myn vnwytteth at euer I clambe soo hye
But ye now hardy knyghtes of renoun
Syn that ye be of my deuysyon
All be it not worth / to soo grete a name
yet seyn these clerkes / I am your patron
Therfore ye ought to haue some compassyon
Of my dysease / and take it not a game
The prowdest of yow / may be made full tame
wherfore I pray youw / your gentelnesse
That ye compleyne for myn heuynesse
And ye my ladyes that ben trewe and stable
By waye of kynde / ye owentobe able
[Page]To haue pyte / of folke that ben in pyne
Now haue ye cause / to clothe you in sable
Syn that your emperyce / the honorable
Is desolate / well ought ye compleyne
Now shold your holy teris falle and reyne
Alas your houour / and your emperyce
Is nyhe dede for drede / ne can her not cheuye
Complayne eke ye louers all in fere
For her that with vnfeygned humble chere
was euer redy / to doo you socoure
Complayne ye her / yt euer hath had you dere
Complayne ye beaute / fredom / and manere
Complayne ye her / that nedeth your labour
Complayne ye thylke sample of all honour
That neuer dyde / but all gentylnesse
Lrythe ye therfore on her some kyndnesse

¶The compleynt of Uenus for Mars.

Ther nys soo hyghe comfort to my plesaunce
whan that I am in ony heuynes
As for to haue leyzer of remembraunce
Upon the manhode and the worthynes
Upon the trouthe / and the stedfastness
Of hym / whos I am / all / while I may dure
Ther ought blame me noo creature
For euery wyght preyseth his gentylnessne
In hym eis bounte wysedom and gouernaūce
well more / than ony manes wytte can gesse
For grace hath wold him soo ferforth tauaūce
That of knyghthode / he is parfyght rychesse
Honoure honouerth hym / for his noblesse
Therto soo well / hath fourmed hym nature
That I am his for euer / I hym assure
For eury wyght preyseth his gentylesse
And not withstandyng alle his suffysaunce
His gentyll herte / is of soo grete humblesse
To me in werke / in word / in contenaunce
And me to serue is alle his besynesse
That I am sette in veray sekernesse
Thus ought I well blysse myn aueture
Syth that hym lyste me serue in honure
For euery wyght preyseth his gentylesse
Now certes loue / it is ryght couenable
That men full dere abye / thy noble thyng
As wake a bedde / fastyng at the cable
wepyng to lawhe / and synge in copleyneg
And soone to caste vysage and lokyng
Often to chaunge vysage and contenaunce
Pley in slepyng / and dreme at the daunce
All the reuerse / of my glad feelyng
Ialousye be hanged with a cable
[Page]She wold all knowe / thuegh her espyeg
Ther doth noo wyght / nothyng soo resonable
That all nys harme / in her ymagenyng
Thus dere abought / is loue in yeuyng
whiche ofte he yeueth / withoute ordenaunce
As sorowe ynough / and lytyll plesaunce
All the reuerse / of my glad feelyng
A lytell tyme / his yefet is agreable
But full encombrous / is the vsyng
For subtyll Ialusye / the deceyuable
Full ofte tyme causeth destourbyng
Thus ben we euer / in drede and suffryng
In noncertayne we languysshyng in penaūce
And haue full ofte many a hard myschaūce
All the reuerse of my glad feelyng
But certes loue / I seye not in suche wyse
That for to skape out of your laas I mente
For I soo long haue ben in your seruyse
That for to lete of / wyll I neuer assente
Now force / thaugh Ialousye me turment
Suffyseth me to see hym whan I may
And therfore certe / to myn endyng day
To loue hym best / shall I neuer repente
And certes loue whan I me well auyse
On euery estate / that men may represente
[Page]Then̄e haue ye made me thurgh your fraūchise
Chese the best / ye euer on erthe wente
Now loue well her / & loke thou neuer stente
And lete the Ialous put it in assaye
That for no payne / wold I not saye naye
To loue you best / shall I neuer repente
Hehrte to the it ought ynough suffyse
That loue to the / soo byghe a grace hath sente
To chese the worthyest / of alle wyse
And moost agreable / vnto myn entente
Seke noo further / neyther weye ne wente
Syn I haue suffysaunce / vnto my pay
Thus wold I ende / this complaynt or lay
To loue hym best / ne shall I neuer repente

¶Thenuoye.

