De morum modestia.

SCHOLARES Omnes omnibus in locis modestiam suo ordini convenientem observent; praesertim in plateis, in conci­onibus, & quibuscun (que) congressibus publicis. Inferiores ordines superioribus vbi (que) loco cedant, & eosdem debitâ reve­rentiâ prosequantur: Hujus rei violatores (si non fuerint adulti) virgâ à suis coerceantur; sin adulti, primò asperè verbis castigentur; secundò hebdomadae; tertiò menstruo commeatu; quartò, è Collegio ejiciantur.

Nemo in pupillari statu degens, nisi vni ejusdem Collegij ordinis & conditionis sodali associatus, concessá (que) priùs à Tu­tore, vel Decano, vel Collegij Praefecto veniâ, in Oppidum exeat: Si secùs quis exierit, mulctam arbitrio Procancellarij, aut Praepositi Collegij, aut ejus absentiâ, Praesidis ejusdem Collegij cujus est, infligendam incurrat. Sizatores tantùm, cum licentia Tutorum in eorum negotijs peragendis exeuntes, non astringantur huic Statuto.

Nemo cujuscun (que) Gradus aut Ordinis fuerit (publicos privatos (que) magistratus excipimus, in executione suorum officiorum occupatos) fo­rum frequentet, vel diutiùs in aliqua Oppidi platea moretur: aut tabernas, cauponas, vel diversoria ad comessandum aut bibendum accedat, (nisi ad amicos vel Parentes, tanquam hospites adventantes, ad Oppidum accersitus fuerit) sub poena expulsionis post secundam admonitionem.

Nullus Scholaris cujuscun (que) Gradus aut Ordinis fuerit, in Conventibus, quos Assizas aut Sessiones vocant, Iudice pro tribunali sedente, in illum coetum se ingerat; nisi causâ significatâ, & petitâ priùs veniâ à Procancellario. Qui secùs fecerit, mulctetur viginti solidis.

Nullus Scholaris cujuscun (que) Gradus fuerit, intersit electionibus eorum militum, qui ad majora Regni comitia per Comitatum assignandi sunt. Nullus Scholaris praesens sit in militum lustrationibus, sive in Oppido, sive juxta Oppidum, seu quocun (que) loco alio in Comitatu fiant; nisi causà approbatâ per Dom. Procancellarium, sub mulcta superiùs praedicta.

De vestitu Scholarium.

NEMO Scholarium galero vtatur, aut in Collegio, aut extra Collegium; nisi aegrotaverit, aut sit Nobilis alicujus Filius, aut Militis primogenitus. Socij cujuscunque Collegij & Graduati, qui non sunt Socij, dum moram traxerint in Academia, superiori pileo scholasti­co, & quadrato (nisi aegrotaverint) vtantur, tàm in Collegio, quàm extra Collegium.

Nemo ad aliquem in Vniversitate Gradum evectus, nisi togâ talari, capucio (que) ordini suo congruente, aut ad minimum insigni circa collum sacerdotali indutus, Collegio exeat.

Nemo disputationi publicae, concioni ad Clerum, precibus in Ecclesia Beatae Mariae publicis, sepulturis, aut congregationibus intersit, sine toga, habitu, & capucio gradui suo conveniente, juxta antiquum Academiae morem. Contra delinquentes in aliquibus, aut aliquot praedicto­rum, mulcta imponitur ex Statuto sex solidorum, & octo denariorum.

De Lectionibus & Disputationibus tam Publicis quàm Privatis.

PVblici in Vniversitate Lectores publicè in Scholis diligenter legant, quatuor diebus in septimanâ, horis solitis, sub poena pecuniariâ per Statuta Academiae impositâ.

Nullus Scholaris, sive Collegiorum, sive suis alatur sumptibus, vllam publicam lectionem ejus professionis cui destinatur, omittat, sub poenis pro prima, secunda & tertia vice, absentibus, secundum Statuta infligendis.

Monitores constituantur a Decanis, per Collegia: singuli pro singulis Scholis artium, qui auditorum absentiam observent. Absentes mul­ctentur secundum Statuta Vniversitatis. Lectiones & Disputationes in singulis Collegijs privatim observentur, secundum peculiaria cu­jus (que) Collegij Statuta, sub mulcta ijsdem Statutis ordinatâ. Disputationes publicae perficiantur secundum Academiae instituta; & omissae secundum eadem puniantur.

