After dyuerse werkes made / translated and achieued / hauyng noo werke in hande. I sittyng in my studye where as laye many dyuerse paunflettis and bookys. happened that to my hande cam a lytyl booke in frenshe. whiche late was translated oute of latyn by some noble clerke of fraūce whiche booke is named Eneydos / made in latyn by that noble poete & grete clerke vyrgyle / whiche booke I sawe ouer and redde therin. How after the generall destruccyon of the grete Troye, Eneas departed berynge his olde fader anchises vpon his sholdres / his lityl son yolus on his honde. his wyfe wyth moche other people folowynge / and how he shypped and departed wyth alle thystorye of his aduentures that he had er he cam to the achieuement of his conquest of ytalye as all a longe shall be shewed in this present boke. In whi­che booke I had grete playsyr. by cause of the fayr and honest termes & wordes in frenshe / whyche I neuer sawe to fo­re lyke. ne none so playsaunt ne so wel ordred. whiche boo­ke as me semed sholde be moche requysyte to noble men to see as wel for the eloquence as the historyes / How wel that many honderd yerys passed was the sayd booke of eneydos wyth other werkes made and lerned dayly in scolis specyal­ly in ytalye & other places / whiche historye the sayd vyrgyle made in metre / And whan I had aduysed me in this sayd boke. I delybered and concluded to translate it in to englysshe And forthwyth toke a penne & ynke and wrote a leef or tweyne / whyche I ouersawe agayn to corecte it / And whā I sawe the fayr & straunge termes therin / I doubted that it sholde not please some gentylmen whiche late blamed me sayeng yt in my translacyons I had ouer curyous termes whiche coude not be vnderstande of comyn peple / and desired mete vse olde and homely termes in my translacyons. and [Page] fayn wolde I satysfye euery man / and so to doo toke an olde boke and redde therin / and certaynly the englysshe was so rude and brood that I coude not wele vnderstande it. And also my lorde abbot of westmynster ded do shewe to me late certa­yn euydences wryton in olde englysshe for to reduce it in to our englysshe now vsid / And certaynly it was wreton in suche wyse that it was more lyke to dutche than englysshe I coude not reduce ne brynge it to be vnderstonden / And cer­taynly our langage now vsed varyeth ferre from that. whiche was vsed and spoken whan I was borne / For we en­glysshe men / ben borne vnder the domynacyon of the mone. whiche is neuer stedfaste / but euer wauerynge / wexynge o­ne season / and waneth & dyscreaseth another season / And that comyn englysshe that is spoken in one shyre varyeth from a nother. In so moche that in my dayes happened that certayn marchaūtes were in a ship̄ in tamyse for to haue sayled ouer the see into zelande / and for lacke of wynde thei taryed atte forlond. and wente to lande for to refreshe them And one of theym named sheffelde a mercer cam in to an hows and axed for me [...]e. and specyally he axyd after eggys And the goode wyf answerde. that she coude speke no fren­she. And the marchaūt was angry. for he also coude speke no frenshe. but wolde haue hadde egges / and she vnderstode hym not / And thenne at laste a nother sayd that he wolde haue eyren / then the good wyf sayd that she vnderstod hym wel / Loo what sholde a man in thyse dayes now wryte. eg­ges or eyren / certaynly it is harde to playse euery man / bycause of dyuersite & chaūge of langage. For in these dayes euery man that is in ony reputacyon in his coūtre. wyll vtter his cōmynycacyon and maters in suche maners & ter­mes / that fewe men shall vnderstonde theym / And som ho­nest [Page] and grete clerkes haue ben wyth me and desired me to wryte the moste curyous termes that I coude fynde / And thus bytwene playn rude / & curyous I stande abasshed. but in my Iudgemente / the comyn termes that be dayli vsed ben lyghter to be vnderstonde than the olde and aūcyent englys­she / And for as moche as this present booke is not for a rude vplondyssh man to laboure therin / ne rede it / but onely for a clerke & a noble gentylman that feleth and vnderstondeth in faytes of armes in loue & in noble chyualrye / Ther­for in a meane bytwene bothe I haue reduced & translated this sayd booke in to our englysshe not ouer rude ne curyo­us but in suche termes as shall be vnderstanden by goddys grace accordynge to my copye. And yf ony man wyll enter mete in redyng of hit and fyndeth suche termes that he can not vnderstande late hym goo rede and lerne vyrgyll / or the pystles of ouyde / and ther he shall see and vnderstonde lyghtly all / Yf he haue a good redar & enformer / For this booke is not for euery rude dna vnconnynge man to see / but to clerkys and very gentylmen that vnderstande gentylnes and scyence ¶Thenne I praye alle theym that shall rede in this lytyl treatys to holde me for excused for the transla­tynge of hit. For I knowleche my selfe ignorant of con­nynge to enpryse on me so hie and noble a werke / But I praye mayster Iohn Skelton late created poete laureate in the vnyuersite of oxenforde to ouersee and correcte this sayd booke. And taddresse and expowne where as shalle be founde faulte to theym that shall requyre it. For hym I knowe for suffycyent to expowne and englysshe euery dyf­fyculte that is therin / For he hath late translated the epystlys of Tulle / and the boke of dyodorus syculus. and di­uerse other werkes oute of latyn in to englysshe not in rude [Page] and olde langage. but in polysshed and ornate termes craf­tely. as he that hath redde vyrgyle / ouyde. tullye. and all the other noble poetes and oratours / to me vnknowen: And also he hath redde the ix. muses and vnderstande theyr mu­sicalle scyences. and to whom of theym eche scyence is ap­propred. I suppose he hath dronken of Ely [...]ons well. Then I praye hym & suche other to correcte adde or mynysshe where as he or they shall fynde faulte / For I haue but folowed my copye in frenshe as nygh as me is possyble / And yf ony worde be sayd therin well / I am glad. and yf otherwyse I submytte my sayd boke to theyr correctyon / whiche boke I presente vnto the hye born my tocomynge naturell & soue­rayn lord Arthur by the grace of god Prynce of Walys Duc of Cornewayll. & Erle of Chester fyrst bygoten sone and heyer vnto our most dradde naturall & souerayn lorde & most crysten kynge / Henry the vij. by the grace of god kynge of Englonde and of Fraunce & lord of Irelonde / byse­ching his noble grace to receyue it in thanke of me his moste humble subget & seruaūt / And I shall praye vnto almyghty god for his prosperoꝰ encreasyng in vertue / wy­sedom / and humanyte that he may be egal wyth the most re­nōmed of alle his noble progenytours ¶And so to lyue in this present lyf / that after this transitorye lyfe he and we alle may come to euerlastynge lyf in heuen / Amen:

¶Here foloweth the table of this present boke
How the ryche kynge Pryamus edifyed the grete cyte of troye capo.
How the cyte was cruelly sette a fyre & flāme / And how Eneas armed bare his fader oute of the same cyte capo.
How Eneas sacryfyed to his goddys in the place where Polydorus had be slayn capo.
How Eneas in makynge the forsayd sacryfyce hewe ye trō ke of a tree oute of the whiche yssued bloode. And how po­lydorus declared the sygnyfycacyon of the sayd myracle & the wylle of the goddys capitulo
Thobsequyes of Polydorus capo.
Here bygynneth the historye how dydo departed from her co­untrey capo.
How dydo arryued in Lybye a strange contrey. & bought as moche lande or groūde as she myght cōteyne wyth ye space of an hide of an oxe / in whiche she buylded and edefyed the cyte of Cartage / cao.
How a kynge neyghbour to Cartage dyd demaūde to wif the fayr dydo / quene of Cartage. ye whiche for the loue of her late husbonde had leuer to slee her selfe than to take the sa­yd kynge capo.
A comendacyon to dydo capo.
How Iuno for tempesshe thoost of eneas whiche wold goo into ytalye. prayd ye goddes of wyndis / that euerych bi him selfe sholde make cōcussyon & torment in thayer ca.
How dydo coūselled wyth he [...] suster Anne capo.
Thansuers of anne to hir suster dydo ca.
How Eneas after grete fortunes of the see arryued in cartage. And how dydo for his swete behauoir & fayr spekyng was esprysed of his loue capytulo
[Page]How the goddes accorded the maryage of Eneas to dy­do capitulo
Of the gret tempest & storme at maryage of theym ca.
How yarbas complayned hym to Iubyter of Eneas that edyfied the cyte of Cartage / And how Iubyter sent sodayn­ly Mercuryus toward Eneas for to make hym to retorne in to the contree of ytalye capo.
How dydo knowynge the departyng of Eneas ranne thorugh the cyte of Cartage as a woman dysperate and from her selfe capitulo
How dydo sorowfully bewayled the departyng of Eneas bi swete & amyable wordes ca.
How dydo all in a rage complayned her to Eneas / and to the goddys ca.
How dido wyth grete cursynges gaaf leue to Eneas: capytulo
How dydo fyl doun in a swone / and how she was borne a­waye by her wymen / and also how dyligently the nauye of Eneas was made redy for to goo in to ytalye / ca.
How Eneas brake the ooken tree of the grete loue of dy­do capytulo
Of the wordes of dydo to her suster Anne ca.
How dydo in grete bewaylynges prayd her suster to make a grete fyre in a place most secrete in her palays for to bren­ne ye harnoys and raymentes of eneas / and how by dyuerse sortes she supposed to haue destroyed hym ca.
How dydo made her lamentacyons repreuyng the periure­ment of laomedon ca /
of ye vysion ye eneas had for to depart towarde ytalye c̄.
How Eneas encyted the patrons & maystres of his shyp­pes / for to departe. capo.
[Page]How dydo full of grete rage & dyspourueyd of wytte slew & hirselfe wyth the swerde of Eneas / & how be it yt to fore is made mēcyon of this occysion. It was no thynge but for to shewe the dyuercyte of fortune / And here thexecusion of the dede is shewed. capitulo
Of the beaute of dydo capitulo
How Eneas sayled / and how by tempest he aryued in Se­cyle capitulo /
How eneas toke ye see for to seke ye regyon of ytalye ca.
How kynge Egeus lete falle hym selfe in to the see for the deth of his sone Theseus capo.
How Eneas arryued in ytalye / ca.
Here it is shewed how many kynges had ben in ytalye. to fore that Eneas came thyder fyrste cao.
How Eneas byganne to bylde his fortresse vpon thyre­uer of tonyre capitulo
How Eneas sente his messagers towarde kynge latyne capitulo
How kyng latynus made grete Ioye and good chere to the messagers of Eneas capitulo
how kyng latyn sent certayn psentis to eneas ca.
How Turnus sente for his folke for to chace and dryue Eneas oute of his lande. capo.
How Eneas wente to seke socours of the kynge Euan­der / capo.
How grete a sorowe was made whan Eneas and Palas departed from palence capo.
How Turnus cam tofore the castell of Eneas for to assa­ulte hym / capo.
How Vysus and Eryalus made theym redy to entre vp­on the hoosts of Turnus / capo.
How Vysus and Eryalus entred into the tentis of Turnus [Page] hooste and made grete slaughter and destruccyon: capitulo
How the two felawes loste eche other in the forest / whan the knyghtes of laurence chased theym / capo.
How bolcus slewe Eryalus / & how Vysus his felaw slewe bolcus. Of the deth of the sayd Visus / And how the he­des of the sayd two felawys Eryalus and Vysus were broughte vpon two speres a fore the fortresse of Eneas: capitulo.
How thassaulte was grete atte gate of the castel cao.
How Eneas cam ayen from palence wyth moche folke fer to socoure his sone & his peple ayenst Turnus ca.
How Eneas sought Turnus alle aboute the bataylle for to slee hym for the deth of palas capo.
How Eneas smote Merencyus wyth his spere in his thie a grete stroke capo.
How Merencyus made grete sorowe whan he sawe his so­ne deed capo.
How Eneas sente the body of Palas in to the shippe and sente it to his fader capo.
Of the messagers that Turnus had sent to diomedes ca.
How kyng latyn coūselled for to make peas wyth Eneas capo.
How Eneas cam to fore the cyte of laurence ca.
How the quene Camula was slayn in ye bataylle ca.
How Turnꝰ cam to ye felde & his folke wyth hym ca.
How the Couenaunt of the batayll was made bytwene Eneas & Turnus capo.
How Tholomeus made the bataylle to bygynne ayen gre­te & horryble capo.
How Turnus dyd grete damage to eneas folke ca.
[Page]How the quene Amatha hanged her selfe by desperacōn capitulo
How Eneas and Turnus fought body ayenste body in a felde one ayenste that other. capitulo
How Eneas wedded Lauyne / And hadde the royalme of ytalye. captiulo
How kynge Latyne deceassed / And Eneas soone after hym / And how Ascanius was callyd Iulyus: capitulo
How Ascaunis helde the royalme of ytalye after the deth of Eneas his fader. capitulo
TO the honour of god almyghty / and to the gloryous vyrgyne Marye moder of alle gra­ce / and to the vtylyte & prouffyt of all the po­licye mondayne. this present booke compyled by virgyle ryght subtyl and Ingenyous ora­tour & poete / Intytuled Eneydos. hath be translated oute of latyn in to comyn langage / In whiche may alle valyaunt prynces and other nobles see many valorous fayttes of ar­mes. And also this present boke is necessarye to alle cyte­zens & habytaunts in townes and castellis / for they shal see. How somtyme troye the graūte / and many other places stronge and inexpupnable haue ben be sieged sharpely & as­sayled. And also coragyously and valyaūtly defended / and the sayd boke is atte this present tyme moche necessarye / for to enstructe smale and grete. for euerych in his ryght / to ke­pe & defende / For a thynge more noble is to deye / than vyla­nously to be subdued /

¶How the ryght puyssant kynge pryamus edyfyed the grete Cyte of Troye Capm̄ primū

FOr to here / opene / and declare the matere of whiche here after shall be made mencyon / It behoueth to presuppose that Troye the grete capytall cyte / and thexcellentest of alle the cytees of the coūtre & regyon of Asye was constructe and edefyed by the ryght puyssaūt & reno­med kyng Pryamus sone of laomedon descended of thaūcyen stocke of Dardanns by many degrees / whiche was sone of Iubyter & of Electra his wyf after the fyctious poety­que / And the fyrste orygynall begynnynge of the genealogye of kynges. And the sayd Troye was enuyronued in fourme of siege / and of excidyon by Agamenon kynge in grece brother of menelaus / whiche was husbonde to helayne [Page] The whiche agamenon assembled and accompanyed wyth many kynges. dukes / erles / and grete quātyte of other princes & grekes innumerable. hadde the magystracyon and v­nyuersall gouernaūce of alle thexcersite and hoost to fore Troye:

DVryng the sayd siege / Pryam̄ habounded in lygna­ge of one & other sexe so renōmed of beaulte wysedome and prudōmye / scyence. prowesse. valyaūce. pro­phecye / and other vertuous proprytees / that alle the worlde coude not ynough meruaylle / How god and fortune hadde emprysed to endowe a mortal man wyth dowayres so hye & vertuous / But the prudence of pryame knowyng to fore / that the aduenements and aduersitees of warre be doubto­us and vnder the honde of fortune / the whiche after his mutabylite gyueth vyctorye / To that one encreacynge honour glorye / tryumphe / and gladnesse / And to that other she gy­ueth to be subgette to the face of the ryght blody swerde in grete effusion of blood & dymunycion of prowesse and of theyr genealogye the mutable captyuyte of theyr prosperyte & aduersite or euyl fortune:

Pryame thenne wyll teshewe & helpe for thynges doubtous for to come. to that ende that his royalme shall not departe oute of his honde ne fro his blood / Yf it so happened that he and his chyldren were ouerthrowen fro his name by force of swerde or of the siege. Firste he dyd do departe one of his sones named polydorus the xiiij sone & fyrste of his name. In hopynge that to hym / his name & vengeance yf it were nede sholde be kept

Polidorus then̄e was sente wyth a grete multytude of noble companye full of yougthe & of stronge corage wyth rychesse ynough of golde and of syluer / money / tresour [Page] and Iewellis / vnto a kynge named plasmator kynge of tarce / whiche enduryng the good fortune. shewed hym right socourable to the sayd kynge pryame / In offerynge hym sel­fe to socoure hym yf he had nede in alle poyntes. in whiche the sayd pryame wolde require hym. But the prosperous fortune of the kynge pryam torned in to aduerse. The said plasmator chaūgyng his wylle / and alle thamyte. whiche longe tyme hadde endured & promysed to holde to the sayd kynge Pryame. as ye shall here after

NOw thenne plasmator receyued Polidorus so mag­nyfycatly & wyth soo grete honoure that by wrytyng it maye not be recyted. ne the thynge descryued / And after whan Pryam was subdued. and putte vnder the sharpe domynacyon of the grekes. In somoche that they had slayne then̄e some of the sones of the sayd pryame. and many kynges to hym alyed / And that into the cyte many were wythdrawen for to gyue to the sayd pryam ayde & comforte. and the sayd troians myserable semed better to lose and indygēt of force. than to haue apparence of vyctoryus glorye. And thys comen to the knowleche of plasmator. thoughte in his mynde. and conspyred the deth of the sayd polydorus / And in fayte the sayd plasmator broughte the sayd polydorus v­pon the ryuage of the see whiche was sondy / and a place secrete ynough fro the syghte of men / in whiche place the sa­yd plasmator slewe polydorus wyth a darte whiche he bare The whiche so traytoursly slayn was by the sayd plasmator buryed in the same place wythin the sonde ¶Vpon whom was so moche sonde layde / that vpon polydorus semed to be a lityl hille or montycle / And alle this was doon by the sa­yd plasmator. to thende that his rychesse whiche was brou­ghte to hym for the gouernaūce of ye sayd polydorus / sholde [Page] abyde wyth hym for to accomplyshe his auaryce Insacyable And syth he sawe that the force and strengthe of the troy­ians was thenne soo perturbed by the pryckynge of fortune that it semed to hym / that for the cause of this excessyue oc­cysion / lityl damage and hurte myght come to hym:

But thenne whan the noble cyte of Asye was broy­lled and brente by the subtyl accyon of the fyre putte in to it by the grekes. In so grete largenesse. that for the thicke tenebrosite of the blacke smoke whyche the place hadde enbraced and yssued oute The sterres of the heuen hadde wythholden theyr clere illustracyons. And had no faculte ne power by theyr naturel lyghte to enlumyne the sayd pla­ce / And that none eye of ony persone coude perceyue ony thyng / but alle onely by the domageoꝰ clerenesse of the fyre deuourynge the pompe of Troye ¶Now was that pyeto­us cyte / somtyme example in alle goode vertues aboue alle other cytees of the worlde alle brent and putte in desolacy­on suffretous / Abydyng onely one of the yates of the sa­me toun. named in theyr langage the yate stex whiche was made soo maysterly / that the Ingenyous subtylte of mais­tres of masonrye carpentrye / that of alle ye coūtreyr of A­sie it passed alle other in efforte and strengthe ¶It was made of soo hye and excellente ouurage:

¶How the cyte was cruelly sette a fyre. and on a flamm And how Eneas: armed bare his fader oute of the same cyte ¶capitulo. ijo.

BY the same yate stex thenne sette in fyre and flam­me. And smokynge the totall desolacyon of the sayd plase of Troye. lyke as the goddes and fortu­ne hadde enterprysed to destroye soo artyfycyall a werke vnto the laste stone and foundemente of soo hye a place / [Page] And by horryble and cruel indygnacyon to throwe doun / destroye. and confounde the pompouse and proude noblenes of thynhabytants of Troye / and also theyr possessyons & hauoyr cyuyles and other / And vnder the tenebres and derkenes departed Eneas armed clerly at all pieces in the fa­cyon of a cote armour vpon his harnoys / The despoyle of a ryght horryble and moche cruel lyon. Whiche the said Ene­as hadde kylled and slayne. And the said eneas bare vpon his sholdres his fader Anchises / the whiche thenne by olde age and lyuynge many yeres his bloode was weyen colde soo moche that he myghte not walke ne helpe him selfe by moeuynge / And thus Anchises trussed vpon the sholdres of his sone eneas helde a coffre well rychely adourned wyth many precyous stones in facyon and manere of a shryne In the whiche were the goddes of Troye and grete and di­uerce relykes / whiche were the thynges / In whiche the famylye of Troye / the people. and comynalte of Asie hadde fryed theyr socoures / and thalegement of theyr anguysshous heuynesses ¶And Eneas thus charged wyth his fader who­me he bare wyth magnanymyte of courage as sayd is / bro­ughte his sone yolus by the ryght honde / beynge of the age of xij yere soo fayr and so welle composed that it maye leefully be sayd that nature hadde doon her deuoyr and hol­pen to the procreacyon of suche a fygure for a patrone of mankynde ¶What shall I saye more of Anchises and yolus lyke as sayd is / ensiewed creusa his wyf vncuryously aourned / Nothyng appertenaūt to thestate royall / hir vy­sage mate by frequente sources of grete teeris / And hir he­yr whiche by manuel artyfyces hadde dyligently be enryched lete theym hangynge indyfferently and alle rufflyd on alle partyes. Wythout ony hope of amendemente / It sholde be an [Page] harde thynge to many one to putte in forgetynge her swete firste lyf and now her deploracyon / It is a greuous thyng to me to passe ouer so lyghtly the lamentable circumstaūces of her sorowful heuynesses in soo fewe wordis / Now here after we shall saye consequently that / that comynalte. and confusion of people alle bywepte / noble / vnnoble people. men wymmen and children fleeynge ensiwed Eneas soo berynge his fader as sayd ys It were a thynge inhumayne to be­holde theym wythoute pyte / but yet more pyetous to telle it lyke as it was doon in dede / This companye vnhappy yssued oute of a ryght goode and habundaūce place of all thynges concupyssible to thappetyte of theyr desire / And so mo­che incertayne after this dolourous excyle. in what regyon myghte happen the ende of theyr maleurouse and vnhappy destynees.