Prynces resceyue ye / this complaynt in gre
Unto your excellente benygnyte
Dyrect after my lytyll suffysaunce
For elde / that in my spyrite dulleth me
Hath of endytyng / all the subtylte
well nygh byrafte out of my remembraunce
And eke to me it is a grete penaunce
Syth ryme in englysse / hath suhe scarcete
To folowe worde by worde the curyosyte
Of graūtson flour of hym / ye make in fraūce
¶Explicit the compleyces of Maris and Venus / and of the broche of The bes.

¶Here foloweth the coūceyll of Chaucer touchyng Maryag &c. whiche was sente te Bucketon &c.

My mayster bucketon / whā of cryst our kyng
was asked / what is trouth or sothfastnesse
He not one word answerd to that askyng
As who seyth / noo man is all trewe I gesse
And therfore / though I hyghte you texpresse
The sorowe and woo / that is in maryage
I dar not wryte of it noo wyckednesse
Lest I my self / falle efte in suche dotage
I wyll not seyechow that is the cheyue
Of sathanas / on whiche he gnaweth uer
But I dar seyn / were he out of his peyne
As by his wyll / he wold be bounde neuer
But thlke doted fooll / that oft hath leuer
ychyned be / than out of pryson crepe
God late hym neuer fro his woo disseuer
Ne noman hym by wayle though he wepe
But yet lest thou doo worse take a wyf
Bet is to wedde / than brenne in worse wyse
But you shalt haue sorowe on thi flesshe thy lif
And be thy wyues trall / as seyn the wyse
And yf that holo wryt / may not suffyse
Experience shall the teche / soo may happe
[Page]That the were leuer betake infryse
Than ofte falle of weddyng in the trappe
This lityll wryt / prouerbes / or fygure
I sende yow / take kepe of it / I rede
Unwyse is he / that can noo weell endure
If thou be syker / pua the not in drede
The wyf of bathe / I pray you that ye rede
Of this mater / that we haue no honde
God graunte you / your lyffrely tolede
In fredum / for full hard is to be bonde
[figure]
¶Explicit.

¶The fyrst fynders of the vii. scyences artyficyall.

Iuball was fader and fynde fyrst of songe
Of consonants / and of Armonye
By sownyng of the hamer as it ronge
From Tuball / cam fyrst the melodye
Of sugred musyque / and menystralcye
Soo procedyng doun / fro man to man
Practyk of concorde / as Iaue tolde began
¶Saturne.
Saturne taught fyrst tylthe of londe
His douhter Ceres / made men ere and sowe
The golden world / he cōpaced with his honde
Of seed and greyne / the dyfference to knowe
Of trees / herbes / growyng hye and lowe
Somer seasō the bawyme aboue moost swote
And in cold wynter the vertue in the rote
¶Mars.
The myghty Mars / called god of werres
Prudent pallas / fonde fyrst out Armure
This god & goddesse / sytte among the sterres
Tuball caym / of stele fonde the temprure
And forged plates / longe for tendure
Thus these ther / by marcyall apparaylle
Be called iu bookes / patrone of bataylle
Craft of wlles / and of cloth weuyng
[Page]Fonde Mynerue / of spynnyng chyef goddesse
And Delbora / of lynnen cloth makyng
The practyke sought bokes beryth wytnes
In alle suche craft was chyef maystres
But Semyramys / as bokes specyfye
Fonde fyrst breche / myn auctour lyst not lye
Loo here dyane / pryncesse of venerye
In forest walkyng / lyke an hunteresse
Hauyng her palays / fer aboue the skye
Callyd Lucina there shewyng her bryghtnesse
Of hūtyng / hawkyng & fisshing chief goddesse
Euery moneth her cours / she doth renewe
Now full, now wane now bryght now pale of hewe
Mercure caullyd for mans grete auaylle
God of oloquence / and of marchandyse
Argon fonde fyrst carft / of sheppe and saylle
And Neptunus / the saylyng can deuyse
To passe the see / in many sondry wyse
whiche to marchantes is full necessarye
Theyr stuff & bales / fro lond to lond to carye
Phebus fonde fyrst a crafte of medecyne
By touche of powns vayne / and inspeccyons
Esculapius taught forth the doctryne
To knowe the qualytees / of iiii complexyons
Of lectuaryes / drugges and pocyons
[Page]And among all / ther is nothyng more mete
Tho helthe of man / than a tempear dyete

¶Thauctours of vii scyences.