Decretum de Comessationibus Candidatorum auferendis. Novemb. 21. 1625.

CVM, pessimo more, Candidati post disputationes in Scholis, privatas, & majoribus nostris penitùs ignotas, invitationes induxerint; ad grandem Academiae infamiam, & gravissimas expensas, & damnum eorum qui summo labore suo & curâ studiosos alunt. Ad querelam hanc adversus Academiae disciplinam auferendam, per Dominum Procancellarium, & Praefectos Collegiotum sic decretum est; VT om­nes Inceptores & Quaestionistae deinceps futuri, ab omnibus ejusmodi invitationibus, comessationibus, & conventibus abstineant; nomina­tim ne Moderatores aut Disputantes audeant, vel invitare, vel hujusmodi invitationes cujuscun (que) rogatu acceptare, aut comessationibus e­jusmodi interesse. Quòd si qui in isto genere delinquant, vt habeantur infames propter luxuriam & intemperantiam; & ab eo gradu quem ha­bent suspensionem incurrant, at (que) infra annum illum in quo deliquerint, nullam gratiam vlteriorem ne (que) gradum in Academia obtineant.

Decretum de personis vagis & foeminis amovendis à Collegijs. Decemb. 19. 1625.

CVM contra antiqua Academiae & Collegiorum instituta, paucis ab hinc annis, intra Collegiorum parietes, pueri & viri literarum rudes, & penitùs inepti, qui progressum aliquem in studijs Academicis faciant; & foeminae praetereà irret serint, ad ea opera facienda, quae à stu­diosis egenis ad eorum impensas sustentandas fieri solebant: vnde & pauperibus scholaribus grave damnum, & Vniversitati scandalum domi; foris opprobrium accreverunt: Ad occurrendum hisce malis, per Dom Procancellarium & Praefectos Collegiorum, sic decretum est.

NVLLI deinceps pueri aut viri hujusmodi, literarum ignari, permittantur, aut in Collegio aliquo residere, aut circumvagari, aut quo­cun (que) modo aut praetextu sese ad hujusmodi servitia perficienda intrudere; nisi fuerint aut Collegij ipsius ministri, aut peculiaris alicujus servi, qui dominorum suorum tantùm negotia expediant.

Nulla deinceps mulier cujuscun (que) aetatis aut conditionis, aut per se audeat, aut vocata ab alijs, permittatur in quocunque Collegio, in pri­vatis cubiculis, quorumcun (que) lectos sternere; aut ad aulam, culinam, aut promptuarium accedere, vt cujuscun (que) cōmeatum, aut panem, aut potum infra Collegij limites ad cubiculum alicujus scholaris deferat; nisi vocata fuerit ad custodiam infirmi alicujus aegrotantis.

AEGrotantium Custodes, & Lotrices omnes sint provectae aetatis, bonae famae, & vxores, aut viduae, quae per se lintea Scholarium lavan­da recipiant, & lota referant; nullo (que) praetextu permittantur ancillae adolescentes, ad studiosorum cubicula accedere. Si ad sordes effe­rendas foeminas admitti fuerit necesse, Collegiorum tantum eleemosynariae, aut vetulae 50. ad minimum annorum ad haec opera permittantur.

Si quae mulieres aliae, aut aliter quàm decretum est, Collegia frequentaverint: admoneantur desistere, & prohibeantur per Praefectos, Prae­sides, aut Decanos Collegiorum. Quòd si prohibitae non desistant ab ingressu Collegiorum; ad Dom. Procancellarium deferantur; vbi, si con­tumaciae convictae fuerint, tanquam incorrigibiles ab Vniversitate, & Villa, & ab omnibus Villis, infra quatuor milliaria ab ea­dem distantibus banniantur, secundum Chartam Academiae concessam per Regem HENRICVM VI. Si qui studiosi in Collegijs, pueros, viros, aut foeminas hoc Decreto prohibitas, ad cubicula sua accersant aut recipiant; singuli Collegiorum Praefecti, aut eorum absentiâ, Praesi­des, contra delinquentes secundum Collegiorum suorum Statuta procedant: si per privata Collegiorum Statuta satis provisum non sit, con­vocatis ijs (quorum interest prospicere ne quid detrimenti Collegia capiant) Ordinationes hujusmodi inter se maturo consilio faciant, quae ad honorem Academiae tuendum, ad Collegiorum famam & innocentiam conservandam, maximè vtiles & idoneae videri possint.