THis noble companye troian somtyme in reste / and now vacabonde and fugytyf by the feeldes dardanike came and aryued in a porte of the see named simoyiz[?] / and there ryght pencyf entred into the see. and by troblous[?] reuolucyons of the vn̄des or wawes were broughte into the Ile of Anchandron and passed thorugh the foreste of yde. whiche is in the sayd coūtrey of troye / And here we shall finysshe to speke of the sorowful and tedyous fleynge of the poure meschaūte and myserable troians / whiche hyder to hadde folowed Eneas / Eneas by force of oores. and of the wawes of the see / arryued in the royalme and coūtrey of Trace / lyke as the power of wynde after the dysposicyon of his destenye In to the said place hadde broughte hym. In the whiche place of Trace. Polydorus hadde be vylay­nously slayn by Plasmator kynge of the same Regyon of Trace ¶In this countrey of Trace. Eneas whiche hadde [Page] grete tresours of the rychesse of Troye / beganne to edyfye a cyte named Eneade. takynge it of his name. Neuertheles by cause that Eneas sawe the cyte by hym bygonne co­me not by the dyligence and operacyon of the werkemen to his perfeccyon / And that the sayd operacyon and dyffy­cyle werke myghte not in so shorte space of tyme to come to suche auaunsemente and perfectyon / wythoute the dyligen­ce. fauour / and goode wylle of his goddys / the whiche tha­ugh they hadde ben horryble and cruel and wythoute pyte to the troians to fore the confusion and vtter dystructyon of theyr noble and honorable cyte / Neuerthelesse in this caas partyculer they shewde theym selfe fauourable ynough / And entendynge to gyue comforte ayde and counseyl to thendemētes and engynes of the werkmen whiche the cyte Eneyde bylded and edifyed. And therfor wolde and dyspo­sed Eneas to halowe a daye prefyxed in makynge sacrify­ces to his goddis / after the solempnyte in suche a caas by the troians accustumed. And he hym selfe as prynce and example of his people slewe a white bulle as crystall to fo­re the face of his goddys / And of the bloode that yssued of the same wyth herte deuoute bysprange ryghte humbly and by grete loue and ardour of dylection the hostel vpon the whiche the goddis were sette:

¶How Eneas sacryfied to his goddis in the place whe­re Polydorus had be slayn: Capitulo. iijo.

NOw perauenture it happened that Eneas made the celebracyon of the sacrifyce to fore sayd in the selfe place / where as Polydorus hadde be slayne and buryed in the sonde / by the see syde: By the inhumanyte and wyckednesse of Plasmator / In whiche place there hadde be accumy­led or heped of sonde a lytyl hylle or mountycle / vpon whiche [Page] by the space of tyme / aboute eyghte or ix. yere were yssued oute of the erthe smalle busshes or lityll trees by humydite and hete depely enroted in the erthe. and vpon the lytyl hyl­le growen on heyghte. the whiche trees were named in frenshe murtyllers cornyllers. And on the side of the hille was an hye plotte so nyghe that it shadowed by grete space the place. where as was made the sayd sacryfyce: Thoo trees apperceyued by Eneas came thider in entencyon to cutte and hewe doun some of the bowes and braunches for to ap­paraylle / and make fayr the place of his sacrefyce / Lyke as we englysshe men doo whan we halowe ony solempnyte in the tyme of somer / In strowynge wyth herbes and settynge vp of grene trees and bowes in the chirches and chappellis for to refresshe the people there assembled. by cause of the fest & solempnyte there to be halowed

¶How Ene­as in makynge the forsayd sacrifyce. hewe the troncke of a tree / oute of the whiche yssued bloode: And how Poli­dorus declared the sygnyficacyon and the maner of the sayd myracle. and the wylle of the goddys Capm̄ iiij

ENeas thenne by ardeur of grete deuocyon and for affection that he hadde humbly to halowe this festyuyte as sayd is / toke an axe cuttynge on bothe sides And as I suppose it was after the facion of a glayue or guysarme / wyth whiche he hewe and smote doun wyth grete myghte those trees for to arraye and make fayr the sayd aulter. The whiche trees soo cutte and entamed by the sa­yd Eneas. yssued oute in an habondaunte cours a sourge of blacke bloode droppynge doun to the erthe / And on the same axe in manere of grete droppes of bloode. by whiche [Page] shewynge Eneas was gretly abasshed and dredefull mer­ueyllynge what thynge that myghte sygnyfye. And for to haue knowleche of this myracle and of alle the faytte therof. The sayd Eneas knelyd doun on bothe his knees bi grete humylyacyon of herte and deuoute affectyon. his hon­des Ioyned to fore the sayd aulter in makynge requeste vnto the troian goddys and to the goddys of the forestes. that they by theyr diuyne and ineffable inspyracyon wolde gyue to hym knowleche of this materyalle vysion / The whiche prayer ended and wythoute hauynge ansuer of the goddys troians by hym adoured and callid on / After by courage more haultayn wythoute ony proude thoughte / purposed in hym selfe to arache or plucke vp a gretter tree whiche was there whiche empesshed and [...]etted hym / by force. vygour / and naturalle myghte wythoute socoure of ony instrumente artifycyalle. And for to demeane this to effecte / Eneas sette thenne one knee vpon the sonde. and that other ayenste the branche growen and comen oute of the lytyll hylle where as was buryed Polydorus / And on that other side he toke the braunches of the sayd tree. and by grete myghte and bodyli strengthe / enforced his puyssaunce for to arache and plucke vp the same tree. Durynge the whiche efforte was herde a voys feble as of a persone alle sorowfulle and by­wepte / and nyghe alle faylled and deed. The whiche sayd alas Eneeas this is but lytyl prowesse to the to proue and excersice thy robuste puyssaunce ayenste a body pry­ued frome his lyf / or vpon a deed corps to take venge­aunce soo Inutyle / And by cause my ryghte dere bro­ther and my goode frende: I very sorowfull whiche so moche haue loued the whan the lyf was in me. and that the naturel hete of blood humayn comforte my membris & made [Page] theym vegytalle wyth sencyble moeuynges / I swere to the by the goddis whom thou seruest / & whom thou now in ꝑfo­ūde deuocyon hast requyred. that thou cease to trauaylle and poursiwe me deed: For herof I make the certayn / that I am Polydorus sone of Pryame kynge of Troye he lyuinge / whiche haue ben by cruel deth and trayson hidde & couerde vnder holy amyte. putte oute of this worlde by plasmator kyn­ge of this countree and regyon / For the auaryce Insacya­ble whiche was in hym. And that had hardynesse to com­myse and doo this cryme soo moche deffamed. and full of so excecrable cruelte arrettyd / O cursid and false deceyuable auaryce / whiche blyndeth the voluntees humayn / and ma­keth by his subtyl arte the ryche men suffretous and poure and ferther for to gete rychesse to commyse cryme and homyside by dampnable treason / And I Plyodorus ferthermore shewe and manyfeste to the / that the haboundaūce of bloode whiche thou haste seen yssue oute of the trees / whiche wol­deste haue cutte and plucked vp / is not orygynally of thyse trees / but the sayd trees haue taken theyr foūdemente and firste begynnynge of theyr rote in my body and by that mo­yen is the sayd bloode largely comen and hath aroused the erthe and yssued oute of my body and nowher ellis / And for this cause I the exhorte and counceylle / that thou ne defoylle no more thyn hondes wyth my bloode. And holde it by cause of my suster crusa the whiche was gyuen to the for wyf of my parentis and frendes in maryage /

ANd by cause that thou Eneas haste bygonne to edy­fye and bylde a newe cytee in this royalme of Trace in the perfection of the same thou procedyng hast now vpon ye grete materyall foūdements made bastelles of werke & ouuerage magnyfyke: but ye wyll of the goddis haue ordeyned [Page] and concluded by a counseyl emonge theym selfe. that this lande shall not receyue ne socoure the / But shalle be cha­sed and fugytyf fro Troye / but bi the sentence irreuocable of theym / is destenyed to the / the swete countrey of ytalye ful of fruytes / for there to be releued. And to comforte the myse­rable heuynesse whiche thou haste longe suffred▪ by cause of thyne exyle / Soo departe thou thenne fro this londe maculate and ful of fylthe and ordure by the blody faytte vppon me doon by the false and cruel Plasmator kynge of thys regyon / And goo thou in to the countrey whiche is ordey­ned for the and thyne by the prouidence benyuolence and prouysion of the goddis.

SO moche Polydorus hadde opened and declared to Eneas the secrete of his vysions / that eneas was surprysed wyth drede Inestymable alle in a traunce And soo abode a longe tyme ynough lyke a corps wythoute entendemente / And wythoute partycypacyon of sensi­tyf moeuynge. And for tymorysite and thyng not acustumed merueyllous & Insolute. as sayd is his tonge abode & clyued to the palate of his mouuth in suche manere / that durynge the langorous tyme. that polidorus tolde this vysion myserable. It was inpossyble to hym to excercyse thoffyce of his tongue to hym destynate by nature / neuertheles after that nature hadde stablysshed his wytte and spyritte and giuen to eche of theym faculte & power to excersice theyr offy­ce and wordes / The sayd Eneas ordeyned that the cause of Polydorus yssued of his bloode and genealogye sholde be restored and halowed honours funeralle / And to his god­dis make sacryfyces apperteynynge for to gete the grace of theym / that they myght rendre theym selfe benygne. mercyful / debonayr / and propyce vnto the helthe of polydorus

¶Thobsequyes of Polidorus Capm̄ v.

FOr the obsiquyes funerall of Polydorus to bryng to effecte so was the aulter establysshed for to halowe the sacrifyce / And therupon putte & sette the goddes of tro­ye / whiche were of colour sangueyn & reed. and eneas & his felaushyp̄ chosen by hym for to make and exhibete the sayd sacrefyce weren alle generally symple & enuyronned wyth bendes of his whiche enuyronned vnder the throte moun­tynge vppe to the temples bytwene their frontes & eres vnto the toppe of the heed / And vpon theyr hedes they had chapelettis of braūches of cypresse whiche grewe nygh the montycle or lityl hylle where as Polydorus was buryed / whi­che is a tree sacred and ordeyned to the ende that by the vehemente odour and swete smelle of the same tree maye surmounte the infecte odour of the caroynes of the dede bodyes / And the wymmen of Troye whiche had folowed Eneas whan he departed fro troye were tofore the sayd aulter with oure apparayll ne wythoute retchynge ought by theym sel­fe in ony wyse. For the sayd wymmen were alle dyssheuel­led or bare the heed makynge merueloyus synacles as the­yr custume was in that tyme in that coūtre also. and semed better wymmen oute of theyr wyttes than porueyd of coūte­¶naūce or constaūce

For ye cōsōmaciō of the said sacrifyce eneas ordeyned to take many cymphes yt ben vessels ordeyned for to make suche sacrifyce. & ben in maner of lityl bokettis or lytyl shippes of a strange stone. & of dyuerse colours / as iaspre porphire / of whiche som were full of blood of bestis sa­crefyed & other ful of mylke clere & clene / the whiche vessellis in habūdaūce of deuocōn. they cam about ye sayd mōtycle or lityl hill of polidorus / in recomēdyng ye sayd polidorus to [Page] the debonnayr clemence and mercyful iustyce of the goddis

THenne Eneas and all his sequele made theym redy for to accomplysshe & leue the sayd coūtrey of Trase by the admonestement of the sayd Polydorus sone of pry­ame kynge of Troye / mounted vpon the see. And was there longe and mauy dayes / Soo thenne we shall leue to speke of Eneas / And shalle retorne to speke of dydo / And firste to shewe the dyfference of Iohn bochace and of vyrgyle. to putte in bryef the falle of the sayd dydo recounted by bo­chace / and after by the sayd virgyle

¶Here bigynneth thistorye. how dydo departed from ye coūtrey ¶ca.. vjo.

That other daye in passyng tyme I r [...]dde the fall of noblys / of whom Ihon̄ bochace hath spoken & in brief ye aduētures of fortune harde & dyuersly excecrable / & in all de­structyue of theyr personis / honoures / goddes / & chyuaūches of whom the sōme haue ben cause of ther harme & euyl & of the distruccōn of whiche some be yet. and how be it that thei ben pourueyd moche more yt it apperteyneth to theym seen theyr scyence prowesse vaillyātyse or seruyce after the state & their vocacōn in the whiche eche ought to holde & be cōtent like as saith thappostle wythout doyng grief or ony nuysaū ce / ne to bere dōmage ne myssaye ony other / this notwystō ­dyng alwaye they be in awayte / & delite themselfe to seche often tymes meanes for to grieue & to saye wordes detrac­tiues / wherof foloweth ye perdycōn of moche peple & of them selfe in the ende / whiche therin haue medeled ¶And af­ter certayne space I hadde been in beholdynge the peryllous aduentures / and fortunes ryghte sorowfulle / of many kyn­ges: prynces. or knyghtes and many other / I fonde the falle of dydo somtyme quene and foū [...]resse of the noble cyte [Page] of cartage. the whiche in redynge I was abasshed and had grete merueylle / how bochace whiche is an auctour so gretly renōmed hath transposed or atte leste dyuersifyed the falle and caas otherwyse than vyrgyle hath in his fourth booke of Eneydos / In whiche he hath not rendred the reason / or made ony decysion to approue better the his than that other And yf ony wolde excuse hym and saye that he hadde doon hit for better to kepe thonour of wymmen. And wolde not treate ne saye thynge of theym dyshoneste. but that myghte be to theyr auaūcemente ¶This reason hath noo place: For he hath putte in many places other grete falles ouer­moche infamous of some quenes and ladyes / and hath not suffyced to hym to speke alle in generall. but hath made ex­presse chapytres / In blamynge the complexions of theym By the whiche partyculerly he sheweth the dyssolucyons and peruerse condycyons that ben in the sexe femynyne / And for to shewe euydently vpon the sayd caas and falle the dyfference whiche is of vyrgyle and of bocace. I haue enterprysed to shewe alle a longe the texte of vyrgyle / The causes and occasions of the laste extynctyon and dolouro­us deth and despyte of the renōmee of dydo otherwyse cal­lyd or named Elysse or Fenyce ¶But fyrste and to fore for better and to vnderstande the mater I haue purposed to recyte here the caas / and falle after the oppynyon of Iohn bocace. whiche sayth as here after shall ensiewe and folowe

YF In ony maner fayth oughte to be adiousted vnto the wrytynges and dyctes of olde and auncyen­te cronycles or historyers / Or to theyr letters crony­kes and historyes / Vnneth maye men fynde ony of soo­grete langage ¶And dygne to yeue magnyfycence / [Page] and somoche deuyne [...] nōmee / as to the hye name of Feny­ce / wherof the rayson maye be this / how be it that thauctour putte not precysely dedycte wythoute texte / by cause that the Fenyces were the fyrst Inuentours of carecteris dyfferencyng that one fro that other▪ of whiche were fourmed lettres for to write & redyng in remembarūce perpetual. ye thynges that they desireden to late be knowen to theyr frendis / or otherwyse for the conseruacyon of theyr dedes / fayttes. & scyences / to thende that they myghte reduyce in souuenaūce or remembraūce. by thynspection and lecture of theyr wry­tyngys. that whiche by lengthe of tyme & debylyte of enten­dement sholde be wythdrawen / Or otherwyse sholde haue be forgoten it and put in oublyaūce. that the fenyces fonde to note wyth rede colour or ynke firste the sayd lettres / of whiche our bokes ben gretely decorate. socoured & made fayr. We wryte the grete and firste capytall lettres of our volumes bookes and chapytres wyth the taynture of reed coloure:

THe name thenne and royalme of Fenyce hath be moche hiely decored by merueyllous artes / and my­ryfyke / In ioyouse preysynge and laude wherof the clerenes and fame of his ouurages hath ben dyuulged & shewed vnto the laste clymate of bondes habited wyth lyg­nage royalle ¶Oute of the whiche Fenyce and prosapye auncyenne / as it is to byleue by theyr wrytynges / yssued a kynge named Belus / After the dethe of whome / one his sone named pygmaleon succeded hym / And obteyned the royalme of the Fenyces ¶He hadde also a doughter named Elysse. whiche afterwarde was named dydo & was maryed to one named Acerbe / otherwyse called Sychee his vncle was preest of hercules honoured wel in the royame of thy­re. [Page] and the gretest of alle the coūtreye after the kyng of the same / This gentylman was moche fayr to byholde yonge / & playsaūt of grete reuerence / ryght honorable emonge them of the coūtre / of grete audacyte / and of name magnyfyque ryght moche byloued of Elysse / Thenne his wyf. whiche thenne he loued also moche of fyne loue wythout fayntasie whiche sone after fayled by his deth anguysshous. wherof then̄e it happed after the Iugemente that to hym was for­tunat / that he was so brenewrous that he was emonge all other estemed to be most in Ioye & gladnes. consideryng the beaute and bounte of dydo his wyf. And also of grete ry­chesses / of whiche Acerbe otherwyse callyd Sychee was moche endowed & hadde preemynence in ryght grete habunda­ūce:

BY the couetyse of whiche goodes & rychesses / pygmalyon brother of Elysse and kynge of the coūtrey was sore esprysed / For whiche cause the deth was conspyred of the fayr Sychee. the sayd pygmalyon thynkynge in hymselfe to doo slee hym. And by this moyen he sholde attayne to thende of his desire & wyll insacyable and full of couetyse. And soo to hym selfe he sholde alle vsurpe his grete & Innumerable rychesses / and lyke as he thought / he dyd / and dyd do slee Acerbe or Sychee / Thenne dydo his swete & amyable spouse & wyf bare it moche inpacyentli and sorowfully / & in suche anguysshe of herte / that she swowned syncopysed & syghed / And oute of her fayr swete eyen / & tendre flowed teeris assyduatly and contynuelly. that they better semed two grete sourges wellynge vp grete affluence of teerys. whi­che ranne doun by hir fayr & freshe vylage / And thus the sayd dydo suffred grete payne for the grete and harde sygh­ynges & heuynesses. by cause of ye grete horriyle / nephande / & [Page] detestable cryme. perpetred and commysed in the persone of sychee her swete and late amyable husbonde / longe tyme de­meaned she suche clamours wythoute ony hope euer other­wyse to lyue. And alwaye she considerynge the causes of the sayd cryme / and the couetyse of her sayd brother pygma­lyon / And that many tymes by dremes and other admonestements was ofte tymes incyted and coūseylled to seche some place sure and secrete / And thenne of thobeyssaunce of the sayd pygmalyon / for the surete of hir persone she comened wyth the prynces of the same contrey & specyally wyth the pryncipall whiche hadde be frendes of Sychee late hir husbonde / and shewed to theym the causes by the whiche she hadde conceyued this grete hate ayenste her brother pygma­lyon / whom she drewe to her part and side. and were content to doo alle that / whiche by hir sholde be aduysed / for to wyth­stande the cursed enterpryse of hir sayd broder. whiche had concluded in him selfe and to fore thought / Thenne sone after a wyke. Elysse faynynge that she ne myghte no lenger duelle in the hous of Acerbe late her husbonde. by cause that she was ouermoche moleste and greued by recordynge continuel in rememarbūce pietous of the swete mayntene and semblaūce of the sayd Sychee her preteryte husbonde. But she incyted. frequented ofte the places in whiche she had fir­ste seen her true frende and loue sichee / And therfore wyth alle the hauoyr and other goodis of the sayd Acerbe that he posseded in his lyfe ryght gladly she welde dispose hir self to goo vnto the royame of fenyce the coūtrey of her nayssaūce and byrthe vnto pygmalion hir brother / whiche whan he herde of it was moche Ioyous / supposy [...]gē by that moyen to come to his insacyable and cursyd auaryce / for to ha­ue all the rychesses & other grodes to fore sayd. Forthwyth [Page] [...] [Page] [...] [Page] the sayd pygmalyon sente vnto his suster dydo a flote of shyppes well manned and garnysshed for to brynge wyth her the goodes. and rychesses of the sayd royame of Thir in to fenyce vnto hym / But dydo by other barate as she then hadde ordeyned / and that alwaye thoughte to eschewe and gaynstonde the fraude of hir sayd broder: toke and hydde priuely in a certeyn place of her shippe alle the grete tresours & hauoyrs of hir sayd somtyme husbonde sichee. And in the place where they were she sette many sackes full of brasse & coper. the whiche alle manyfestely or openly in the presence of alle hir people. whiche supposed thenne / that it hadde ben the tresour of her late husbonde / And dyd it to betaken from thens and to carye and bere hit to the shippe at euyn wyth thoo people whiche to fore is made mencyon / And the mes­sagers of the sayd kynge pygmalyon whiche were comen to fetche hir / mounted vpon the sayd shyppe for to goo in to fenyce. And whan they were well on the waye oute of the lande in the hye see. she cōmaunded to caste oute the sackes of brasse and coper / where they in the ship hadde suppo­sed that it hadde ben the tresours that she broughte wyth her And that doon she sayd to theym wepynge these incitatyf wordes. Dere felawes and frendes of our nauye / I doubte nothynge but that ye haue the wylle for taccomplysshe that whiche I commaūde you / whythoute to aske or wyll to knowe ony wyse this whiche ye haue doon / But for to saye & telle to you the cause whiche haue moeued me thus to doo I haue moche lieuer to haue loste alle the richesses of Acerbe late my frende & husbond. the whiche ye haue now drowned wythin the bely of the see / than I sholde delyuer theym in to the handes of the ryght cruel kynge Pygmalyon my brother. for the whiche rychesses to hane of me / after that he [Page] hath taken the lyf awaye fro my swete and true husbonde he hath sente you hider for to brynge me to hym wyth his shi­ppes / And therfore thynke veryli that it bihoueth you pre­senly to doo and holde me companye. or ells deye / or flee from hym / ye hane knowen ynoughe his grete and cursid auaryce. And how he hath doo slee Acerbe or Syche my late hus­bonde for to haue of him his tresours. wherfor I doubte not that now after the rychesses loste yf we goo to hym / he shall be soo surprysed wyth angre and furyouse woodnes / whan he shall see hym selfe soo deceyued & put fro his entente that he shall moche sore tormente vs / and at thende[?] put vs to de­the. the whiche sith that he hath wythdrawen & taken awa­ye hym / whiche was alle my wele / I shalle take it in gree & gladly. But I haue compassyon of you. whiche in this caas haue no culpe ne blame / of the grieuous paynes & myse­rable tormentes of whiche he shall make you to haue by afflyctyon / And therfore late vs treate by one acorde / yf ye wylle flee from the coūtrey of my brother wyth me / and es­chewe his gret furour / I shall abandoune my lyf wyth you my good cytezeyns whiche be here in dangeour of mysera­ble deth / And offre my selfe to brynge & conducte you in to some other place of surete. where as we shall lyue more at our ease. in places of Ioyous dwellynge. wythoute to haue more drede of hym / ne of the grete doubte & fere of his cruel tyrannye / thus were moeued & attyred by thexhortacyon of dydo & her swete monicyons and pyetous prayers / alle the maronners of one accorde wyth alle the other in the shippe How wel it was to theym moche harde a thynge to habandoune & leue the swete coūtrey of theyr natiuyte / Alle that notwythstādyng they accorded & greed to doo all hir wyll / & the prores or forship whiche lay toward the coūtre of thir[?] [Page] tourned anone towarde the royame of Cypre for to goo in to that countrey / There fonde they the preste of Iubyter wyth his wyf and alle his meyne vaticynaūte of prophecyeng thynges moche merueyllous. in pronostycacyon righte happy of their fleeynge and voyage. the whiche wyth his wyf and meynage wente anone wyth theym. and not knowynge in to what countrey for to soiourne and passe forthe theyr yongthe in some place of peas and of surete for to abide. Also to thende that their name perysshe not wythoute re­membraūce for faulte of lygnee / And a while they abode in the countree / whiche were well pleased wyth theyr conuersacyon. and maryages of theyr doughters to theym in esche­wynge to falle in to olde age. not socoured wyth chidren & maynage / whiche sholde yssue of theyr lygnage for tenhabyte the countrey and maintene theyr name and remembraū ­ce perpetuel / And in conclusion they decended from their shippes to the lande. and at the ryuage of the same they toke in dede lxx maydens. and anone putte theym in to their shippes the whiche after the custome auncyen of the cypriens thi­der comen receyued for to wynne ye duete of maryage wyth men of alle coūtreys and nacyons that thider came fro alle partyes / And syth after made festes and sacryfices to ve­nus the goddesse. For after durynge their maryage / to be obserued holden and kepte chaste alle the tyme of theyr lyf. as yf they offred to the sayd venus theyr laste sacrifyces & ob­sequyes for to goo oute fro hir subiectyon. and to be from her exempte from thenne forthon:

¶How dydo arryued in Lybye a straunge countrey and boughte as moche londe or grounde / as she myghte conteyne wythin the space of the hide of an oxe. in whiche she buylded and edyfied the cyte of Cartage / Capm̄ vij

[Page]ANd from thens departed dydo wyth alle hir nauye in passynge the see. and alwaye wythdrawynge fro the sayd londe of fenyce arryued vpon the ryuage of affryque for to repayre hir shyppes / And there boughte of thynhabi­taūtis of the same countrey as moche lande or groūde / as she myghte enuyronne wyth the hide of an oxe / whiche dyd doo corroye well. and after dyd doo cutte hit soo in a thonge so smalle and longe that she enuyronned moche more quantyce of the grounde of the sayd countrey than the Inhaby­tantes sellars supposed sholde euer haue ben. In the sayd place durynge the tyme that dydo and her felawshyp̄. whiche by longe tyme hadde ben in grete trauaylle vpon the see / why­che moche hadde greued theym. and throwen theym in mani dyuerse coūtreys were thenne vnder the proteccyon and swete reconsilyacyon & rest / they dyd doo repayre theyr nauyre / & sette it wyth / grete peyne alle in poynte wyth alle thynges to theym necessarye. Thenne thenhabytan̄s and theyr neyghbours by / began to treate wyth theym curtoysly. and ofte vysited theym wythoute to doo to theym ony grief / moleste or thynge that oughte to dysplease theym / but wyth all gre and frendlynes wythoute puttynge on theym lothlynes as straūgers. They of the coūtree byganne to holde parlyamente wyth theym. and toke amytyes & alyaūce wyth theym / & admynystred to theym marchaūdyses. and dyd alle other thynges. whiche is acustumed to be doon bytwene neyghbours and good frendes: Thenne dydo & hir barons seeyng the fruytful dysposicyon and bounte of the sayd place se­med to theym that they oughte to make an ende of their fuy­te or fleeynge / and anone elysse or dydo to theym dyscouerde the fraude that she had don / & shewed wherfore she had throwen in to the see the sackes a forsayd ful of brasse & coper / se­mynge [Page] that hit had ben the tresour of Sychee her late hus­bonde / whiche thenne she shewed to theym. wherof then they were moche Ioyous & gretly encoraged wyth goode hope / & concluded anone to buylde & edefye a newe cyte there / And caste & toke the foūdement for to make a cyte there / and there they aboode all to gyder / And in soo makyng they fonde wythin the grounde in diggyng to make the foūdementes the hed of an horse. whiche gaaf to theym hardynes / coura­ge & destyne to preysinge of the place to be propyce and ac­ceptable. the whiche was then̄e purposed to be closed & enuyro [...]ned wyth wallis autentyke / And the cyte was named as some saye Cartage by cause that the cyrcuyte of the place was enuyronned wyth the thonge of a skynne or hyde as to fore is sayd. And the castell of the toun was named brose takynge his name of the hide of an oxe / whiche they hof Tir called burse▪

THis cyte in shorte espace for the cōmodytees of the sa­me. and situacyon plentyuoꝰ was strongly enhabited wyth moche folke & peple / Of whom dydo was lady & que­ne. and gaaf to theym lawes & manere of lyuynge and gouernaūce of goode maners / & admynystred entiere iustyce to hir subgettis / in hir housholde & menaige / she mayntened her ryght honestly / And the purpose of hir holy chastite she en­terteyned & kepte wythoute to breke it / thus then̄e elysse presidente as quene ouer all the people / cam to hir entente desi­red / & in stede of wepynges vnmesurable sorowe whiche she had suffrid & had ben in gret afflyction in Thir for the ne­phāde deth of hir sayd somtyme husbond / she was in ye place of cartage wel adourned of vertues / wherof then̄e hir good fame & renomee florysshyng shone & resplendysshed merueyllously in the coūtreys circūiacent & neyghbours in suche wyse [Page] that they whiche had lyued after the maner of that coū ­tree. whiche was all dissonaūt & dishoneste in regarde of yt of dydo. toke the guyse / the facons / & the industries of the cartagyons in leuyng their aūcyent customes / whiche anō after vanysshed awaye as thei neuer had be vsed / But this notwythstōdynge. fortune inpacyente whiche maye not suffre the pesone longe to dwelle prosperous / ne good werkes wythout enuye / sette & imposed vnder the feet of the righte chaste quene thyng slypper & lubrik for to make hir to ouerthrowe. & to brynge hir in to exyle lacrymable fro the place where hir glorye & exaltacōn ought to be replenysshed encre­ased & manyfested. for lyke as euery daye the beaulte chastyte & prudence augmented vnto all nacōns straūgers ferre & nyghe / and the delectable name of hir cyte grewe & reysed in praysing / A certayn kyng of the musitaynes or momydes neyghbour to that coūtrey was right feruently esprised in ye loue of this quene then̄e beyng wydowe / as sayd is of hir firste husbond sychee / and sente to some prynces of that cyte whom he requyred to haue this quene dydo in maryage / sayenge by grete menaces yf he had her not / that he sholde reduce that cyte into ruyne. & sholde put all the people therof in to exyle / This thyng seenge the sayd prynces & knowyng the ferme purpos permanable. whiche ye quene had to ēterteyne hir pudyque chastyte in perpetuall wydowhed / durst not at ye firste manyfeste the petycion & desire of the sayd kyng. but by subtyl meanes ētendyng to drawe from hir som wordes seruynge to theyr entencōn / & vpon the whiche they myghte fynde foūdement & rayson indycatyf for to moeue therto the sayd dydo / they reported to hir yt the kynge for to lede a lyfe more honeste / demaūded them for to haue some prynce of thyre or thyrayn / for tenstructe hym in doctrynes & good ma­ners [Page] & condycyons to lyue after the manere of theyr coūtre whiche to hym semed more honest & aggreable than his ow­ne / whiche for to doo they knew no man cōuenyent & ꝓpyce for so moche that none of the coūtrey but yf he were cōstrey­ned wolde leue his owne londe for to goo vnto suche a kynge that vsed so vyle / terryble & straūge lyf And alwaye yf ther wente none to hym / he menaced and thretenyd to make warre & fyght wyth theym. wherof myght falle other daū ­ger & grete peryl to their newe cyte. The whiche prynces the quene repreued / shewynge to theym that for one man onely ought not be cause to lose all thother & to habandoūe theyr coūtrey & lyf accustomed. and to vse suche as beestes sauage doo as werkes synystres & barbaires / O right good cyteze­yns. yf it happened that one muste deye for the salute & wele of your coūtrey. be ye not cōcluded so to doo & suffre / For he is right vnhappy that for his partyculer wele wyll leue ye publike & comyn wele / & contrary wyse he is blessyd that Ieo­pardeth hym to the deth for ye comen wele of his coūtrey:

¶How a kyng neyghbour to cartage dyde demaūde to wyfe the fayr dydo quene yf Cartage. the whiche for the loue of hir late husbond had lieuer to slee her selfe. than to take the sayd kynge. Capitulo. viij

ANd thenne seeyng the sayd wordes seruynge right wel to theyr purpoos & to hir preiudyce / Notefyden vnto the quene / how the sayd kyng had requyred her in maryage / and had made to theym the sayd menaces / in caas yt they wolde not soo accorde to hym. The whiche knowleche to be achieued in the sentence by her pronoūced. And that she her selfe was cause of her perdicyon. byganne moche strong­ly inflegyble lamentacyon to calle longe by dolour and [Page] excessyue sorowe the swete name of Acerbe hir preterit hus­bond / But in the ende they hadde determyned consyderynge that hit myghte be none other wyse. but she muste promyse to make this maryage / the whiche she accorded to theym and helde for gre [...]ble / And demaunded Induces and space of thre monethes. In whiche tyme she sholde doo her dylygence for to accomplysshe alle theyr wylles / In this tyme du­rynge as it maye be presupposed yf ony deffence was in the cyte whiche was not sette and ordeyned in couenable fortyfycacyon / She dyde it incontynente to be sette in poynt And after this she blamed longe her beaulte in cursyng it by grete execracyon wyth the grete enuye that fortune hadde vpon her and the Ioyous aduentures and prospero­us whiche were in late tyme comen to her / So that the grete playsaunce whiche she hadde taken with the swete reste of her thoughte / in whiche that she had repelled thauaryce of hir brother. by her well happy fleeying. and her noble cyte edyfied newely / whiche thenne was accomplysshid & wyth grete people enhabyted alle subgette and obeyssaūt vnto the lawes of her seygnorye / thenne conuerted and chaunged in to grete anguysshe myserable. After whan the terme of thre monethis approched. the lady whiche was falle ayen in la­crymous and playnynge sorowes whiche she had hadde in tyme passed for the deth of Sychee her somtyme husbonde. Dyde doo hewe doun and gader to gyder a ryght grete mul­tytude of busshes and woode / for to make a cruel fyre ter­ryble and merueyllous in the hieste place of the cyte / and faynynge to make sacryfyce in the pyetous commemo­racyon playsaunte to the pryue goddys for the laste obsequyes of the funeralle seruyce of Acerbe of Sychee her sayd husbonde. In payenge the extreme tribute [Page] of remembraunce yteratyue / ne other wyse in ony maner the fagottis or woode clouen and broken / toke the swer­de in hir honde. & mounted vp alle on hie vpon the woode redy for to sette on fire. in the presence of all the peple. byhol­dyng by grete admyracyon. what she wold doo. bigan to say my ryght good citezeyns after your ordynaūce I goo to the [...]n. that is to saye that she was disposed to goo & marye her to the kyng fornamed / & sodaynly all attones she lete her selfe falle vpon the poynt of the swerde / whiche termyned & ended in that hour hir lyf. Thenne for the deth & hir īnocente blood whiche maculate & bysprange all theym that stode by she [...]tyrped all thynges sinystre whiche had mowe torne in prudyce of the cyte & peple of cartage. for the reffuse of ye sa­me maryage / yf any wolde haue gaynsayd it / The whiche thyng seenge they of cartage cōsideryng the charge soo cruel whiche the sayd sorowful lady had suffred for to kepe hir cyte & cytezeyns vnhurt & exempt from oppressyōs of ye peple barbaryke / in whom they were subcōbed bi cause of the sayd mariage yf ony had be made / maden grete wepynges & right long lamentacōns in lacrymous playntis syghynges bywaylienges & other sorowfull wordes Then̄e all the peple were cōcluded & brought to. by cause of the deth of theyr quene dydo / bywayllyng & halowyng funerall exequyes conty­nuel by many dayes / longe tyme after bi grete waillynges inpyetous remembraūce of theyr ryght goode quene / whom they callyd from then̄e forth on moder of theyr coūtrey / & enforced theym to attribute all honours humaynes & deuynes by manere of the cruelte of hir deth / whiche hath broughte thynges welle fortuned to the prosperous lyf of hir cyte­zyns was by theym in pyetous commemoracyon recom­pensed / And after that they hadde ryght affectuously [Page] recōmaūded her vnto the souerayn goddis and inferyours / that she myghte be blessyd as longe as cartage sholde abyde inuyncyble / And they shold make temples & aultres dedy­ed & halowed in hir name / In whiche she sholde be enbraced & honowred as a goddesse

¶A comendacyon to dydo: Capm̄ ix

O the fortytude viryle of wymmen. or loos & pryce of chastyte femynyne digne & worthi of honour celebre­ed & magnyfied in grete loange & preysynge wythoute ende perpetuel. thou louest & haste lieuer to submyse to fortune aduenturous of deth cruel for to kepe thy pudyke chastyte vnhurte wythoute ony spotte / than to rendre or yelde thy selfe in applycacōn of lyf perysshable to dyshonoure ne to make foul the holy purpose of thy castymonye by thūtrue note of lubryke & slypper luxurye / O quene / ryght venerable. wyth one onely stroke / thou haste wylled to termyne and fynysshe thy labours mortall / By whiche thou hast goten fame & renōmee eternal of the grete kyng barbaryn / by whom he is repressed fro his lybidynous desire / the coūtrey is in surety de­lyuerd from bataylle by thy ryght dolorouse deth. whiche hathe quenched the playsaūt fygure of thy grete beaulte. by thy fruytful deth & placable to thenhabytants of thy noble cyte hast distylled the blood resplendysshan̄t yssuynge alle oute of thy beeste chast & not corrupte in tytle flourysshynge of thy loange / preysynge / & good renōmee of whom the spyrite by thy lyf fynysshed so moche made fair wyth sorow myrifyke was trāslated to the sieges & cōtrees therto ordeyned af­ter thi demerites / To the thenne in all affection crayntyue I addresse my thoughte deprecatyue / Yf in ony wyse that haste strengthe or puyssaunce towarde the goddys of hyghe magestye in theyr pryue mansyon whyche for [Page] the wylle some thynge ded / that it maye playse the to enten­de to the correction of the maners lubryke / Inconstaūte and euyl of our matrones inpudike and folyshe / and to rendre theym from theyr lacyuyte in to pudike / mystike. and shamefaste chastyte / and in to benygne & very obedyence. so moche that they abyde wyth the / in thy name and fame ve­nerable / The whiche wythoute ende knowyng eternelly we maye see by thy merytes thoneste of chaste clennesse mater­nalle to be augmented & growe in honour

THe whiche caas here presupposed is in accordaunce ynoughe. whiche speketh of the lygnage and mary­age of dydo / Of the deth also perpetred by pygmaly­on kynge of Thir in the persone of Sychee firste husbonde of the sayd Elysse or dydo. And after of her departynge / of the maner of doynge. How after she bare awaye the treso­urs of her somtyme husbonde Acerbe. and of her comynge in to Lybye vpon the ryuage of the see in the place where she byganne firste to edyfye Cartage. And of the fortunes aduenturouse whiche happened in that soo makynge that byfelle to her and to theym of theyr companye ¶But for to shewe the difference that I fynde of the deth of the sayd dydo / I shall reherce here after now in a nother maner. whi­che is to be presupposed was moeued of the grete hate & euil wyll that Iune the goddesse cōceyued ayenst parys / his frē dis parents / & alyes. and by cause of ouer sodayn iugemēt yt he made / whan he gaaf thapple to venꝰ as the moste fayrest of theym all / & to him holden & moost dere. bycause of whiche bate / whan eneas sone of venus & nygh kynnesman of paris wold departe from troye / after the siege of ye same. for to goo into the cōquest of the prouynce of ytaly to hym ꝓmysed by the goddis at request of his moder & Iuno ye ryght noble [Page] goddesse wyllynge tempesshe and lette his gooynge / dyd doo calle and assemble yolus and Neptunus goddis of the wyndes and of the see prayenge & exhortynge theym moche swetely that it myghte playse eche of theym to putte theym in payne & doo theyr deuoyr to empesshe the goynge of the sayd enterpryse. and makynge to breke and destroye alle the na­uye in plongynge vnder the water and parellys ayenst the roches for hastely to drowne and destroye alle the hooste of Enee the sone of venus. whiche enforced hym to make werre in the goode royalme of ytalye. whiche was in his desire pryncypally aboue alle other. In whiche thynge soo doynge she wolde rewarde theym wyth suche guerdons as apperteyneth to grete and hie goddys to be stypended / and shall doo honoure to theyr frendes / and treate theyr lygnage and ve­ray alyes / and socoure theym wyth alle hir myghte / whiche that the goddys hadde graunted to hir right gladly. And they made theyr preperacyon eueryche in his regyon / for to warre vpon Eneas:

¶How Iuno for tempesshe thooste of Eneas whiche wolde haue goon in to ytalye / prayd the goddys of wyndes / that eueryche by hym selfe sholde make concussyon and tormente in the ayer Capitulo. xo.

ENeas thenne sailynge bi the see. was recountred by yolus. whiche smote wythin the saylles grete assa­ultes. effortes & bataylles in many maners / And made to come the foure windes to gyder / one ayenst another wyth all theyr sequele / Of whom was surprysed all the nauye and terryble troubled ¶There myghte ye see sayles rente. Cordes and ropes broken. And crampons of yron wrythen a sondre and plucked oute. the shyppes [Page] & vassaylles lyfte vppe highe in the ayer / and after plūged in the see in suche wyse that neuer was seen suche a merue­ylle / On that other syde cam vpon theym Neptunus wyth all his vorages & wawes alle full of scume / as a wulfe enraged brayeng in the botome of the see. his grete gulle or throte wyde opene / redy to swolowe & to deuoure alle tho­oste cryenge & brayenge vnder the shippes temppestes horrible of the woode see / oute of whome yssued in to thayer on hie a clowde. and after decended impetuously vpon the flote whiche semed somtyme alle to be drowned & couerde wyth water / And anone after they were lyfte vp on hie wyth the wawes / whiche sodaynly braken & departe / that alle the nauye descended nyghe to the bottom of the see / whiche were a­none recuyelled by other wawes & remysed in a momente vp on highe / and separed & transported in to dyuerse places And in dyuerse wyses were tormented wythoute hope of socours / Longe tyme dured this troublous tormente / whi­che caused grete fere & drede vnto the coūtreys nygh neygh­bours & also ferre of. This assemblee the whiche after grete losse & perdicyon. as well of Anchises fader of Eneas as other dyuerse / and also fortunes whiche longe be to recyte passed / The nauye arryued almoste alle to broken vpon the coste of the see of lybye nygh the sayd place of Cartage / whiche Elysse dyd doo edyfie / by grete and subtyll moyens. of the whiche I passe ouer / And in descendynge and comynge a lande in to that countrey. was reculed and re­ceyued by dydo. And opteyned her grace for to soiourne for to refresshe alle his people and his nauie ¶In whi­che doynge he toke grete acqueyntaunce / and ofte repay­red vnto the palays / and wyth the ladyes byhaued him soo queyntli swete. and curtoys / plesaunte and amyable [Page] fayr and wel byspoken / merueyllous hardy in fayttes / a grete enterpryser. loued of alle men & preysed of his peo­ple / he was moche noble / and a ryght fayr persone. by cause wherof dydo toke grete playsir in his conuersacyon / and de­uysed wyth hym moche gladely / wherof folowed that she was greuously hurte wyth the darte of loue / And the wo­unde nourysshed by longe tyme enbraced wyth the swete assemble inuyncible in hyr stomacke. considerynge the grete vertues of whiche his persone was decorate / his noblenes & honour of the peple of Troye / his grete beaulte & swete langage / whiche she ēprynted in her remembraūce / that her membres refuseden the swete reste of slepe / And kepte this thoughte in her selfe by ryght longe tyme in suche a wyse / that in a mornynge / after that the lyghte of the daye rebouted & putte a backe the shadowe of the nyghte aboute the lampe / and the sonne rysen for to shyne on the erthe.