Auctor of gramarye / was whilom Precyan
Euclyde excelsyd in crafte of geometrye
Tullius in rethoryque / was a famous man
Hermogines fader of philosophye
Boece wrote of musyque and of melodye
Of metrephisyke wrote Aristotyles
Albumazar also astronomye
Fynders of scyencis / and vertuous encrees

¶The seuen scyences lyberall.

Of seuen scyences called lyberall
Gramer techeth congruyte and wrytyng
And phylosophye in especyall
Telleth the natures of euery maner thyng
Ars metryque / craft of proporcōnyng
Musyke concorde / and Rethoryke eloquence
Astrouomye by dyurnall meuyng
The world gouerneth / by heuenly Influence

¶The disposicyon of the vii planetes.

Saturne disposyth a man to melancolye
[Page]Iubyter reyseth a man to grete noblesse
And sturdy Mars / to stryf warre and enuye
Phebus to wysedom / and to hygh prowesse
Mercurye / to be chaungeable and doublenes
The mone mutable. now glad. & now drypyng
And gnery Uenus / full of newfauglenes
Make men vnstable here in her lyuyng

¶The disposicyon of the xii sygnes.

Aries is hote and also coleryke
And in the hede / kepeth his domynacyon
Taurus in the throte / be man hole or syke
That part hath he in supportacyon
G minis eke / by reuolucyon
Hath in tharmes his Influence and werkyng
How shold a man than be stedfast of lyuyng
Cancer hath the brest in his demayne
Of the herte / lorshyp hath the lyon
Uirgo the gouernaunce / hath of twayne
Of nauyll and wombe / and Libra lower doun
The membres of man / guerneth the scorpyon
By this reson / the philosophers seyng
Is that man can / not be stedfast in lyuyng
Of all the sygnes / rekenyd here to forne
The thyes of man gouerneth sagittarye
[Page]And knees and lengges / hath Capricorne
Eke the calf dounward pertayneth to aquarye
And the feet / I wyll not long tarye
Pisse hath them in his kepyng
How shold a man be stedfast of lyuyng

¶The desposicyon of the iiii cōplexions

The sangweyn man / of bllood hath hardynes
wrought to be louyng / large of dispence
The fleumatyk mā / slouthe expssith with dul­nes
whyte of visage / rude of eloquence
And syth ther is to man suchedufference
By complexions diuersly werkyng
Answere herto / concludyng this sentence
How that a man myght be stedfast of lyuyng
The coleryk man / subtyll and deceyuable
Sklender leue / and cytryne of his colour
wroth sodeynly wode and not tretable
And full of enuye / malyce and rancaur
Drye thurstye / and a grete wastour
Disposed to many a sondry thyng
with pompe and boost / hasty to doo rygour
Ben suche men stable in her lyuyng
Melancolye / of his complexyon
Disposyd by kynde / for to be fraudelent
[Page]Malicyous froward / and by discepcyon
Forgyng dyscordesr double of his entent
whiche thynges peysed by good auysement
I dare conclude / as to my felyng
By confirmacyon / as in sentent
Fewe men ben be here stable in her lyuyng

¶The disposicyon of the iiii elementes.

The world soo wyde the ayre soo remeuable
The cely man soo lytyll of stature
The graf and ground of clothyng so mutable
The fyre soo hote / and subtyll of nature
water neuer in one / what creature
Made of these foure / whiche ben soo flyttyng
May stable be / here in this lyuyng
Man of therthe hath slouthe and heuynes
Flux and reflux / by water made vnstable
Lryndely of ayer / he hath also swetnes
By fyre made hasty wode and not tretable
To erthe agayn / by processe comperable
Selde or neuer / in one poynte abydyng
How shold he thenne / be stable in lyuyng
Fyre resolueth erthe to be watyre
And waterye thynges / fyre torneth in ayer
Makyth hard thynges nesshe & fyre naturelly
[Page]Soo chaungeth many thynges varyably
Though harde he is that shone bryght & fayr
whiche element hath in man grete werkyng
How shuld he than / be stable in lyuyng
Ayer of kynde / yeueth Inspiracyon
To mannes herte / thyng moost temperatyf
And kyndely hete / yeueth respiracyon
Of subtyll ayer / and a grete medicatyf
To tempre the spirytes / by vertu vegitatyf
And syth that ayer / in man is thus meuyng
How shold he than / be stedfast of lyuyng
water som whle is congeled to crystall
Cold and moyst / as of his nature
Now ebbeth now floweth whiche inespecyall
The mygth of the mone doth her cours recure
And syth this element / by recorde of scripture
Is one of the foure / compact of our makyng
I wold enquyre / what maner creature
Made of these foure / were stedfast of lyuyng