¶How dydo coūseyllid wyth hir suster anne: Capm̄ xj

THis lady bythoughte herselfe and purposed to dysco­ure and manyfeste her faytte vnto one hir suster whiche was named in that tyme Anne sayenge to hir in this manere / Anne my suster and frende I am in ryght gret thoughte strongely troubled and incyted / by dremes admones­ted whiche excyte my courage tenquire the maners & lygnage of this man thus valyaūt / strong / & puyssaūt / whiche deliteth hym strongly to speke / in deuysing the hie fayttes of armes & perillys daūgerous whiche he sayth to haue passed / ne weli hither comyn to soiourne in our coūtreys. I am so persuaded of grete admonestments that all my entēdement is obfusked / endullyd and rauysshed / I byleue certaynly that the man of whome I speke to you ys nyghe kynne and pa­rent of ye goddis / or that verytable by one comyn assētmente [Page] they haue assembled theym selfe to destyne his birthe in de­lyuerynge and gyuyng to hym allone alle the highe vertu­ouse yeftes. whiche nature hath of custume partyculerly to yeue to dyuerse creatures / and maye be supposed that she hathe produced hym in excellent dygnyte. for to make one fayer chief werke / to thexemplayre of alle other / For they whiche ben borne of basse parentage. ben ouer moche ferdeful & conuerte in theyr fayttes / and drede theym fleynge and kepe theym oute of the palayces & courtes of grete lordes / And yf it happen theym to entre. anone they retourne or hide the­ym in corners vnder the tapytes or byhinde the grete fote of the ya [...]e for to yssue and goo oute first wythoute makyng ony bruyt or medlynge ne seche nothyng but thyssue for to flee. yf there were ony medlee / ne neuer by theym was there ony valyan̄ce proued as it is sayd / But god forbede that it may be sayd of Eneas that fortune vaynquyssheur of gre­te bataylles comynge to the chief of alle enterpryses to haue reproche by ony of our sayd wordes / For yf it that ne were that I haue purposed fermely in my courage to abyde and be in wydowhede alle the tyme of my lyf / after the deth dolo­urouse & cursid of my somtyme husbonde Sychee. whiche bare awaye my firste loue wyth hym / whan he was leyde vnder therthe. by thenuyous remors & greuous remembra­ūce of my passed maryage. wherin I haue had so many go­odes of honour and of curtosie. of whome the remembraūce sleeth me & scourgeth me alway / I sholde lyghtly haue consē ted to thallyaūce of this man. Anne I confesse for trouth that sith the myserable deth of Sycheus & wycked to saye cōmysed in the hous of my broder / of whiche the goddys be alle maculate / This man onely hath molyfyed my wyttes and perturbed the corage of myn opynyon firste. and hathe [Page] reduced to remembraūce the delycyouse traces of myn aun­cyent loue. But not for that / I desire and wysshe that erste thabysme of thobscure erthe swolowe me / or the grete fader almyghty to plonge and submerge me vnder the botomes of the depe palusshe infernalle rather than to my pudyque chastyte sholde be doon by me ony wronge ne vyolence / nor that thy ryght I sholde contrarye nor breke for no thynge that euer can happe to me by no maner wyse in thys worlde / Alas he that me spoused firste / hath my loue entierly wyth hym / wherof inreuocable a yefte I doo make to hym. soo byseche I hym to kepe hit wele wythin his graue vnder the colde marbyl stone. and not to be separed from his soule This requeste sighynge made she to hym / and tendrely we­pynge called ayen the olde sorowe. whiche smote and woū ­ded her to the herte. so moche that the bosome of that sorow­ful lady was entyerly replenysshed alle wyth teeres:

¶Thansuer of Annne to hir suster dydo Capm̄ xij

THan Anne her benygne suster / hauynge pyte of her sorowe. consideringe the waye salutary to reuerte so­one her sorow in to gladnesse / sayd to hir in this manere. O suster more loued of me. than the lyghte illumyned wyth grete bryghtnes / How haste thou determyned to lyue alone consumyng thyn yongthe in perpetuall heuynesse. remembre the of the swete dysportynges. the grete consolacions and Ioyfull playsures wherby the children reioyisshen their mo­ders / the swete kysshynges and the fayr pase tyme that they take therat / Also the ioye and consolacyon that the men do­on to theyr swete spouses. putte awaye this sorowe thees lamentacyons. thees grete sighynges and sorowful teeres take ayen corage and make thy selfe ferme wyth hope / Troweste thou that the bones of Sycheus or his tombe / the [Page] shadowe of his soule. take peyne or care to kepe thy loue / thynke it not no more than the sperkell yssuyng oute of the fyre wyth the smoke / whiche is soone reduced and broughte to noughte wythout to haue ony vygoure more ne other puyssaunte to make fyre lyghte nor flamme / Lyke wyse whan the soule of Sycheus was oute of the body and from hym separed / alle his werkes and wordly voluptees were extyncted and broughte to nought / Nor wyth hym remayneth nother free arbytre or wylle of goode or euyll / care ne solycytude of thy loue / And yf thou wylte lyue in sorowe & heuynesse. or that otherwyse were / that thou dydeste marye / and woldeste vse thy dayes in maryage. alle is to hym as ryght noughte / and no thyng there nys that coude lette hym or doo hym ony socours / but onely the meryttes of the wer­kes by hym made conuersynge in this worlde / Nor noughte for somoche. that thou makest callynges. complayntes. shighynges and lamentacyons full of reuthes noyous vpon a dampnable mynde and folysshe remembraunce of thynges that ben inpossyble. thou canste not drawe nor brynge oute of the infernalle mansions the soules of whome the shado­wes or otherwyse the asshes / ben wythin the tombes separed from the bones. for to reuyue and putte hem ayen in to the bodyes longe syn destroyed & conuerted in to poulder / Syth that it is so / and also of that other side. that neuer man how grete a lorde that he were. kynge Yarbas. pygmalyon of thyre / they of libye / many other of Affryque the ryche co­untrey that noryssheth soo many prynces / myghte neuer moeue thy courage to be byloued of the. And that to this man whiche is so moche renōmed / preu and valyaūt. thy wytte is enclyned in swete loue wythoute ony contraryete of free wylle that ther vnto admonesteth the. wyll thou cōmytte & [Page] vndreset [...]e thy lyberal arbytre to thynges Impossyble repul­synge ayenst the incitacyons moeued by naturell dylecti­on whiche cōmen of thy self with out ony othre induction Hast thou proposed to moeue werre ayenst thy persone / gaynsayng thyn owne wille / inclined to the loue desyred / In plaisaunt remenbraunce of suche a prince puyssaunt. dygne of this meryte / Haue in mynde and recordaunce the setuacyon of thy cyte newely fowūded in this lande emōg the most cruell folke of the worlde. thou hast at the one syde the citees and the people getules / whiche ben folke insuperable ryght daungerouse in bataylles and inuyncible in armes / atte the other syde ben the myrōdes that are folke without rule and without mesure / And than the Cirte regyon and the de­serte countrey whiche is all inhabited by defawte of folkes fllodes or ryuers that shulde tempre the erthe that is all drye and as ded for thurst / After is the people of Barches all furiouse and vagaūt. In the countrees Hauynge noo certaine mansyon to dwelle Inne / And more there is the Re­gion of thire wherfrom we haue wythdrawen and brought furtyuely all this people that we haue / Whiche shall mowe of lyght aryse and make werre ayenst the with the helpe of thy germayn Pygmalyon whiche the wolde haue frustred of the grete tresours & rychesses that he awayteth to haue of thy somtyme husbande Sychee / Thynke in thy self who shalle mowe the deffende a woman all alone / ayenst somoche folke without euy othre helpe of sōm prynce puyssaunt In certayne I byleue truly yt the goddes in their destynacyes haue fauourisshed the well with Iuno ye grete goddesse for to transporte in to this regyon ye ryche nauye of troye / thynke my sustre what shalbe of thy cyte & in what domynacōn [Page] puyssaunte shalle thy royame be. by the alyaunce of one soo grete a maryage / Consyderynge the glorye and hono­ur of Cartage. whan she shalle be Ioyned wyth the tro­ians / and by theym defended / Where is he that shalle be soo myghty for to vndertake to make warre ayenste the thus alyed / take agayne courage ryght welbyloued suster. & putte oute of thy remembraūce ye fortunes passed / crye mercy vnto the goddis yf by ony wyse afore this thou hast offended theym / prayng theym that it wold playse theym to be vn­to ye fauorable to the perfourmyng of this alyaunce / atyse & drawe theym by sacrifyces / requestes & oblacyons of herte contryte & carefull thoughte. & be desirous to serue theym all thynges layde a side in that / whiche thou shalbe mowe kno­we vnto theym aggreable. Aduyse for to fynde the meanes to make Eneas to abyde / deuysynge vnto hym▪ that he oughte to doo soo Seynge and considerynge the wynter that is alle dystempred the grete orages. the sygne of Oryon that rendreth the watres to be proude and cruelle / Also the shippes that ben alle crased of the grete tornementes that haue hurte theym here byfore saylyng in the see. The influences of the heuens so spytefull / & dyuerse contradyction moeuable. one apposite ayenst another causynge dyuersite perturbatyffe in the lowe elementes / whiche myghte be cau­se of his destruction yf he vndertoke ony vyage atte this tyme passinge the see from one lande to a nother / By the­se raysons and other that by the desirous affectyon of thy wylle shalle be vnto the aduysed and shewed to the perfectyon of thys thynge. thou shalte mowe peruerte the oppynyon of Eneas for to seiourne in this countrey that byfore was alle determyned for to goo The whiche [Page] thynges and other persuasions seruynge to the mater whiche enflamed the corage of Elysse esprysed with brennyng loue towarde Enee / gaue a stedfast hope to her sorowfull thoughte. leuynge by dyspense abstractyue / her first vowes of chastyte promysed /

¶How Eneas aftre grete fortunys of the see arryued in cartage And How dydo for his swete behauoure and fayre spe­kynge was esprised of his loue. Capitulo / xiij

BOthe togidre of one assente went the two sas­sustres fore named to the synagoges and temples where bifore the aulters thei offred sacrifices with grete supplycacyons and prayers / and slewe sheep weders for to doo sacrefyces destynated vnto the noble goddesse Ce­res to Appolyn. and to Bachus / and specyally vnto Iuno the goddesse of wedlocke / whiche is lady / mastresse and war­deyne of the connexes or bondes aminicules / to whome they offred in pacifique Immolacion a white cowe by twix the hornes of the whiche / Dydo by grete deuocyon shedde the fyole fulle of the holi libacion / makynge the consecracion ouer the sacryfyce: there dedied and doon in diuerse wise by solemnyte merueyllouse aftre the custome that was vsed at that tyme / Dydo wyth her suster Aune went In to the tem­ples and symulacres knelynge before the awters makyn­ge requestes and prayers and aftre loked In to the entraylles Interiores of the bestes there slayne / For to fuldo the sacryfyce. In delyuerynge and sechynge / aftre the moeuynge of them / the comynge of the future maryage / But what ouerserche nedeth more to be enquered / wherof thys folysshe thoughte cometh to the woman thus a tysed wyth [Page] the swete flamme of loue esprised in to the mary and sy­newes whiche inseparably goeth thrughe the bones as depe as the. veray hertys roote / To goo sekyng wythyn the sy­mulacres the consentynge of lyght whyche is alredy de­termyned for to be acomplysshed. Thys lady hathe norysshed pryuely in her thoughte the wounde of ambycy­ouse desyre / whyche is so procured that she can not hyde it noo lenger / She is graffed and myserably sette wauynge and tournynge here and there wythin her cyte embrassed and take wyth loue insacyable in contynuelle thoughte / As a personne furyouse lyke as an hynde that is rought to the herte wyth an arowe / goeth rennynge by the forestes and mountaynes / Thynkyng vp­on her sore onely / wythoute to conceyue ne comprehende the wele of her abydynge / Aftre wyth Eneas / goeth thys lady deuysynge thrughe the towne to shewe hym the grete rychesses that she hath broughte from the partyes of Thyre. asketh hym hys aduyse of the edyfyces of Cartage. cheryssheth and enterteyneth hym to her power in alle thynges that she thynketh to be playsaunt and agreable vnto hym / and atte last she yet spekynge her speche deffaylleth alle sodeynly and can not kepe purpos ne countenaunce as a persone transported from her vndrestandynge and ouertake wyth ouer grete loue inestymable / Of it that other parte she doeth make grete appareylles for to feeste Eneas ryghte highely in dy­uersitees of metes entermedled wyth some Ioyous dys­portes. playsaunte and in syghte aggreable. After she taketh a delectacyon in his talkynge playsaunte / requy­rynge hym that for her loue / he wylle recounte some grete [Page] fayttes or other aduentures that he hath seen in hys ty­me in the werre of Troye. And taketh her Ioye and consolacyon in his swete wordes and drawynge / that atysen and enterteyne her in a contynualle thoughte towarde hym / Soo that after theyr departynge from eche other. that tyme the mone obscure comynge in his ordre / suppry­meth the lyghte of the sonne and the sterres launchynge theyr bryghte sparkeles excyte the appety [...]e of slepe / The lady that alone entreth to her chaumbre / tryste and pency­fulle. leuynge her bedde reste syttynge vpon tapysserye werke / or other parte alle solitarye and desolate. as a thynge habandouned / Desirynge the presence of Eneas by Ima­gynacyon impraynted wyth in the fauntasme of her entendemente. Her semeth that she seeth hym there pre­sente heringe after his wordes playsaunte / And deuy­synge wyth hym / and there she passeth ouer a parte of the nyghte in suche medytacyons and contynuell thoughtes

¶And emonge she taketh in her lappe Asca­nyus the sone of Eneas otherwyse callyd Yolus and holdeth hym bytwyxe her armes / byholdeth / kysseth and colleth hym: Considerynge the beaultye and grete delectacyon of the fadre. In whiche she is rauysshed by the representynge of his sone: And no thynge the­re ys soo gretely greuable. but that it is alle ynoughe facylle vnto her to be experymented for the entreteyny­nge of her loue wherinne she myghte be deceyued for the grete serche that she doeth wythoute ceasse for to es­chew alle thynges that in this caas myghte be noci­ble and contrarye to her:

[Page]ANd for by cause of the whiche forsayd occupacy­on or contynuelle thoughte wherinne she is Inex­plycable occupyed as transported and rauysshed Alle the werkes and doynges of Dydo are taryed and lefte in the astate of Inperfection. The w [...]rkes of the grete yates / toures and othre edyfyces that were begonne for the perfectyon of Cartage. be lefte wythout eny more werkyng alle Imperfyt: the excercyse of armes is dyscontynued. the noble men wexe robuste and rude wythoute excersice of fayttes of werre. The brydges / poortes and passages ben lefte wythoute warde / And the deffences ben voyde add emptye wythoute entreteynynge / redy to receyue the enmyes wythoute ony contradyctyon: Alle werkes ceassen and appyeren interrupte for defaulte of conductours / The stones of the walles that are bygonne whiche appyeren alle awry sette. croked bowed and coun­terfette / by cause thei be not fully made and polisshed. Shewynge theyr teeth to threte and byte in to the other stonys redy to be masonned / whiche oughte to haue be contynued and Ioyned to perfourme the enterprise thus lefte as alle to cutte and perysshed. The grasse grow­eth faste and roteth on theyr heddes / theyr teeth ben spredde wyth mosse all to tourne / rusty and fulle of lothlinesse The grete edyfyces are lefte vnco­uered in dyuerse places / And shortely alle falleth in to ruyne. by cause of her grete furoure ¶But Iu­no the noble goddesse wedded wyff and spouse of Iu­byter seeynge that the goode renomme of Elysse myghte notte contryste ayenste her grete desire embrasid wyth the swete flamme of loue / Considerynge also that the [Page] goodely and grete chere of Dydo myghte be cause to ma­ke Eneas to abyde in Cartage / wythoute to passe eny ferther towarde ytalye / wolde speke to the goddesse Ve­nus for to doo conuencyon of Eneas wyth the sayd Dydo / and thenne byganne to saye vnto her by a maner of derysion the wordes herinne wrytten / Certes Venus thou and thy sone Cupydo are gretely to be praysed and ye shall doo a grete conqueste. wherof ye shall be hadde in perpetuell renommee / yf a woman myghte be by you two vaynquysshed. wherof the motyue that hath attysed you to that / & the cause whi ye haue ynoughe induced elysse to condes­cende to the loue of eneas ys to my semyng come for the drede that ye haue of the tyrauntes and of theym of affryque / & also of theym of the highe walles of our cytee of cartage For the wyhyche drede to pease ye wyll doo alyaunce wyth theym by meanes of the maryage of dydo wyth eneas. whiche thyng myght be broughte to effecte / so that ye wyll be fauorable and gracyous towarde eneas wythoute to bere hym fro hens forthe eny moleste or lettynge / And for alle debates to accorde and pease / and to brynge alle noy­es atte an ende. I gyue myn assente to a peas eternalle for the constructyon and makynge of the sayd maryage as ye doo desire to the whiche shalle mowe dydo eassyly acorde durynge this / that the grete furour enflāmed wyth brennyng desire of loue esprysed wythin her sinewes / perse ye bo­nes of her presently. & thenne of one comyn assent we Iuno and venus goddesses shall haue all the domynacyon & gouermente entierly of thise two peoples / that is to wytte of the troians in soo moche as toucheth theym of Eneas that shalle be taken in dowayr to Dydo for her maryage and lyke wyse them of Thyre that are comyn [Page] wyth Elysse: shalle thenne be subgette vnto Enee. the whiche we shalle Ioyne togydre. And of theym two we shalle make alle one people / Wherof Cartage shalle be peopled. and also the countrey:

THe whiche thynges thus sayd / Venus that doub­ted leest Iuno wolde accorde the forsayd maryage to the entente that Eneas sholde abyde in Ca [...] ­tage for this cause. and sholde leue the enterpryse by hym made to goo. and conquere the royalme of Ytalye / that Iuno sayd that she hadde in her gouernaunce / was well gladde seynynge to vnderstonde otherwyse the entency­on of the sayd Iuno. wheronto she purueyd welle after warde. And aunsuerde vnto her sayenge / he that wol­de gaynsaye this alyaunce / and wyth the Iuno to stey­ne. for to lette thy deliberacyon / sholde well be oute of his wytte. Yf thou woldeste accomplysshe by effecte this that thou mayntenest be thy wordee / but I am not well certayne / yf Iubyter the puyssaunte god / that hath / the dysposicyons of alle thynges in his hande / shalle be contente that the tyryns and the troians shalle people in comyn this cyte of Cartage wythoute some deuysi­on. And also yf our maryage and alyaunce for to spe­ke shalle be vnto hym aggreable / And by cause then­ne that vnto the Iuno that arte his wyffe and flawe apperteyneth more better than to ony other to knowe of hym hys playsure. Thou shalte vndertake this charge yf hit playse the to goo wythout taryeng. and I shall folowe the all of nyghe / Wherof Iuno takynge in hande the conduytte of this werke / was wel cōtent & sayd in this manere [Page] syth that I haue taken the charg of this werke I wol telle and shewe clerly howe the thynge shalle mowe be broughte aboute. Eneas and dydo sore taken wyth his loue haue purposed for to goo chasse and hunte the wilde bestes inconty­nent that the sonne makynge to morowe hys rysynge shal haue transmysed hys shynynge bemes for to Illustre clere alle the erthe / And whan they shal be to the vttir moost of the game welle chaffed aftre the bestes I shalle sodaynly make the ayer to wexe obscure and alle blacke replenysshed with hayle / rayne and horryble tempeste by the ayer and by the erthe wyndes and grete orages / I shall girde alle the heueus wyth thondres lyghtnynges chorusca­cyous and merueyllouse tourmentes that shalle rayne the countrey ouere ryghte Impetuously so that alle the ayer shalle seme to be couered wyth the nyght fulle blak and obscure / Thenne shalle alle the hunters flee awaye and othre fro the sayde chasshe wyth so grete haste that they shalle not wene to fynde sone ynoughe a place for to be in sauete / And by thys manere I shalle doo that the du­ke Eneas and Dydo fleynge the wedrynge shalle rendre hemself bothe togydre alle alone as by veraye destynacye and by rencountre of aduenture vndre agrete hylle withyn a caue atte the ende of the forest / And there they shalle fynde me Iuno that am lady of the maryages and doo couple them two wyth my sone hyemen whiche is named the god of weddynge / And / therfore yf I wyst that thou venus were not of accorde fo the maryag of eneas to dydo I shulde make hym fyrst to departe wythout eny respyte /

¶Of the grete tempest and storne atte maryage of theym / ¶Capitulo Decimoquinto

[Page]UEnus was thenne welle contente wythoute ony contradyctyon / and byganne to laughe strongly of the perfytte begylynge that Iuno hade fonnde soo soone for to accomplysshe this maryage / Wherof she was syn after welle deceyued by cause that she made it to couer­tely and close wythoute testymonage / and wythoute the knowleche of Iubyter: The whiche enterprise thus ma­de / after that the sprynge of the daye and the poynte of the sonne hadde putte awaye the nyghte tenebrose the bracke­ner hadde dystourned the herte in to his busshe and caste his trayne / The hunters wylle that men spredde and sette the deffences putte theym in grete appareylle for to goo to the woode / where as sholde be the chasse / Assembled theyr rennynge houndes two and two togyder / and chose theym one from the other for to assorte theym beste in the­pathes. Some wyth the brakkenere for to be atte the reysynge of the beeest for to renne after. The other for to be sette atte the relesse. and the other for to entermedle and re­dresse theyr brackes retches and bloode houndes for to ta­ke the beste better wyth force. Toke theyr staues and theyr hornes and other thynges necessarye for to full make and ac [...]omplysshe the better a fayr dysporte in huntynge be­bouynge to a chasse royalle ¶And after of a nother parte the barons the knyghtes and esquyers of the noble quene Dydo dyde putte theym in araye and came there to the palayse alle redy waytynge that she sholde come oute for to mounte vpon her fayr palfrey whiche wyth other for her ladyes and gentyll women was in the courte alle preste appareylled and couered wyth a grete cloth of purpre gnawyng his bytte garnysshed wyth botones of golde [Page] alle charged wyth the scume of the horse. And soone ys­sued oute the lady moche nobly accompanyed that hadde a grete mauntelle of veluet cramoysin pourfylled rounde aboute wyth brawdrye moche enryched wyth pre [...]yous sto­nes after the custome and manere of that tyme [...] Her he­rys bounden wyth thredes of golde / and her ryche g [...]rdell that appyered moche precyous alle a boue her raymentes / She hadde also a fayr tarcays couered wyth fyne cloth of damaske alle fulle of arowes / and therwythalle the bowe for to shoote to the wylde beestes and otherwyse atte her playsa­unce Thus appoynted / she mounted on horsebacke for to goo to the sayd chasse wyth hir barons knyghtes and her gentyll women / and also the lytylle Yolus or as­canyus that hadde putte hym selfe in poynte for to con­duytte the quene wyth his fadre Eneas / the whiche wyth a ryght grete and fayer companye ridynge afore the la­dy. appyered aboue all the other wythout ony comparyson the moste fayre / Lyke as the beaulte of the god Appollo that is the sonne. doeth appyere and shewe vpon the flode of Exanco whan he cometh in wynter in to the cyte of Pathere in lycye / to gyue his anuswers. and kepe the co­urte of his grete godhede / And fro thens whan the. syx monethes of the wynter ben passed / and that he wylle retour­ne in to the Isle of Delon for to make semblable his aun­suers duryng the syx monethes of the somer. the places partyculer of Crete. as Agatyrse and Dryopes. doo ryse and goo ayenste hym / for to see his grete beaulte / whan he co­mynge casteth his bemes vpon costes and mountay­nes of the countrey in manere of golden heres descendynge from his hed. and as the lighte of torches [Page] sparklynge well enflammed wherby alle thynges. renewen them at his commynge. as the trees that to theym maken garlandes of leues grene / the erthe taketh a newe cote full subtyly weued aftre ye werke of fyn gras powdred with floures of a hundred thousande maners of colours / The byrdes renewen theyre swete songe gracyouse / The bestes becomen fyers and of proude manere. The ayer purify­eth and clenseth hym selfe for to receyue the Impressyons of influences of this god Apollo to his newe commyng whiche is so fayre and sore desyred of all thynges / Lyke wyse in alle excellence surmounted the yonge yolus all the other that were in ye ladies felauship for to goo to the sayd chasse And when they were come in the dales and narowe wa­yes of the busshes vpon theire courses for to destourne the bestes that yssued oute of theire dennes with grete effortes rennyge in the playne valleyes and mountaynes by dyverse places the one opposyte to the othre in confusion merueyllouse / The lytyll A scanius or Yolus that in this toke grete playsure ranne aftre vpon a corrageous hors al­wayes redy for to r [...]nne so that he ouer ranne often the bestes and was before them / And some tyme abode behynde alle wrothe of the grete cowardyse of these bestes / Desyrynge to recountre a wylde bore or some lyon that fledde not for to fyghte with hym / ¶Durynge the tyme of the whiche chasse. And that alle the assistents were departed And stronge chaffed rennynge aftre the bestes In many and dyuerse countrees / Iuno the goddesse wyllynge accomplysshe the maryge of Eneas to dydo thrughe suche meanes as ben spoken here aboue. byganne to make the ayre to be troubled And to couere the blewe cote of the [Page] heuens azured with cloudes blacke and obscure full of wynde Impetuouse / of rayne and of heyle / of thondre & tempeste alle medled togydre / Of the whiche the forsayde hunters apperceyued them not nor made no force for it. withstandynge the grete entermyse and besy occupacion that they had In­hande to the poursiewte and destournynge of the bestes whe­rof euery of hem was atte astryffe who sholde doo best for to be praysed and acquyred the grace of the ladyes / vnto the tyme that the sayde cloudes were well thyk gadred with the stronge wedrynge that surprised them all atones and soub­daynely enuaysshed them and tormented Rygth asperly with rayne mysell and grete heyle stones amonge / Aftre cam a stronge wynde lowe by the grounde that agetted theym in suche a wyse that they were lyfte vp on hyghe fro the grounde / and were caste backewarde / forewarde and atte eyther side whan they wende to haue drawen hem selfe one towarde other by the thondre and tempeste that descended doun from the clowdes and ranne by the grounde alle enfāmed in su­che moeuynge. and perturbacyon that it appiered of pryme­face / that the heuens were broken and parted a sondre wher­oute yssued fyre ardaunte / whiche Illumyned attones alle the erthe / And aftre that this lighte was goon the ay­er retourned in to a grete derkenesse / for the grete Impetu­osite of the orage as thoughe it had be nyghte / For the whiche cause the tyryns and the troiens wyth the hun­ters / and other of the sayd chasse / and also the lityll Yo­lus sone to the sone of Venus / that is Eneas and neuew of dardanus his grete vncle whyche was the first prynce that edyfied Troye / were constrayned for to flee / and to se­che euery one after hys power some vyllages or habitacy­ons for to wythdrawe theym selfe. whiles that the fallyng [Page] of the reyne russhynge doun from the mountaynes descen­ded in to the valeyes. Also of a nother parte the quene dydo and Eneas in fleeynge founden a caue vnder a grete roche in ye whiche they hidde theym selfe bothe togyder alone / & ther the goddesse Iuno quene and patronesse of the cōmocyons nupcyalle. by the assente of venus that lyghtened the tor­ches fo to receyue hiemen the god of weddynge accompanyed wyth the erthe moder to the frrste goddes whiche for to doo this / hadde prepared that secrete place and the reyny wedre therto / propyce and conuenable whan they hem selfe goddesses of the watres & fontaynes russhyng doun in grete haboundaūce from the toppe of the moūtaynes / assembled & made thenne the forsayd maryage / of Eneas and of dydo wythoute other wytnesses to be by / but the god & the god­desses that be declared aboue / wherof folowed after / that this daye was the firste cause of the grete euylles and deth of dydo. the whiche coude neuer be dysmoeuyd from the same by her grete vertues and merytes ne her laudable renōme. and wolde not kepe her secrete as she dyde afore / but in publique for to gyue a coloure to her falle / confessed hym to be her husbonde / And therof was grete spekynge made that sone ranne thoroughe the cyties of Lybie and of Affryque / wherby arose one euylle goddesse callyd fame or renōmee whiche is more lighte than ony other thynge / and by mobylite vygo­rouse encreaseth her forse in rennynge / Atte the firste she is ryght lityll for doubte that she hath to be seen. and anone after she maketh her selfe grete and mounteth vp in to the ay­er / And in vyagynge thrughe the landes hideth her [...] by­twyx the clowdes / And thenne she vttreth and sayeth alle that she wylle. by cause that she is ferre from the p [...]riy [...]. And it is not to be merueylled yf she be wycked as I say [...] [Page] for she was wickedly begoten and for an euyll occasyon / the erthe granmodre of the godde was ones wrooth wyth the­ym. And for to doo hem a grete Iniure engendred two horryble monstres / the fyrst hight Seceo. and the seconde Anthele­do whiche were geauntes stronge and puyssaunt aboue alle othre men of that tyme and exempt from the subiectyon of alle the dyuynite. and had a suster named renommee or­fame that was the last procreated / and in signe of a mocke was to her youen the facultee and power for to reherce and saye alle thinges that sholde come in her mouthe / and to speke eyenst all folke be it kynges princes or lordes or oth­re knyghtes. ladyes gentyll wimen / marchauntes labou­rers and maydens goddes gddesses & theyre sequele with­oute hauyn grewthe ne regarde to [...]o manere of l [...]synge no more than to the trouthe of the dede & to her were gyuen wynges alle of fedders. and fete and handes and body and hede wherof was made a monstre fulle terrible that hath as many eyen in her hede euermore wakynge and alle wyde open / as she hathe fedders vpon her and asmany eerys / mouthes and tonges in lykewyse that speken stylle without ceasse / And for her talkynge neuerthelesse cesseth not to herkē and bereth well awaye that that she hereth Alle the nyght she fle­eth betwix the clowdes / and renneth ouer the erthe spred abrode rushynge and makyng grete noyse as thondre & tem­pestes nor can neuere wake so longe that she can gete luste to slepe She sette herself somtyme atte the gates of the tow­nes castelles fortresses and of grete lordes houses with the­porters and mynystres for to questyone them what rewle is kept in the towne / of the astate of the kynge and of the prī ces and of theyre moost famylyer seruauntes / After she goeth vp in to the hall and somtyme within the chambre and [Page] hyde hersef in cornes and behynde the tapytes. a nother tyme vpon the highe pynacles and toures / and wyth theym that kepe the day watches whiche beholden alle the towne ouer & nothynge is there so secrete be it in house or in strete. but it is sone manyfested vnto her / The grete cytees & bygge townes she doeth trouble somtyme wyth sorowe and yre by her report [...]n [...]e / Alle is goode for her / and alle is to her paye Alle thynges wherof she aduyseth herself / be it good or euil trouth or lesynge she telleth and reporteth alle to her guyse This meschyne of whome I speke that Ioyeth her to recyte aswell the euyll as the goode and more lesyng than trouth byganne to renne by the townes cytees cas [...]elles & [...]ther places / recountyng vnto all them that she fonde / hew Eneas of the lynee of the troians was come in Cartage of whom the fayr dydo had enamoured herself and bothe togydre helde hemselfe alle the winter passynge the tyme in grete playsaū ces festes / playes & sportynges all occupyed In theyr deli­ces wythout to puruey to the gouernaunce of theyr royal­mes lordshypes as though they had forgoten it. alle dedyca­ted to theyr playsures & wylles / how be it that it was other wyse / And in passynge throughe the landes reportynge all thise tidynges was aduertysed that the kynge Yarbas resident in the same contrey and sone adressed her se [...]fe towarde hym the streyght cours / And to hym recounted the manere How dydo hadde esprysed her owne herte wyth the loue of Enee / and alle the thynges here a fore wryten / wherof this Yarbas that was kynge of the grete Libye hadde a grete dyspyte. by cause that this lady hadde somtyme re­fused hym that was a grete lorde / and of the lynee of the goddes. sone to god Iupyter a renouse that men adoured in Lybye / and of one Nyuyse goddesse of the fontaynes. [Page] doughter to Gazamas that had be rauyshed This Yar­bas was ryghte deuote and in his tyme had construed edyfyed and made an hondred temples wythin his royalme wyth an hondred othre sacraryes in whiche he had consecrated the fyre brennyng without ceasse that he called the daye watche pardurable of the godde: And made there contynu­elly so many sacryfyces that the erthe alle there about was alle made fatte and molyfyed wyth the blode of the bestes that were there Immolated to the honoure of the goddes / And replenyshed wyth alle manere of good odours & swete smellynge for the grete haboundaunce of the garlandes made of floures that he gadred in that place. And whan he was adcerteyne [...] [...] the dooynge of dydo and [...] Ene­as. he was therof vtterly dysplaysed / wherby agrete acu­mulacyon of yre and wrathe he begate wythin the roote of hys herte. and as tryste sorowfulle and besyde hymself wyst not to whom complayne / but onely that he wente in to the temple before the awter / and in Ioynyng his handes togydre made the prayer and requeste that foloweth / ¶O Iupyter almyghty god for whome folke of Mory­enne where is made the roughe tapysserye in pycture alle dyuerse: haue made an assemble magnyfyque of metes and of wynes for to kepe a solempnelle feste in the worshyp of thy godhede / knowest thou not oure sorowe. hast thou for euer determyned to solace and dysporte thy self euermore wyth the thondre and weddrynges for to gy­ue vnto vs tremoure and feere / wylte thou feere vs onely wyth thy fyres by the sodaynly sente throughe the cloudes in grete tempeste and murmure. and occupye thy self alle to that wythout rightwisnes to be by the made vnto euery chone /

How Yarbas complayned hym to Iupiter of eneas that e­defyed the cyte of Cartage / and how Iupyter sente sodaynly Mercuryus towarde eneas for to make hym to retorne in to the coūtrey of ytalye ¶Capitulo xvj

WE cōplayne to thy ryghtwysnesse of a woman whi­che is come in to the lymytes of our londe habandon­ned & as lost named fenyce or dydo / that hath take vpon her to edyf [...]e a cyte of lityl pryce that she doo to be called cartage to the whiche by curtoysie we haue gyuen londe habytable & lawes for to gouerne her peple / and haue required her ofte tymes to be our wyf & spouse / but therof she made none acōp­te and hath habandon̄ed hersilfe in alle manere poyntes to receyue the false eneas. as maister & lord of alle her londe / The whiche seductor of ladies. as parys that enwedded ye fayr heleyne. kepeth himself in maner as a woman in their companye wyth his longe heres that he maketh to be eno­ynted & kemed for to be yelow as golde. makyng theym to be boūden in a coyffe roūde a boute his hed / wythout to thynke vpon none other thynges: but only the delites of wymē ly loue. wherin he is contynuelli ocupyed wyth her. and we that alle the tyme of our lyf haue serued to thy temple / doon many sacrifyces & oblacyons to thi lawde & praysinge / are dyspysed & habandouned wythoute to bryng there from so­me rewarde or a vaūtage. the whiche yarbas makyng this his complaynt and prayer wrthin the temple byfore the awters the god almyghty Iupyter that wolde exalte his requeste tourned hys loke a side towarde the walles and habytauntes of the cytee of Cartage where he knewe the two louers wythoute remembraunce of theyr firste goode fame that they hadde forgoten

And thenne called to hym Mercuryus whiche ys inter­pretour [Page] of the goddes. And commaunded hym to doo the message here wryten saynge / ¶My sone mercure goo lyghtly take thy wynges empared with fedders / Calle the swete wyndes and goo doune wyth them toward Eneas the duke troien whyche is nowe taryed wythin Cartage for to enhabyte there / hauynge noo mynde ne recordaunce for to goo conquere the cytees that by fore haue be youen vnto hym / shewyng vnto hym that his modre venus the fayre goddesse dyde not promytte vnto vs that he / hul­de be suche aseductour of wymen and of lyf determyned to communyque wyth them / Whan atte her requeste we kept and saued hym two tymes ayenst the grekes hys enemyes And gaffe hym vyctorye one tyme ayenst Dyomedes and a nothre tyme ayenst Achylles whan atte bothe the tymes he enterprysed for to doo armes ayenst theym before the gre­te Troye / But vnto vs dyde promyse hys sayde modre to make hym more cheualerouse than eny othre of hys tyme in suche awyse that he shulde be dygne by excellence aboue alle othre. to obteyne by bataylles the conqueste vyctoryouse of the ryche and second empyre of Ytalye / And that thrughe hys grete worthynesse and hygh [...] fayttes he shulde brynge vp ageyne the grete and fyrst renomme of the tro­iens and alle the worlde subgeit to hys lawes / And yf he had hys herte so harde Inclyned to the playsure of his fowlle delyces. That the desyre gloryouse to conquere one suche lordshyp / coude not mowe bryng hym there to as touchythe honour of hys owne persone / Atte the leste that he haue cōsideracyō that his sone ascanius to whome af [...]re his deth are due his grete domynacyōs. be not putte ther from thrughe hys deffawte / What mystreth hym to edyfie carta­ge & enhabyte emōge his enmies for to leue & forsake the noble [Page] posteryte of ytalye and the ryche possessyons of lauyne / goo thou forth incontynent to gyue hym commaundement in oure byhalue that he parfournyshe hys vyage for this is in effect thy message and ende of thy legacyon / The whiche Mercuryus-desyrynge to acomplyshe the commaunde­ment of his granfadre Iupyter appoynted hym self fulle soone for to fullefylle his wylle / And fyrst he made fast atte hys heles hys grete wynges ouer gilt that bare hym with the wyndes aswelle ouer see as ouer erthe hyghe & lowe where someuere he wolde be and toke the cepter Impe­ryalle of hys dyuynyte / by meanes of the whiche he drewe some sowles out of helle and made hem to come vp ahighe to the lyghte / the other he toke out of lyff and sent hem in to helle / Also wyth his rode he made some to falle a slepe without neuere to wake. and the other he made to watche wi­thout ceasse / And with this rodde fleeynge he deuysed the foure wyndes and departed the troublouse clowdes that he recoumtred in hys waye / And trauersynge from one lande to another he perceyued in lokynge alle of ferre the hyghe sholders and sydes of the strong Athlas that susteyned the heuens vpon his hedde. This Athlas was a ge­ant str [...]ng and myghty a boue alle the other / & bycause that ye he [...]ens were not stedfast of one syde & somtyme dyde bowe atte other part the goddes dide tourne hym in to a hyghe moū tayne for to susteyne the heuens And vpon his hed in stede of [...]rys he is all garnysshed of sapyn trees and of hooly trees that be contynully beten & cast of the wyndes and sore coue­red with clowdes fulle derke / his sholdres are couered with snowe atte alle season of the yere. & out of his grete chyne issuē grete flodes & fōtaines rēing doune without cesse alōge his terrible berde of whiche the borders and shores in stede of [Page] heres ben garnyshed wyth thycke yse) And incontynent the sayd mercuryus drewe thyderwarde for to festye the sayd athlas yt was his vncles brother vnto his moder named laye / & sette hymself vpon his sholdres where he was a why­le to reste hym / And after toke his flyghte as a byrde streyght towarde the see of lybye fleyng lowe & syn hie restynge hymself vpon the roches alonge the shores of the see. takynge hys dysportes as a byrde that pruneth or pycketh her / so that he cam by processe of tyme from a boue the sholdres of his sayd vncle vnto the sandy shores of the see of Lybye / & from thens he entred wythin cartage. where he fonde eneas that buylded towres & other grete edyfices. all ocupyed for to make vp the cytee of cartage / and had a bystorye or we­pen crysolite / as it were a lityl swerde crosseles that hafted was wyth iasper wel enryched & garnysshed wyth fyne golde hangynge at a silken lase by his side / and hadde a sleue vpon his lifte harme of fyne cr [...]moysin alle drawen ouer wyth golde wyer right waūtanly wouen / whiche the ryche dydo had made wyth her owne handes & had gyue it to him to the whiche eneas the sayd mercuryus adressed him & said in this manere / Man effemynate wythout honour rauys­shed in to dileectacōn femynyne that hast lefte & forgoten thi royame & habandouned thyn owne thynges for tentende to ye strange. [...] wylt yu edyfie this citee thus moche magnyfique. wherof yu hast taken the foūdementes in this place yt is not thyne / That same god regnynge in the clere heuyn yt of his godhed doeth moeue bothe the heuens & therth / hath cōmaūded me to come hastely toward the thrugh the hie re­gyons of thayer to brynge vnto the his cōmaundementes What cometh to the byfore / that thou wyl [...]e buylde here what hope hast thou to abide ydle in this landes of Lybye. [Page] wylt enhabyte thiselse in a strange contrey. and leue the cō ­queste of thyn owne herytage / And yf the glorye of this thyng / whiche vnto the. oughte to be desiderable / can not moeue the therunto / dredynge the peyne & the traueyl of the cō queste whiche thou oughtest to attrybute to honour magnyfyque. as to thy persone / atte leeste byholde wyth pyte thyn heyre Yolus / to whom the royame of ytalye / & the ryche contre romayne are due after thy deth by ryght heredytall. & doo bi suche manere of wyse. that the loeuynge be vnto the attry­buted / to haue made conquest therof / The whiche thynges thus sayd. the sayd Mercuryus / yet spekynge vaynyssed oute of eneas sight. as a thyng that one see of ferre / alwayes drawynge from hym abak tyll that it is seen no more: Wherof this eneas was sore afrayed of the grete vysion d [...]yfyque that he had seen. soo that he abode as a man rauys­shed out of his wytte wythout speche. his heeres byganne to gresell & dresse vpward / the arteres formatyue of speche were stopped wythin hym / in somoche that he myght not speke for the grete horrour & fere that he had had. desiryng abowe all thynges to flee & leue this swete contrees of cartage for to [...] a place of surete. thynkyng in hymselfe te be in daū ger of his persone / as longe as he dwelleth there / wythstā dyng the inuectyue monycyons doon to hym by the cōman̄ ­dement of the goddis. & knowe not what to doo / so moche he is esprysed of sodayn sorowe immense nor by what wayes he maye notyfye thees thynges to Dydo. ne what termes he shall take at the begynnyng of his wordes / hymself to va­lyde & to gyue a coloure to his byfalle / & abode longe in this thoughte doubtouse and varyable. wythoute to sette his purpose to condescende to ony parte of that he wold do vnto [Page] the ende that it semed hym for the best to calle thre of hys knyghtes / One named Nestor a nother Sergeste / and the thirde is the stronge Cloant. to whome he commaunded that alle secretly they sholde doo make redy his shyppes / assemble theyre folke / take theyre armeures and alle other appareylle for to depart incōtynent yt he shold ordeyne. And that they sholde doo this couertly in dyssymulyng their goyng / to thende that yf it were aperceyued by some waye / men shold wene that it were a manere of a feynynge:

¶How dydo knowyng the departyng of eneas ranne thrugh the cytee of cartage as a woman disperate and from herselfe Capitulum xvij