¶The disposicyon of the four seasons of the yere

Man hath in somer dryenes and hete
In thyr bookes as auctours lyst expresse
And whan phebus entrith the Ariete
[Page]Dygeste humours vpward don hem dresse
Poorys opene / that season of swetenes
And exaltacyons / dyuersely werwyng
How shold man be stable in luyng
Autumpne to Ueer / fcunden is contrarye
As Galyen sayth / in all his qualytees
Dysposyng a man / that season to varye
To many vncouthe strauge Infirmytees
Of canyculer dayes / takyng the propertees
By reuelacyon / many folde chaungyng
How shold men thenne be stable in lyuyng
Man hath in wynter / in this plesaunt lyf
By disposicyon / cold and humydyte
whiche season / is to flewme nutrytyf
Spoyleth herbe and tre of theyr fresshe beaute
Colsyth & constrayneth the pooris mē may [...]
Causeth kyndly hete / inward to be werkyn
How shold man thenne / be stable in lyuyng
By Ueer man hath hete and eke moysture
Atwene bothe / a man of temperaunce
In whiche tweyne / grete lust he doth recure
If colde hym put not in dystemperaunce
This meynt with drede is man̄s gouernaun
Ay in noo certeyn / by record of wrytyng
How shold he thenne be gable in lyuyng

¶The dispocyon of the world.

The monethis varye eueryche hath his sygn
And hard it is alle wedrs for to knowe
The tyme som while is gracyous / & benygne
And vpon hyilles and valeyes that benlowe
The foure wyndes / contraryous doo blowe
In euery storme / man is here abydyng
Some to relyue / and some to ouerthrowe
How shold man thenne / be stedfast in lyuyng
The worldly answere / fortune transmutable
Trust of lordshyp / a feynte sekernes
Euery season varyeth / frendshyp is vnstable
Now myrthe now sorowe / now hele now sekenes
Now ebbe of pouert now flodes of riches
And stont ī chaūge / now losse / now wynnyng
Tempest in see / and wyndes sturdynes
Make men vnstable / and ferfull of lyuyng
Tytan somwhyle fresshly doth appere
Then̄e cometh a storme & doth his light deface
The soyle of somer / with flouris glad of chere
wynters rasour doth them a way race
Alle erthely thynges sodenly don pace
whiche may here haue noo syker abydyng
Eke alle estates fals fortune doth menace
How shold a man / be steafast of lyuyng
Beholde and see / the transmutacyon
How the season / of grene lusty age
Force of Iuuentus / strong. hardy. as a lyon
Tyme of manhode / wysedom lad of corage
And how decrepitus / torneth to dotage
Caste all in a & alaunce / and forgete nothyng
And thou shalt see in this lyf a pylgremage
Ie whiche ther is noo stedeast abydyng
The [...] [...]yfte vp thyn eyen vnto heuen
And praye thy lorde / whiche is eternall
That sytte soo ferre / aboue the sterrys seuen
In his ryall place / moost Imperall
To graunt the grace / in this lyf mortall
Contricion / shryft / ho wsyll / at departyng
And er thou parte hens / remssyon fynall
To ward te lyf / where Ioye is euerlastyng

AMEN

¶Thys in pryntyde in westmoster inkyng. strete. For me Iulianus Notarii.

This keyboarded and encoded edition of the work described above is co-owned by the institutions providing financial support to the Text Creation Partnership. This Phase I text is available for reuse, according to the terms of Creative Commons 0 1.0 Universal. The text can be copied, modified, distributed and performed, even for commercial purposes, all without asking permission.