THe felawes right gladly dyd fulfylle ryght soone the cōmaundement of eneas / the whiche trowynge that dydo sholde neuer haue thought vpon ye brekyng of soo grete a loue. nor that he wolde habandoune & leue her stro of wyth hymself / by what wayes he myghte signyfie it vnto her. in what wordes / or what hour / and in what ma­ner moost honeste for to gyue her lesse sorowe. But the quene dydo atysed of the grete couetyse enflāmed wyth desirouse loue that can neuer be sacyate ynoughe / felte firste this barate / by cause that the fyne louer that alwayes kepeth hym selfe wythin his warde. and fyndeth noo thynge soo sure. but that he putteth it in a doubte. can not be lyghtely dece [...]uyd. For fame that euyll goddesse reporteth vnto her that Ene­as made his nauye to be armed and repayred. wherby she y­magyneth fyrste / that he dyde soo for to departe and goo ou­te of her lande & Incōtynente as alle furyouse & oute of her wytte. toke to styre her selfe & rāne thrugh ye citee of car [...]age as a mad woman. as thyas ye grete prestresse dyd in tyme [Page] passed whan she wente to incyte and somen the matrones and yonge maydens to renne furyously and wythout sha­me thrughe the towne by nyghte to the feest / and sacryfyces of the goddes Bachus and Venus atte the daye of theyr solempnyte

¶How dydo sorowfully bewaylled the departynge of E­neas by swete and amyable wordes Capitulū xviij

ANd thus rennynge aboute she recounted Eneas to whom by grete dyscomforte reforced wyth merueyl­louse sorowe / wherof her herte was surprysed in gret accumylacyon of extreme dysplaysur. she sayd these wordes halfe by manere of a reproche in dolaunte lamentacyons re­wthes and complayntes / O ryght dere eneas sedycious & ryght cruel how haste thou had the herte so vntrue to thynke so grete a treson / as for to wyll departe out of my lande sodaynly. wythout to make me a knowen therof / Is there thenne nothyng in the worlde that can make the to abyde here. nother the grete loue that is bytwyx vs bothe. wherof we haue somoche loued eche other. the grete re [...]uel that I haue doon to the / the grete ayde & socours. the worshyp that ye hast had of me. whan I receyued the in to my londe / that tyme that thou come firste to me / as a man exyled and nau­fraged. nor the deth horryble & cruell that for the I must receiue wherof I shall redyly slee my selfe at thoure of thy depar­tyng / nor the paynes & traueylles that thenne I shall must endure. O man of all other the moost forcened oute of thy wyt & doled out of ye sure waye / how in this harde wedder of wynter yt the wyndes ben in their furye / ye see full of tempest & of grete voraygeouse wawes & the tyme alle indisposed more than euer it was / hast yu purposed to moūte vpō ye see & to flee from my psence / for to goo with a lityl puissaūce to [Page] werre and bere greuaunce to ytalye a strange londe / wher from thou shalt be sone expelled at thys tyme / For yf thy wille were to goo to troye thyn owne londe / yf she were yet in her beyng / & that thou were well sure to be there honestly re­ceyued / yet thou oughtest not to goo there nor to take the see now. wythstandynge the daūgeours aforsayd / Alas fle thou not from me. therof I requyre the & admonest the for pyte of the sorowe that I bere. and for the grete teeris flus­shyng doū from myn eyen that this to doo incyten & somone the. by the swetnes / by▪ thy well wyllynge and by the yeftes & alle other thynges that I haue doon vnto the. alle at thy­ne owne wyll. in suche a wyse that no / thynge I haue reserued for my selfe / but that it was alle habandouned vnto the more redyli than to myn owne body / By oure kyssynge and swete cully [...]ge. by oure byhauynge and louely coun­tenaunces / by our Ioyes and playsures delycyouse in fyne loue bytwyx vs mutuell. wherof we haue loued eche other soo that in noo wyse my dyligente thoughte hadde neuer no wylle to be cruell anemste the. but hath be atte alle tymes desirous for taccomplysshe wythout ony gaynsayng. alle ye I knewe was to thy playsur / And thenne yf I haue deser­ued to haue some good of the / & yf thou euer toke playsaūce in ony thyng that by me cam. playse the then̄e to haue mer­cy of this poure desolate frende that shalle be sone broughte to the poynte mortalle and my cytee dispeopled / and to gre­te ruyne delyuered by thyn infortunate goynge. And wyll chaunge thy courage / yf my requeste and prayers can haue place of merite to acquyre mercy ayenst the. thou seest that the folke of Lybye / the cruell tyraun [...]es of My­ronde. and they of the cytee of Thyre that many tymes I haue offended. hate and haue enuye atte me for the [Page] my [...] chastyte pudyque and alle hee praysynge is there loste And my fyrst fame & goode renomme. wherbi I was electe & taken vp to the sterres as a veraye goddesse / is now by thy departynge sodaynly extyncted. why wolde thou thenne habandoune and leue me thy kynde loue dyscomforted. redy to deie / for to flee passinge by this coūtrey lyke as an hoste that lightly forgeteth his lodgynge and the place that he goeth fro & departeth Ioyously wythout to haue eny rewthe / ther unto haa I perceyue well that of the I wende to haue my f [...]ēde my true husbāde & espouse / & no thing abideth with me nowe / but onely the name of an hoste. what can I wayte for nowe O what recomfort may I haue that am voyde from alle hope / and noon other is there / but to falle in to the han­des of Pigmalion my cruelle brother kyng of Thyre / that shalle comme take my cyte and put alle to destructyon and brynge me to mendycyte. Or that Yarbas kynge of Ecc­tuses that I haue so oste indygned / for to auenge hys Iniuryes. shalle reduce me in to captyuite / Atte leste yf afore thy harde departynge I had had of the som lynee or som lytell Eneas / that I myght haue seen often playnge in my halle for to take theratte som comforte. wheryn I shulde haue take my dysport / thinkynge vpon the remēbraūce of the Ioyfull playsaunce that I haue had of thy presence / whyche shulde asswage the harde dysplaysaunce that I shalle haue of thyn absence I shulde thynke that I were not so sore wasted nor alle togydre habaundouned as presently I am /

¶How dydo alle in arage complayned her to Eneas and to the / goddes ¶Capitulo xix

OF the whiche wordes Eneas not moeuyng hym self in nowyse / but in holdyng hys syght alwayes / Inmobyle atte anothre syde than vpon dydo & sighynge sore [Page] in his herte for the loue that he had hadde to her. sayd in this manere / Certes quene I answere not. but that thou haste deserued of me moche more of goodes than I can nombre or by som wyse thynke ne telle. and so shall I remembre elysse as longe as lyffe shall abyde wythin me / and by cause that thou hast spoken first I wyll telle & shewe vnto the that I wold not haue departed furtyuely out of thy land vnkonwen to the. but sholde haue sygnyfied it vnto the / Also I am not come hider determyned to wedde the / nor neuer toke pre­sūpcōn in me for to do so. nor to take aliaūce wyth the for suche a cause. And yf the goddes wolde suffre that I myghte vse my lif to myn appetyte & to be at my fre wyll I shold take habytacōn in the grete troye wyth my kynsmen & other that are there abyden. escaped from the distructōn And yet sholde troye be made vp agayn by me / but the god Appollo of the cytee of tymbre wyth the oracles in short preceptyue of the lande of lycye / cōman̄den me to goo in to ytalye. and syth that it muste be thus doon. it is my lande & my desire to accomplyshe alle theyr wylle / And it semeth that yu oughte not in no wyse to reprehende me ne to haue enuye vpon ye troians of theyr goynge in to ytalye a strong lande out of theyr nacyon / sith that yu art of thire. come from the meane regyons of fenyce to enhabyte in libye & to take thy playsure in thy grete edyfyces of cartage that thou doost make presently for to preside in hit / forsakyng the swete groūde moder to thy byrth. For to a peple yssued out of strange lande is licyte to seke strange / places for theyr / dwellynge. And it sholde be a shame to me that haue enterprysed the cōquest of ytalye to reside in this land of lybie wythoute to acoonplishe my wyage whiche thynge for to doo I am incyted in dre­mys by the soule of my fader Anchisis / the whiche atte alle [Page] tymes that the nyght obscure couereth the landes of her shadowes humyde / whan the sterres togyder maken theyr ry­syng / apyereth byfore me vndre the speche of a terryble ymage / strongely indygned and ayenste me sore moeued. Also of a nother side I am sore conturbed wyth a drede merueyllous. for the grete Iniurye that I doo to my dere sone Ascanius whiche by my longe taryenge. I doo pryue of the possession of the royame of ytalye / wherof the successyon is vnto hym due of ryghte heredytalle / and by veraye destynacy af­ter my deth / but there is no more / by cause that thou shalte not wene / that of my selfe I haue enterprysed this besines for to leue the / yet in trouth and also I swere it by thy hedde and also by my owne. that Mercurye the gret messager and grete Interpretour of the goddys hath ben hastely sente fle­yng by the ayer from Iupyter souerayne god. whiche hath brought me maundemente for to departe alle incontynent / I haue seen hym manyfestly in lyght of godhed to entre the walles of thy cytee / & all clerly of hym herde his voys wyth myn [...]erys properly. wherfore it ought well to suffyce the / wythoute to presse me wyth wordes ony more. sith that the goynge and enterpryse that I muste doo in ytalye is not of myn owne wylle:

IN sayeng the whiche wordes by eneas / dydo lokyng at one side torned hir eyen sodaynli wythout to speke neuer a worde / as a persone furyboūde & furyous: and or e­uer that she coude saye ony thyng. as rauysshed / helde her sig­hte all mobyle wythout to areste it vpon one thynge of a long while / and after by gret yre gadred by inmense sorow intrysinque wythin her hert sayd to hym in this wyse. o man right false and vntrue yt what someuer men sayen was neuer borne of no goddesse nor procreated of royalle lynee [Page] comyng of the puissaunt dardanus fyrst founder of the grete cyte of troye but arte engendred of Cancasus / whiche is a moūtayne terryble in ynde. all ful of harde stones of dyuerse fygures of merueyllous height that recheth almost vnto the heuyns / soo that neuer ony birde myghte passe. o­uer / where groweth hungre that was neuer satyffyed. to [...]xstirpe & waste alle the goodes comyng oute of the erth. The whiche how be it that she hath chosen there her habytacōn for to deuoure all thynges that comyn vnde her. All this nethelesse suffiseth her not / but sendeth don̄ her colde messagers / as snowe / froste. heyle / & tempeste transported & caste of the ay­er by the colde wyndes into the lowe regyons. and after do­e [...]h peryshe the trees & the herbes. the corne & all other thyn­ge growyng oute of the groūde / and this doon whan she hathe no thyng more he parforseth hyr self wyth hir grete teeth to ete the rotes vnder the groūde that haue hidde hemself wythin the entraylles of ther the their moder / for to achieue that all were brought to destrucsyon / as yu wylte doo of me in folowyng the cōdycions of ye subsiduous modre that hath made the to be norysshed and fedde wyth the mylke of the tygres of Yrcanye that are made wythoute to haue py­te of ony thynge that is borne in this worke. what holdeth me / but that I shalle sone goo fro my wyttes replenysshed of grete madnesse / why is it that I dssymule to goo alle oute from my wyttes. wherto wylle I thenne kepe my selfe no [...] lyue more from hens forth / syth that this euyll man / & a traytour. for what wepynge that I make dayneth not gyue oute one only syghe nor torne his eyen to loke ones vpon me / nor haue no pyte of me his sorowfull loue / for to styre hym to one sighynge only or to atere descēdyng out of his eyen / what I ought to do / ne what parte to torne me [Page] what I may saye / to what ende shold my wytte mow begynne / nor where to haue recours / I wote not / O goddes celestial and Iuno grete goddesse O Iupiter and alle othre god­des gyue socours to me thys vnhappy / and wul permute ri­goure to equyte in this bihalue.

¶How dido with grete cursynges gaf leue to Eneas / ¶Capitulo / xx

ALas I haue receyued this man poure myserable and nausraged vpon the ryuage of the see / and as euyll aduysed haue kept hym and well entreated and lyghtly & gretly coloqued aboue the moost grete of my lande / his nauye I haue do make ayen that was reduced all in peces. his folke that were alle perisshed and alle lyuered to deth I ha­ue delyuered them therfrom and receyued in to my cyte / not onely receyued / but entreteyned / furnyshed and susteyned as them of my house / And nowe for to rewarde me therof I haue the rage of furoure atte my herte. O what anguyshe / what lesyng what treson full of desperacōn / how he swereth that the god Apollo by his aunsueres and angurements / the sortes preceptyue of lycie and the interpretour of the grete god Iupiter Mercurius messager of the goddes / haue pressed hym strongly by ryght grete commaundementes for to goo ryghte sone in to ytalye / O alle puissaunt lyght permanēt / bifore whome no thynge be it neuere so secret nor couer­tly kept can not be hyd. how weneth this man by his false and deceyuables wordes made stronge with right grete and horrible othes. to make me to vndrestande / that ye alle. ben about for to make hym goo from me as that ye had nō othre besynesse but only to send doune youre knyghtes messagers towarde hym / O how thou art a ryght stedfast lyar that d [...] deth not to calle the true goddes in testymonage for to con­ferme [Page] thy lesynge. and yet more to Impute to theym that they ben cause of thyn vntrouth / Now goo thenne syn it is soo / into what someuer partyes that thou wylt / for I haue not the kepynge of the / I holde the not in no wyse / nor wyll not that thou abyde for me. crye strongly and calle the wyn­des / and doo the worste that thou canste. calle after Yolus & Neptunus for to lede the in to ytalye. hie the and make it shorte / mounte vpon the see and tarye no lenger / For I truste that the goddes of equyte pyetouse haue suche puyssaūce thou shalte abyde naufraged wythin the see / thy shyppes broken ayenste the roches / and shalle calle me often to thyne a yde in grete complayntes & merueyllouse rewthes. that thou haste thus habandouned me dydo dysplaysaunte and desolate / that sone shalle folowe the / by fyre mortalle inslāmed. & whan the colde deth shall haue separed me and taken awaie the soule from the body. my spyrite shall aproche the nyghe in all the places of thy flagellacyons peynes & tormentes for to see thy sorowes and to here thy wepynges and sobbynges and grete lamentacyons. wherof I shalle make my re­porte vnto the pryue goddis beyng in the lowe shadowes:

¶How dydo felle doun in a swone / and how & in what manere she was borne awaye by hir wymen. and also how dyligently the nauye of eneas was made redy for to goo in to ytalye Capitulum xxi

IN sayeng the whiche wordes how be it. that dydo had de purposed to saye moche more / she brake her speche alle atte ones by ryghte grete sorowe. Toke and dystourned her eyen from the lyghte where she was inne / And felle in a swoune as alle ded to the grounde. she was soone take vppe by her wymnen that bare her in to her cham­bre marbryne. & leyd her vpon alityl bedde. Wherof Eneas [Page] how be it. that he had grete pyte and compassyon of her and desired sore to comforte her wyth swete & amyable woordes for to asswage her sorowe in grete sobbynges / for grete displaysure & sorowe yt he had. to see his swete loue suffre suche a peyne / Alwayes he determyned hymself & went his wayes for to see his shippes / Thenne whan his folke & maryneres sawe hym / they dyd hie hemselfe yet more fast to werke for to haste their goyng / transported the moste parte of the nauye that was talowed / & well garnysshed wyth pytche / oute of the hauen in to the rode. made oores of wood all gre­ne comynge new out of the forest / and toke also ryght grete trees and foyson of other tymbre for to apropre to their other besinesses in grete desire to departe fone hens. ye sholde se troians of all sides that ranne some doūwarde / and tho­ther vpwarde. alle of one wylle to haue furnysshed theyr shippes. euyn soo as pysmers are woūte to do. dredyng sore the wynter / whan they haue founde a shokke of whete or o­ther corne. goo sone oute of theyr nest and alle by one waye. for to bere awaye their proye / Some lade themselfe / som helpen the other. and thother drawe after theim ye / that they can not bere that other cōmaūdeth & setteth hem all in ordre a nother forseth hym self to swepe the place. a nother kepeth that other bystoweth it. And the other incyteth to make dyligence / one renneth. a nother cometh agayn / and that o­ther seketh what to lade hym selfe wyth alle. a nother hath somoche laden that he late falle som by the waye / And then̄e he calleth for helpe. soo that the waye is neuer deliuered of theym. tyll that they haue doon theyr besinesses ¶Alas Dydo where is thy wytte bycome. thy fayr maynteyn and swete countenaunce. what goode. what Ioye / and what playsure nor solace of Ioyefull remembraunce maye thou [Page] haue byholdyng vpon thyse thinges / What treys [...]nd grete sighynges / what complayntes callynges and lamentacyons dyde yssue that tyme out of thy swete brest w­han thou were in the highe lotfe of thy grete towres and sawe the see alle troubled and tourmented with shyppes and orys / ¶O right grete loue Importunate to who me alle thinge diffycile / semeth to be facile for to come to her entent how hast thou so grete strengthe ouer the corage hu­maine. This dydo for to serue the nowe fonndreth all in teeris. after parforceth herself by praiers and after submytteth hersilf to alle daungers / and to alle thinges dyuerse. leueth nothinge how strong that it is. how sharp. harde nor grete / but that she wyl parforce herself for to experimente them alle or euer she delybere herself vtterly to the dethe / After she dyde doo calle anne her suster germayne and to her recyteth apart of her sorowe and with grete rewthe byganne thus to saye vnto her / Anne beholde and see how this folke haste hemself & assemble from euery syde in to the hauen they haue draw­en vp alredy theire hyghe saylles vpon the grete mastes of theyre shippes alle spred abrode ayenst the wyndes desirynge and waytynge after the storme for to lede hens the nauye alle attones whiche they haue garnyshed wyth floures and garlandes and with crownes in sygne of Ioye & gladnes that maketh my sorowe and heuynes to be moche the greter / Allas yf I had well thoughte to haue fallen in the Incon­uenyent where I fynde now myself ynne I wolde haue pur­ueied therto in suche wise / That I shulde not haue come by noo waye to thys greuouse tourment of mortalle sorowe where I am so ferre come In to the bytternes of grete my­serie / that by noo wyse I can not bere it noo lenger / socorus to the must I thēne seke my swete suster & my right dere frende / [Page] saue my body. saue me my lyf. and for to doo this I praye & requyre the. that one message only it playse the for to do for me. towarde that traytour. that man of euyl corag. that hath loued the gretly / and hath vtterd his secretes vnto the entierly so that thou knowest this condicōns & his dedes / the places / the houres & mouementes and the oportunyte of the tyme moost propy [...]e for to speke wyth hym. Goo thenne and ne my suster wyth all humylite / to requyre myn ēmye mor­tall the false eneas whiche is ayenst me so fyers. shewynge vnto hym pietously / how I haue not be in no wyse / thynkinge nor consentyng in the cursed yle of Aulite whan of o­ne assente all the grekes folke swore that troye shold be distroyed / The harde conspyracion of the same grete excysion was made ferre from my lande. and neuer socours ne com­forte by me nor of my supporte was gyuen to theym for to doo that my shippes nor my armye were neuer sente thyder for to gyue greuaunce to the twians / nor neuer of me came euyll vnto them. nor no thyng that was to theym nuysible Also I haue not rented vyolated ne broken the pyramyde of his faders sepulture. I neuer dyde amys. nor neuer offended ayenst hym / wherby he ought to leue me aside / Infestaūce obprob [...]e ne vytupere to anchises whan he liued that called hym fader of Eneas. nother to his soule after his deth / we­re neuer [...]on of my behalue / Alas why suster in shewynge thyse thynges vnto hym / wyte of hym / why he hath me in suche indygnacyon / that he refuseth to lene his eeres / for to vnderstande my wordes. that ben soo iuste and resonable. as thi self knowest: O he wylle now goo soo hastely atte this tyme whiche is so daūgerouse / atte leeste that it maye playse hym to graūte a yefte to me his sorowfull loue. that is onely / that he wylle tarye and dyfferre his departynge vnto [Page] the newe tyme / that the swete wyndes shalle putte hemselfe vp in pacifycacōn of the see pestilencyall. that then̄e shalle permytte hym facely & lightly for to do his vyage safly. I do not somone hym for taccomplysshe his premyse simulatyue of the mariage of vs two / nor yt he leue his purpose for to goo in to ytalie / but I requyre only that he putte this thyng in delaye for a certayn space of tyme / Duryng the whiche I may induce my self to sorow & that infortune admynystre to me my sorowes by proces of tyme one after a nother wythout to suffoke me now vtterli in to the depe see of a­maritude wythout ony reysing / so doo I praye the my suster hauinge of me remēbraūce / that it playse the to goo & make vnto hym this my present requeste / & thus doynge I shalle make the myn heyre to enioye & receyue after my deth ye re­nues of all my londe

¶How eneas brake the oken tree for the grete loue of dydo Capitulum xxii

The whiche thynges thus sayd by dydo. Anne her s [...]ster went incontynent towarde eneas to make vnto hym her feble legacōn. the whiche he wold no [...] graūt by cause that the dyuyne cōmaūdementis inhibytores that had stopped his eeres of pite were cōtrarie to the same. and many goynges & comynges were there made of the sayd ā ­ne from one parte to thother / that fynably were all frustra­toire / and percisted eneas / like as a grete oke tre ātyque & inuetered of many yeres among the grete stones harde stron­gely roted. whiche is ofte caste of many wyndes & orages wherof the foure wyndes happen ofte to assemble togider one ayenst ye other for to ouerthrawe hym doūe & wyth their grete blastes taken his hie braūches whiche they shake & bowe ū ­to ye groūde / & make hem to braye & [...]rie by impetuouse moe­nynges tendyng to distroye hym vtterli / wherof ye gret trone [Page] aūcient that the more that he is olde / hie braūched / spacyouse & grete. the more thicke & depper ben his rotes spred wyth in therthe & related bytwyxth harde roches. abydeth euer styl ferme & moeueth by no wyse. In lyke wyse dyd semblable Eneas that how be it ye he was strongli impelled in his corage by ye persuasiōs & harde lamētacōns confyte in pietous tee­res rēnyng doūe the swete face of dydo / that he somoche derly had loued. & by her was restored from deth to lyf / from āguisshe & calamyte in to right grete prosperite / wherof ye remēbra­ūce greued hym ryght sorowfully by incytacōn compatyble whiche admōnesteth hym to socoure this dolant lady / the whiche by her suster maketh hym to be induced to doo the same / by many exhortacōns & pyetous remōstrances excytati­ue of all well wyllyng noryce of loue in dylectōn mutuelle of swete charite / condolaūt ouer them yt ben affliged / all this nethelesse the resolucōn intrinsque of his courage is euer reduced to thobeyssaūce of ye goddes & to their deuyne cōmaūdementes. the whiche all thise thynges reiecte from hym he enterprised for tacoomplysshe after his power:

ANd what wylle ye swete fenyce foūdrynge in teeres / ye for ony thyng that she may saye / do or thynke can not cōuerte the courage of eneas. she taketh her re [...]ours to wyshe deth. ouer moche noyeth her to lyue lenger in this worlde / fleeth all mōdayn playsurs / fleeth recōforte & all companyes fleeth ye palayces & her chambre arayed. fleeth ye lyghte of ye daye / fleeth the sone & the heuyn shynynge / In her closet hideth herse [...]f sore sighyng makynge grete sorowe. But yet for to augmente more her sorow in desperacōn. thus hid & makynge her secret sacrifyces wyth ye lyght of the fyre brēnyng & ē flamed vpon her pouldres of frakenceus wherof she decored her oblacōns for to Immole byfore thawtres of her temples [Page] she sawe & aperceyued horryble thynges that made her fulsore affraied moche more than she was to fore / that is to wite the holy waters dedicate to the sacrfice. became blacke & obscure & chaūged in horrible licoure. And also apperceyued how the good wynes of swete odour ordeyned for the lybacions or washynges of the sacryfices were cōuerted & tourned in spece of bloode cruell all dede & almost rotyn. whiche for certayne was to her a harde thinge to beholde / wherof agrete malencolie enuaded thēne her herte & her wittes all ynoughe troubled of the thynges precedent / whiche thinges she kept clos & shet­te withynne the shryne of her sorowfull thoughte without to notyfye them to eny body lyuynge / alle were he neuer so gre­tly her frende. not oneli to her suster anne that afore had well knowen all her secrete thoughtes & other pryue thinges. a­monge the whiche she hadde a lytell sacraire of marbell ma­de in manere of a temple in remenbraūce of Sycheus that his brother pygmalyon had pu [...]te to destruction / whiche du­ryng the maryage of hem two dede haūte there full oste / and made it to be welle ornated & hanged with fayre tappytes white. & crowned well rychely with crownes of golde well enameylled & right curiously & proprely kerued / & of other somptuouse thynges in grete honoure & reuerence / out of ye whiche sacrayre wthin the temple aforsayde: after that this dydo had vtterly submytted & dedicate her self to eneas out of the place of maryage in brekynge her first feithe promysed to sycheus / her semed that she herd come ther out often some veyces of her sayde late husbande Sycheus hym complayn­ynge and blamynge her by cryes and lamentacyons in right grete wepynges & quarellouse plaintes / and after at­te euen about ye gooyng vnder of ye sōne whan ye derk night taketh ye landes vnder her gouernance / she beynge alle alone [Page] in her sercrete and pryue houses / vnderstode & herde at euery owre the owle. whiche is a byrde fleyng by nyght ferynge ye lyghte of the daye / wherof the song termyneth in pyetous extermynacōn whiche dooth quake & fereth thertes of the here­ers & constristeth theym wyth a sorowfull mynde. wherby it is sayd that he is a byrde mortalle or otherwyse denoūcer of mortalite. And cōuerseth often in the chircherde vpon the temples & symulacres. & in places that ben solitare & pestylē cious / this byrde aboue declared. cam almost euery nyght vpon the temples & hie pynacles of the palayce & cyte of elysse in syngyng of fyne manere in grete draughtes & of a longe brethe his right sorowfull songe / soo that ryght often he moeued of dydo the corage in to grete teres & sobbynges malencolyouse full of trystesses & merueyllouse thoughtes. and of another side come to her remembraūce the grete iustyces & dyuynacōns presagyous & aruspycyous vnto her tolde & sō tyme denoūced by the anguryes & prenostycatures of her harde and aduerse fortunes. that to her were frustred / wherof the most parte she had well knowen & approued to haue ben veritable / that contryste her alwayes to sorowe more than afo­re / After whiles that she is lieng in her bedde wenynge to slepe & take some reste. horrible dremes & cruel comen to fore her in hir mynde / that tormente her in tremoure merueyllous her hert semeth somtyme that eneas foloweth her of nyghe. as alle forcened replenysshed wyth rage & tormented in furoure for to distroye her & vtterly subcombe her in to persecucyon extreme / And after seeth herselfe lefte all alone wythout com­panye. goyng by longe wayes dystroied deserte & vnhabyted as a woman loste vagaūt aboute the landes vnknowen to her / where she goeth. After wyth this dreme cometh to her aduyse that her cyte and landes of Cartage are all dystroied [Page] and tourned in exyll / wherfore she fleeth for doubte to be ta­ken and retourneth towarde the marche of thyr wenynge for to come to a place of sauete but sodaynly cōmeth tofore her in her remenbraūce the grete Iniurye that she hathe doon to the tyrynes / withdrawen theire folke and taken theire goode and alle the rychesses of sycheus / the whiche to be had pyg­malion kynge of alle the lande made hym to be slayne and mordred falsly. wherfore she doubteth lest asmoche shulde be doon to her yf she went thidre. And thus she remayneth in this poynt desolate without eny hope of some refute to haue as all tourned from herself for grete sorowe in to a rageou­se franesye. euen thus as was the sone of pantheus cardy­nus whan in his grete furyosite was conuerted and tour­ned by Acho out of his witte. so that hym semed that he sawe the felawes of the Emmendes and alle theire excercyte / that is to wite Thesypho Megere and Atheleto thei thre furyouse goddesses infernalle incytatyue to alle euyll thynge that dystroyen and bryngen alle to nought kutten and choppen / breken and marren alle the werke and subtyll artyfyce that men haue made / Clotho and also Latheser that neuer ceassen to spynne and weue / To sette to gyder and to coagule alle natures for generacyon / Wherof are produced alle the creatures that out of the erthe ben heued vp to the ayere. Of another syde she sawe also to her se­mynge two sonnes shynynge one by another that presen­te hemself by symulacyon wythin the fantasme of her enten­dement alle troubled in grete confusyon of dysplaysures and sorowes excessyue. alle dyuerse in contrary qualyte / And ye two thebes grete citees merueyllouse that appieren in aduy­sion to be bifore her eyen / whiche to her semyng are bothe proprely one lyke another / How be it that there was neuer [Page] but one whiche akyng of grece called cadinus made sotyme that foūde first ye lettres & the arte of writyng whiche he sent in to diuerse coūtrees. & pryncipally in the land of fenice where he made scriptures grete bokes & cronicles / lerned the fol­ke to rede & to write / wherof right grete lawde was to him at tribued to haue foūde by subtyll artyfice suche a manere of waye that men may doo knowe all his wille & notyfie it to whome he will. by one symple lettre. be it nyghe or ferre. be it of peas or of were of amyte. or of eny other thing / without to departe himself from his place but onely by a messager whiche is sent ther / whiche haply shalle knowe nothing of the matere / & alle be he dombe or specheles yf he take the lettre vnto hym whome it is dyrected vnto howe be it that he were atte roome or in nauarre in hongary or in englande he shall therby vnderstande the desyre of hym that hath sente suche a messager vnto him / wherbi yet atte this owre with a good right & a Iuste cause is lefte of the god cadynus here in er­the his grete loenge and good renōm [...]e that neuer shal be eytyncted nor anychiled nor here after abolished. But in to­ken of this that the first lettres wherof he was inventour. came out of fenyce equypared to purpre coloure. By cause that in that countrey were the pourpre clothes fyrst made and the coloure founde / We wryte yet in oure kalenders the hyghe festes wyth rede lettres of coloure of purpre / And the grete capitalle lettres of the bygynnynge and princy­pal of the psalmes and chapytres wythin oure bookes ben alle mayde fayre ther wythalle ¶But yet the grete trybulacon of Elysse is equypared to that of horrestes the sone of Agamenon welle ofte recyted in the comedies senoyses makynge mencyon Howe In sy­gne of vengaūce of the dethe of hys fader And turpytude [Page] dyshonest of clytemestra his moder after thoccysion of her & yt he torned himself in to furrosite. him semed yt he sawe incessan̄tli his saide moder clitmestra / or ꝓserpine of hell the gret goddesse / or the moder of ye emēdes that I haue named aboue all enflamed in ye face with fire brēnyng / & the hed all full of right grete serpentes. graffed there vpon as thike as heerys that pursued hym at alle houres in alle places for to dis­troye hym in makynge vyndicacōn of the deth of his sayd moder / And forto distourne & haue himsef a side from there waie / was cōseilled by piladis for to goo or transporte him self in to delphos & to flee anone hastly all streighte vnto ye temple of appollo / the wiche horrestes trowinge by this subtyl meane to be escaped / whan he was come byfore ye gate of the sayd temple or there aboute / he fonde the forsayd goddesses infernall that sette there ouer thentre of the sayd temple as a waytyng there after his comyng. Whiche was to hym more greuous a thyng than it was a fore / wherby he lost thenne the hope of his entent / The sayd elysse vaynquysshed & ouer­come of the grete āguysshes sorowes & heuynesses whiche dyde flowe at her herte in grete haboūdance one vpon a nother / as admonestementꝰ & incytacōns whiche somone to procure ye deth / proposed then̄e to haband oūe herself & vtterly determyned for to deye / & dyd delibere in herself of the manere more hōnest / & of the tyme couenable to ye same. ho. v & in what manere she myghte do hit / & shortly expose herself to deth / & she beyng in this tryst thoughte. after her cōclusion taken & her fayt arrested / sent to her swete suster anne for to come toward her / & couered her tryst thought wyth a manere of gladnes ynough not willyng to manyfest ne bi no wise to declare vnto her the caas nor the cōclucōn yt she had taken of her deth / but assone as she was com went & said to her in this manere

¶Of the wordes of dydo to hir suster nne. Cap̄ / xxiij

MY right dere suster & parfite frende: wil ye reioysshe my corage to the recōfort of my sorowes & bitternes. Veryly I haue enquyred yf it were not possible for to fynde somwaye to pease & make swete the grete euylles wherof I am esprysed & to departe myself without heuynes from the gre­te loue that I haue to eneas. or to make hym to remeue & retourne toward me without tarynge. & so moche I haue doon by my dilygent inquisicōn / that I haue fōnde a thinge ryght merueyllouse / It is trouthe my swete suster that about the lymytes of the grete see that men calle occeane in the marches or the sōne goynge vnder right nyghe to ye place where he lyeth at the endes vpon his last part of therth there habitable where cōuerse thethyopes is a certeyn cōtr [...] of habitacōn merueyllouse where as men sayen the grete athlas yt susteyneth vpō his sholders thaxtre of ye moeuyng of theuen with his sterris brēnynge that maketh hym to moeue & tourne to what syde that he wil / maketh hys princypall duellynge. In this place thēne wherof I telle you. as I haue be aduertised. is a right holy woman whiche is a prestresse & wardeyne of the faire temples of the Operydes whiche are the doughters of athlas / she is theirt maistres theire tutryce & techer that lerneth & enterteyned hem / & incyteth & techeth them for to doo sacrifice to ye goddesse / & for her grete witte & knowynge & al so for her grete sciēce that be knitte togider with ye experiēce ye she hath within her of all thinges / was taken vnto her ye cure & gouernemēt of ye tendynge & of the norryture of ye fiers dragon that had that tyme the kepyng of the holy braūches of the tree with golden frute that bare apples all of golde / & prepared to hym his mete alle after his cōplexion somtyme wete thinges humyde whan he was wexed lene for to ha­ue hym soone vp ayen▪ Another tyme powdres and [Page] graynes of poppy & other seedes. for to make hym soone a slepe whan he was ouermoche traueylled / and admynystred to hym his metes after that he was dysposed / This lady knoweth many thynges / and emonge other wyll vnderta­ke and promytteth by her sortes and charmes to deliuer pu­re and playne the affections and courages that ben boūden and enterlaced in loue one towarde an other to them that she is playsed. and hath theym attones wythoute prolongacōn ne taryeng from ye grete loue merueyllouse. and to the cō trarye putteth loue sodaynly in to theym that happely thin­keth not vpon. But yet this is a lityl thynge to the regarde of the other grete artyfices and werkes that she can doo. as to tarye & areste sodaynli the flodes & grete ryuers that they goo no ferther doune. And make their bygge stremes ren­nyng to remounte vpwarde. the sterres also and all the fyrmamente she maketh to retorne abacke / the soules pryuated & lowe that be descended in to helle constrayneth theym often by nyghte tyme to speke wyth her / she maketh therthe to calle & crye. whan she tredeth vpon and somtyme tourmenteth it in so dyuerse manere that she all to shaketh it & pulleth ou­te the grete trees & maketh them to falle don̄e from the moū ­taynes by her grete wyndes & terryble orages & tempestes yt she draweth & sendeth in to dyuerse contreys. But I swere to yt my dere suster germayn by alle thy goddes & thy hede debo­nayr / that in all thartes & scyences magicque wherof this lady & prestresse ētromytreteth hersef / I wolde neuer sett my selfe therto nor enquere no thing therof / and this that I haue ē ­terprysed for to doo / it is by grete prayer & cōstraynt & in my body defendyng / alwayes sith yt I haue ēterprised fermly my wyttes therunto / it byhoueth me then̄e to doo ye all that therto apparteyneth for to brynge better oure werke to an ende / [Page] And bicause that it is of costume & necessarie to haue euer fyre without ceasse I requyre the my swete suster & praye that in som place of my palaice moost secret. that men be not aware of it. thou doo agrete fyre to be made / And the armures of ye mā without pite ye false eneas for whome I calle alas yt euer he was borne / whiche he hathe lefte hanginge in my chambre with alle his habilimētes & other thinges his of owne lefte behīde in my priue closet [...] where I was perisshed & lay many a night he & I togider. must alle be cast in to that grete fyer for to brenne & conuerte theym in to asshes / as doeth telle & cōmaūdeth that woman of grete sciēce / that men must doo perishe & oblishe distroye & take alle out of memorie alle yt is abiden behinde of that traytour & cruell approued

¶Hw dydo in grete bewayllynges praied her suster to make a grete fyre in a place moost secrete of her palayce for to brēne the harneys & raymētes of Eneas / & bow by dyuers sortes she wende to haue dystroyed him. Capitulo xxiiij

AFter yt whiche thinges dydo kept herself still without eny wordes more to speke all pale & discoloured as a body yt is takē out of ye erthe or fro som grete & sodaine peril wherof anne her suster was moche abasshed / alwayes she doubted her self in noo wyse yt her suster wolde entende to doo a newe sacryfice yt afore yt tyme had neuer be doon / yt is to sacryfye hir self with funerailles mortalle by fyre horrib­le & knewe not yt she was accensed nor esprised in her corage of so grete afurour nor yt her sorowe had be wers / than was that: that she suffred atte the dethe of her late husbonde Sycheus. And went and determyned her self for to fulfille the commaundemnt of her sayd suster Elysse. and to doo alle by ordre that that she had charged her for to doo / The whiche thinges thus doon of the queene dydo / willyng to procede to [Page] her sayd sacryfice. went to see the place where the grete fyre shulde be. kendled whiche she founde alle redy made garnissed with agrete quantyte of logges and vnder h [...]m and rounde aboute grete foison of drie fagottes & other small wood for to kendle the fyre lyghtly / & toke herself for to encence it and to susfoūge the place / And crowned it with garlandes made of herbes and braunches that men haue of costume to putte vpon the corces of the dede bodies vpō theyre graues and tombes and also ouer the ymage and fygure of eneas that she had doo make after the femblaunce of hym for to be brente ther with her. And toke the swerde that he had left with her that she hidded in the same place for to accomplysshe ye werke that she thought for to doo / Aftre she welde goo with the sayde prestresse to her sacryfice of magique that she had ordeined to be doo / and were the temples and awtiers welle pre­pared and garnyshed of oblacions and other thinges neces­sayre and conuenable to this present obsequye And thenne came out the olde witche of charmouse magyque in her ray­mentes made in dyuerse maneres alle her hed shauen for to fuldoo her sacrifyces / Atte the begynnynge of whiche she inuoqued and called thre tymes by hidous wordes thre hun­dred goddes infernall / and the grete habitacyon of hell sempyternalle wych their confusion / the moder of magyque in her triple proporcyon. and the thre faces of the mone that shyneth by the quarfours somtyme wyth two grete hornes and somtyme as it were cutte by the myddes / Another ty­me she appyereth alle rounde. wherof many one ben meru [...]yled / By cause that they ygnore the causes / the whiche yf they knewe theym they sholde not happely merueylle. Also from wythin it is obscured moche more in some places than in some other. So that men myghte saye that it encloseth [Page] that it is the tryple fygure of the vierge dyane. wherof ma­keth her Inuocacion this lady olde magicienne / And thus dooynge she dide asperse the place with the waters obscure venemouse and blak representyng the lycoure of the hydous fontaynes of helle / After she maketh to be brought to her certayne herbes freshe and newe mowen & taken by nyght w­han the mone shyneth with sercles of coper wherof the Iuse is passyng venymouse and of coloure alle blake And with this she taketh the lytell skynne that remayneth of the secondyne within the forhed of the lytell foole that must be scra­ped awaye from hys forhed whan he is newly borne afore that the moder lycketh it of / wherof after that doon he shalle not be knowen of his sayde moder / as it is sayde. so that she refuseth to gyue hym souke / as it were not her owne / And also it is named and called the skynne mortalle loue. bi cause that after the saide prestresse. the foole shal neuer haue luste to souke hys moder but yf she liketh or eteth the secondy­ing or atte leste that same skinne that he hathe in his forhede and men shulde saie that by the same cause shulde procede the moderly loue / yf it were not that inclynacion naturelle purposed ageynst the same / But alle that is sayde aboue made the forsayde magycyenne. Dydo beynge ther present that helde in her handes a grete stone alle rounde with one fote bare and the other hosse on / Alle vngyrde and vpon her knees as a vassall that doeth homage to his lorde of a parfytte co­rage as she that is redy to Immole herself vnto all the god­des in syght of alle the sterres that ben coulpable of her falle by their coniunctions and moeuynge and influences celes­tyalle that sygnyfye and denounce the dysposycion secret of the deuine prouydence / saynge. that yf ther be eny mercyfull god and pyteous that medleth hym to receyue and behelde [Page] the consideracyon of louers that maketh theim to enterteyn well togider wythoute varyaunce / that it wyll playse hym for his pyte to corrige and punysshe thoffence that Eneas hath cōmytted ayenste her. and wylle retrybue hym iustely alle after his demeryte. After alle the whiche sacryfices / oblacyons prayers & requestes thus made in grete deuocyon and affectyon synguler as aboue is sayd / and that the tyme after the daye is paste and goon whiche is couenable in all landes for the bodyes humayn that haue traueylled to take reste that thenne is to theym playsaunt and agreable. was come to his ordre / that tyme that the grete woodes and forestes / the see also / and all thynges that ben cruell & nuysyble take in hem selfe reste and slepe / And whiles that the ster­res ben in theyr courses well yocked / whan alle the feldes ben in silence. the byrdes / and bestes brute. and whan the grete poundes and ryuers alle thynges aquatyque / the busshes and the large playnes / and alle that the erthe conteyneth. a­re in grete ceasse and in reste vnder the grete mauntell of ye nyghte that gyueth triews to alle labours / and by slepyng maketh swete alle peynes and traueylles that men hath suffred afore / Alle this neuerthelesse / she fenyce clysshe or dydo that thenne abydeth desolate and alone wythoute companye can not by no wyse induce herselfe to gyue a reste vnto her e­yen by a lityll slepe. wherby she myghte aswage the presente anguysshes that she bereth atte her herte / but redoublen her so­rowes amd her trystesses enforce more vpon her / the fore loue reneweth hym selfe that torneth soone to madnes. whan it can not be recouered:

¶How dydo made her lamentacyons repreuynge the periuremente of Laomedon Capitulum xxv

[Page]THis lady by grete distresse tourmenteth & alto ren­teth her self. aftre she thinketh in her courage what she may do alas sayth she poure & wery where shalt thou mowe become / must I nowe thenne / sith that I am alle ashamed / that I habandoune my selfe and retourne towarde theym that firste haue requyred me and that I requyre humbly the companye of the myroūdes and of theym that so ofte I haue caste in to dyssdayne and refused to haue me in maryage / Certes I ought not to doo the same / and bettre it were to me for to folowe the nauye of the troyens and to submytte myself alle togydre to theire mercy / They haply shalle haue recordaunce of the grete aydes and bene faytes that ben comen vnto theym by me / For often cō ­meth in mynde to theym of good recordaūce the benefayttes that somtyme were doon vnto theym And supposed that eneas weld not haue me nor take me in to his shippe. ther shall be some of the oost. after that he shall haue refused me that shal be content to take me / but sorowfull caytyue & lost. who bringeth yt in to this folye / to thinke yt this might be / art yu madde or out of thi mynde. hast thou lost thi knowlege knowest thou not yt the troiēne folke is alle yssued & descēded of the forsworne laomedon / this laomedon was the first fader that dyde enhabyte the grete troie and brought there a grete nombre of peple that made right faire edifices. & also multyplied wthin alitell tyme in grete quantite & well grete in nombre for ye good polycie yt they kept & also for ye fertylyte of ye groūde of yt coūtreye / And by cause that laomedon was all ynoughe occupyed for to make ye palayces & other edyfi­ces intrinsique of ye cyte. & yt hym thought ouer moche diffycile & to lōge a thinge to make the walles closed roūde aboute ye towne. he made acōposicion with phebus & neptunꝰ yt ben [Page] goddis grete and myghty / by the whiche he promysed theym and conuenaūted by his othe to gyue theym a tonne full of golde yf they were playsed to make the walles roūde aboute the cyte of troye / The whiche goddes hauynge confydence in trustynge his sayd promysse dyde close hit wyth ryght fayre his and grete walles. And thus doon they somoned hym for to paye them that / whiche he had promysed theym / wher­of he wolde neuer doo ne paye ony thynge / And for this cause they submytted hym to suffre. bere & susteyne perpetuelly for euer more the detestable hate and reproche of a man for­sworne

¶Of the vysion that Eneas hadde for to departe towarde ytalye Capitulum xxvi

THis lady whan she dyde remembre the forsweryng of laomedon of whom the troians are descended ma­de grete doubte to folowe theym / and stryuyng wyth in her tryst thoughte to herself / sayd in this manere / Alas myserable sorowfull what may I doo now / oughte I to leue all the fenyces & theym that I haue wythdrawen from thyr for to goo wyth the troians. or that by puyssaūce & bi my hā de strongly armed / I shold geo to destroye their nauye. & brynge theym to perdycyon. wythout fawte I wote not what to saye. and me semeth to harde a thyng for to habandoūe my good subgettes whiche by well subtyl meanes & grete dif [...] culte I haue brought out of thyr and out of the lande of fenyce. to expose & bryng theym now sone in daūgers of the see & to the harde peryll of batayll / namly ayenste theym of Troye / whom they haue no quarelle / Verely whan I me aduy / seit is better that I deye as I haue welle deserued. And that my sorowe poure & myserable / be sone fynysshed by swerde. O what hast yu doon my swete suster germayne of my teeres & emense wepynges / yu hast ben the first cause of the [Page] grete furoure where I am now in / yu hast charged vpon my sholdres all the grete euylles yt I bere & supporte. thou haste absorbed me & reclosed in the grete see of amarytude / yu haste foūde me well pesible. but thou hast betaken me for to wer­re ayenst myn owne peas. yu hast broughte me from solysitude & remysed into resolysitude yu hast taken rest fro me & hast brought me in to ryght grete turbacōn / thou hast abolysshed my fraūchise for to entre in to grete seruytude. thou hast dyuerted my honour in to dishonest infamye / yu hast conuerted my cyte in fe [...]re & drede perdurable thou hast all puerted my wyttes & reduced in to madnesse & forsenerie / thou haste deliuerde me my traytour & peruerse enmye vnder hope of loue & benyuolence. what eyleth me tryst poure / weri & full of tee [...]ys. O fortune euyll fortuned / why haste yu not permytted me & suffred. that wythout forfayte or ony cryme / I myght haue vsed the residue of my dolaūt lyf chastly alone wyth­oute companye of man. as the bestes in the forestes doo lye as it apiereth full of ten all alone by theym selfe. Yf thus I had mayntened myselfe / I sholde neuer haue come ne falle in ye sorowes & displaysures / cōplayntes & clamours where I am now in all doled & of grete furour forsened / more than euer was woman of moder borne / vnto this tyme presente but I beleue veritable yt it is for to take vengeaūce of the feyth & of the grete othe that I had first promysed to my husbonde sicheus / whiche I haue violated falsly & broken wyl­fully / wherof I am [...]alle in grete tormente. replenysshed with langour mortall / Alas what harde destynacye happed to me that daye / that I was so ferre doled from my wytte & so madde to habandoūe my selfe to a man alone / For whom I haue lo [...]te all in a sōme / at one daye & at one owre / in somoche yt I abyde all alone wythout cōpanye habandoūed fro all comfort / thus made this fenyce her rewthes & her sighynges [Page] in suche a sorowe & so dolant termes yt she fowndred all in teeris / duringe the whiche aftre yt alle ye nauye of eneas was takled & well nyghe redy for to departe. ther appiered to eneas yt nyght yt he entred his shippe & was leyde a slepe a certayne god in ye propre fygure yt mercure appiered to hym first for to admonneste him of his departynge in suche manere of semblaūce of voyce / of coloure / of heeris of golde as well proporcyned of mēbres & fayre facion / of yongthe & of fayre beaulte yt sayde to him in this manere / O eneas ye sone of a goddesse / how art thou so moche forsened to take rest of slepe in this grete daūger wher thou art now ynne. knowest yu not ye fortunes & perillous aduētures yt enuyronne yt on all sydes seest not thou ye tyme couenable for to saylle & the swete wyndes propice / why cōsumest thy self slepynge without exploityng yt in thy vyage thou knowest not / what the fayre dydo prepareth for the / whiche is tourned in turbacyon thynkyng in herself what frawde or decepcyon or som grete myschef for to doo to the a greuaūce / why feerest yu not lest she doo yt to destruction sith yt she wyl brynge herself to the de­the thynke thēne what euylles what harde aduētures. what displaisirs & what grete decepciōs & iniuries she ymagyneth ayenst the / but more ther is yf thou departe not with all diligence thou shalt soone see the see alle couered wtth vesselles of werre with grete strengthe cōmynge ayenst the with torches lyght And cressettes esprysed of fyre brennyg for to brule and brenne thy nauye / And wythout respyte ne remedye yu shalbe dystroyed yf thou be foūde whan the pryn­ge of the day shalbe comen / Aryse vp quykly without taryenge and abyde here noo lenger / For awoman is foun­de euermore subtylle in alle her dedes / As sayth the fable / A grete daunger is thenne to the for whom she is thus / [Page] endulled and fallen in dysperacyon. to abyde in hyr iurisdyccyon nor to reside in her contree / And to thende that thou be not myscheued. yf yu loue me. thou shalt departe forwyth alle the whiche thynges thus sayd. the god of whom I haue spoken here presentely remysed hym selfe in to a derke clowde & vanysshed awaye sodaynly

How Eneas encyted the patrons & maysters of his shippes for to depart Capitulum xxvijo.

ANd thenne eneas all affrayed of his grete vysion. awaked sodaynly from his slepe / and then̄e he called to hym all the patrons & all the maystres of the shipe [...]. & incytyng the maryners for to departe in all dyligence he made some to hale vp the saylles. & thother for to drawe thancres / & made theym to take their oores in hāde. recoūtynge & shewyng vnto them all theffecte of his vysion / & how & by what rayson the grete god of heuen cōmaunded hym by his messager that he must departe ryght soone / And for to hast them yet more / he admonested them of newe for to sprede & dysploye the sayles & cordes yt were wythin the shyppes & to make soone redy all thappareylle & alle that neded then̄e for to departe incōtynent / alwayes recōmendyng hymselfe & all his / to this grete god of maieste that had thus incy­ted & somoned hym / and to hym sayd in this manere. We f [...]lowe the right holy god debonayr / whosomeuer yu be. in grete deuocōn redy for to obey thy cōmaūdementes ioyful & glade wythout extymacōn. and to the we praye deuoutely that yu be of vs conduyttor & benygnly helpyng to the prosperous dysposicōn of ye cours celestiall & regyon stellyferaūt / yf her moeuyng were trryted ayenste vs by pestyfere influences. & bryng vs sauffe & peassyble to the portes of ytalye. And a­none drewe out his swerde clere & bright & cutte asondre the [Page] cables that with helde the shippe within the hauen. & also made the mariners to rowe myghtyli for to be hastely thens the whiche with alle dyligence forced hem to putte or sette their orys to the see that soone was couered with the nauye that saylled partyng the waters asonder whiche semed brayenge right Impetuously by the tourment & flagitacyon wherof the see was bette in righte grete violence by the opressions of the shippes that opressid her in their saillyng. so yt thei carfe waie in the water / & yet the oorys that entred within her entrailles smotte asonder her aūcient wawes whiche she myght not suffre nor pacyently bere / but reputed it to be doon in opprobre and confusion iuhomynyouse and full of despyte / wherof it happed soone after that the see wexed right sore inpacyent & indigned. Wherfor they suffred moche whan the see was well chaffed and by their fayte ayenst them sore moeued. as it is more playnly spoken in the. v / boke of eneydos where as the harde & sorowfull admyraciōs that thēne made palmyerus yt was maistre of eneas shippe. ben declared. whan he myght not withstande ne contreste the tourment fortune & tribula­cion of the see but that she was maister ouer him & gouerneresse. and was constrayned to habaūdoūe alle his nauye to the fortune. that cast hem in to the ysle of cicyle wherof was kynge atte that tyme accestes comen of the lynage troiāne and ther was be grauen anchyses the fader of eneas that deyde in makynge the vyage from troye in to lybye / And alle thus they left the hauene of cartage takynge their way toward ytalye / But or euer they coude make alle these dilygen­ces for to departe. And that they were as yet nygh the hauen in syght of the cyte / And that the fayre lady Aurora that holdeth the spryng of the daye enclosed wythyn her chambre wyth her swete spouse Tytan. Was rysen out of her couche [Page] well arayed. and had opened to hym the gate for to go sprede abrode his newe lyght to illustre & illumyne the lands & delyuer theym from the derknes of the nyghte / The quene dydo that was not a slepe seeng the first openyng of the daye sore besi to chasse the tenebres calompniouse away / arose vp lyghtly for to see out of her chambre wyndowes & loked towarde the hauen. whiche she perceyued all voyde & smothe wythoute ony shippe there / And after castyng her sight ferder towarde the see / she sawe the saylles wyth the slote of the shippes that made good waye. thenne byganne she for grete distresse to bete & smyte thre or four tymes wyth her fyste strōgly ayenst her brest / & to pulle her fayr heres from her hed as mad & beside herself / And spekyng to hirself / sayd in this manere ye wordes that folowe / O iupiter souerayn god and pryncipall of all other. shall thus departe saufly the false & euyl man eneas. that tratoursly hath mocked me & fraudu­lently seducted / Is it not to me well licyte to send after hym & by force of armes to dystroye hym and bryng alle to deth / And that alle they of my towne & cyte goo to confoūde and destroye hym alle at [...]ones / and breke and brynge his nauye all to noughte / God goo hastely and destroye alle inconty­nent / sette all on a fire. kylle & slee. and brynge theym alle to perdycion haue awaye thise oores & saylles. brēne & brynge all in to asshes / take hede that nothing escape. haue no mercy ne pyte of ony man that lyueth foūdre & droūe altogider in to the botome of the see & perysshe all in a sōme to thende yt of they [...] be no memorye nor no more spoken emong ye lyuyng peple vpō erthe / Alas poure dydo what sayst yu. in an euyl houre yu were borne. what thynkest yu doo / I trowe yt yu art ferre out of thi good wytte orellis taken wyth right e­will peruerse fantasyes. or that the goddes yt ben wythout [Page] te pyte & myserycorde wyll peruerte & retourne thy grete clemence in to furiouse cruelte / Alas it is not possyble at this houre that yu sholdest now ouertake them [...] but this thou sholdest haue doon that tyme that yu receyued theym. whan they cam first & arryued in to thy londe afore that ony alyaūces hadde ben by the made wyth theym / Men sholde mow saye of the now / that thou were cause of his goynge / and that he bereth awaye wyth hym the pryue goddes that ben of thy royame for to assyste to the obsequyes & consecracyon of anchyses his olde fader / and that he is departed wyth thyne assu­raūce / by cause that in no wyse thou hast not lett [...] nor ga­ynsayd his goyng openly / whan he dyde make his appareyl for to make redy all his nauye / whiche thyng thou knew & and was doon in thy presence / Myghteste not thou whan he was wythin thy royame & wyth the. haue dystroyed his persone and his body to haue ben hewen in pyeces / and also his felawes to haue ben caste in to the depe see / And in ly­ke wyse his sone Ascanyus myghtest thou haue made to be alle tohewen and chopped smalle And to be soden and dressed as it had be good mete for to haue made hym to be eten of hys fader / And to haue sette hym in stede of other seruyse atte hys table / And yf he wolde haue be wrothe ther wyth and moeued werre ayenste me. Howe welle that the fortune of baylle is doubtouse. Yet nethelēs I myghte haue doo brenned his shippes / and conuerte hem all to asshes. to thende they myght not haue gon for to purcha­se ony socours / And durynge the same I myghte haue do­on brynge to the dethe the fader aswell as the sone wyth all their parentes and frendes of all their lynage and myghte haue slayne brent hem or otherwyse haue doon wyth theym after my playsur & wyll. and then̄e wythin ye fire I myghte [Page] haue cast my self for to be ded after yt I had be auēged of his falsenes & oultrage / O fayre sōne yt shynestste full bright ye illumynest with thy beemes all ye werkes & operacions of ye erthe / O Iuno the noble goddesse vnder whome alle werkes & operacyons humayne with their solicitudes are gouerned and submysed after theire disposicion euerych in certeyne or dyaunce to theym sette & stablyshed by thy deuyne prouydēce highe puissaunte grete patronesse. lady and mastresse of alle artes and seyences magyques ryght often called with voy­ces vlutatyue by the grete quarfours and by wayes within townes and cytees and ellis wher / In tyme of nyght obscure / O crulle vlt yces wycked vengeresses / Furyes infer­nalle and Iusticers of helle O alle goddes & goddesses haue pyte on me sorowfull Elysse concluded & delibered to the deth to ye whiche I goo delyuere me vnto / Entende to my wordes and enduce the cruelle goddes to punyshe the euyll men as they haue deserued / & playse you to receyue my prayers & oracions inuectyue yt I doo make presently to you. yf it be so yt the sacred destynacyes of ye souerayne god Iupyter haue or­deyned that that traitour eneas & vntrewe man shalle come saueyl in to som hauen for to descende alonde hole & soūde or yt the ende of his lif be not yet come to his terme yt prefixed was to him atte ye first tyme of his birthe at lest I prai you & requyre yt he may be vaynquisshed & recoūtred of hardy peple cruell strōg & rebell & alle c [...]trary to him. vexed broken & traueilled of grete batailles & assawtes / rebuked reduced & chassed from his lance and lordshipes / alwayes putte ther from without to recouere eny place of his lande whiche al­wayes be so stronge and myghty ayenst hym that he be expelled euermore ther from namely of Ascanyus his sone and prynated ouercome and exyled out of alle his kynnesmen & [Page] frendes. to hym also be gyuen by necessite to requyre ayde & socours wyth gret requestes & prayers / and yf it happen yt some other doo hym ony plaisur or som good he haue therfore a myscheffe sorow peyn & perpetuel myserye / In grete assawtes & in bataylles be he slayne & put to a cruel deth ferful & horryble / Alle his folke wythout mysericorde afore his eyen present. be put to anguysshe: & not mow socoure theym for to encreace his tormente / & whan he shall take ony triews or make peas or alyaūce / that it be all at his owne prayer in cōfucōn & greuaūce to his folysshe enterprise & his dysuaaū ­tage / to his gret vitupere hurt & charge / in somoche yt he may fall therfor in a rage & grete sorowe / And yf it be so yt god forbede. yt by his tryews or alyaūce / som londe abydeth wyth hym for to make there his residence. he neuer be in asuerte to soiurne there pesible / but all atones & wythout taryeng be he cast therfrom shamfully / & lyue like mendycaūt a poure lyf and nedefull / whiche maye come to hym sodaynly afore all other werke. Sooner than to be sure of ony goode fortune And that after hys deth wythoute sepul [...]ure as an ho [...]nde or other dounbe beste be he caste in to the depe shadowes of helther to suffre tormentes right horrible & cruel / this is in effecte that whiche I requyre. It is my request & prayer that to you I do make wyth an hole herte at the last poynt of my l [...]f whiche I doo offre to you / redy for to deye at this houre / receyue now ye my soule wherof I make to you a present / O ye tiryns & all they of fenyce yt enhabite presētly cartage. all your parētes & frendes alyed / & alle they of your affinyte that now ben present / And that are to be borne herafter. yf ye e­uer toke playsure to doo to me ony thynge aggreable I re­quyre and admonest you at thys tyme byfore alle other that ye haue and bere eumyte & mortall hate pardurable ayenste [Page] the false troiās yt goo for to cōquere & wynne Italie. And yf it happe by ony wyse yt they may haue dominacion & cōquere by theire puissaūce som lāde or region / I exhorte & admo­neste you to make eternall werre ayenst theym / this reque­ste & ordenaūce yt I make vnto you now it is my bequest it is my testamēt & my last will. my cōdicylle & my willyn­ge inreuocable & permanēt. And to thēde yt yf by som wyse ye wil not accōplysshe it or that your children after youre de­the wold putte hit in oblyuion / I haue ordeyned & stablished that hit shalbe writon in ha [...]de stone wherof my sepulcre shalbe closed & right nyghe my bones it shalbe sette vpon my visayge. to thēde yt it shal bere testymonage ayenst you. yf in eny wyse ye putte hit out of memorie / yt god forbede it shulde so come to / but deffyaunce without to haue peas and wi­thout benyuolēce werres / discordes & batailles I wyl that ye haue euermore with theym / for of my bones & of myn asshes after yt they be rotyn in erthe. shall yssue atte leste how longe some euer hit tarye a vindicatour and a man of ryght grete courage & hardinesse / that shall auēge this grete treison of ye false eneas & of all his folke whiche shall blēne[?] hem all in a fyre & in flāme & shall slee & destroie them in diuerse manere som by wepen ye other by hōgre som shall he drowne in ye see some he shall make to be byhedde & theire mēbres to be brokē & all to hewen ye other to be hanged / & the other within his prisōs shalbe flain from hed to fote ye other he shal doo cast o­ut of ye widowes doū to ye pauemēt & to other he shal make theire eien[?] to be pulled out. & many other euylles he shall make thē to ēdure. theire townes theire castelles. cites lordshipes & possissions he shall take / theire captayns of werre knightes & barons he shall doo destroye & banysshe out of theire landes. & shall tourne them in to grete mendycyte. Theyre [Page] wyues that thenne shall be come to the astate of wydowhed their doughters & also their children / their grete treysours & all that they be worthe shall be rauysshed. habandouned / ta­ken & departed in to an hondreth thousand shippes / chassed caryed & transported & exyled from theyr contrey / and putte oute of their nacyon / the one slayne. the other in prson in right grete seruage & captyuyte / they shalbe solde as wylde bestes / iniuried defoyled & beten / Theyr fay [...] doughters & their vyrgynes shall be habandoūed to men by force & deflow­red / and to a ryght grete shame deliuered & vyolated ayenst their wylle. A hondred thousande euylles shall be appareylled for theym more than men can recoūte ne telle / Thenne shall my shame be socoured & the ma [...]ulates taken from me by Hanyball that shall be borne of myn asshes / whiche shal be a man of grete power & of grete renomee / preu hardy & cheualrouse aboue all men yt shall be in his tyme. so that me more shalbe therof as longe as heuyn & erthe shall last. but in ye meane while I make a request to you all / & after to your children whan they shall be borne & to all their lygnage yt of theym shall come vnto thende of the worlde / that they make werre by armes & by bataylles / by see & by londe / by assawtes & shippes ayenst yt traytours troians aslonge as they shall lyue / & that ye see whiche is in oure lond & the ryuages & portes & the wawes be to them repulsyng cōtrare & rebel euer more. thise thynges sayd by dydo enraged from hir good wytte / troubled in courage more than euer she was esprised fro all partes. sekyng meanes moost subtil to thē ­de of her myserable lyf. whiche she can support no lenger soo weri she was of it / wyllyng to fynde som meane to voyde oute of hir castel all them yt were there / as she had of custu­me whan she wold do sacrifyces. & yt she myght abyde alone [Page] for to delyuer herself soon to deth / & yt she were not ēpeshed there frō / she dyd call psently a good olde woman ye made herself to be called barthe / ye whiche long tyme afore whan she dwelled in thyr was noryce as it was sayd of hir late husbond Sicheus / and kept herself yet alwayes styll wyth the sayd E­lysse / as are wonte to doo thise aūcyent good ladyes wyth theire firste mastresses. but she called not her owne noryce yt had kepte her in her childhode. by cause that she was decessed in the regyon of fenyce. And sayd in this maner to the for sayd barthe for to be ryddyd of her. My good moder barthe goo lyghtly towarde my suster anne & telle her that she ma­ke hast for to rise & araye herself as it was of custome whā men wolde doo sacrifyce / and that she brynge wyth her prōptely the shepe & other bestes wyth the other pynacles dedyca­ted to the sacryfice. that long agoo I dyde shewe to her / And also it behoueth of thy parte for to admynystre the werkes. that thou take the vestymentes & the myter vpon thy hede for to fulmake thoblacyon to pluto the grete god of hell ad­myrall of the styge / whiche is a grete poūde of fyre brēninge that renneth thrugh all helle / composed & made of brym­ston & of pitche / this immolacōn I haue purposed to doo vnto hym wyth my besy thought for to put an ende my grete tribul [...]cōns & care ēnuyouse / for the whiche cause I wylle kindle a grete fire for to brēne the raymentes of eneas his ymage yt are lefte wyth me / wherwyth I shall do sacrifyce to [...] grete flood infernall. to thende he be moeued wyth hate a­yenst hym / whā by deth his trist soule shalbe delyuerd to him after thise thynges. this said barthe went hir waye hastely as her olde age myght suffre it. & lefte there her mastres dido ye quyuered & shoke of grete rage & ē [...]red into a grete frāsie desiryng taccomplysshe ye purpos of hir deth / wherof ye dred­full remēbraūce redy to be executed. troubled hir in suche wyse. [Page] that it made all hir wyttes to torne in to a wyked kynde and in a mynde for to destroye the first composicōn coagulate in couenable proporcion for the entreteynyge of the spiry­te vitall. wherof her fayre eyen greue and lawghynge were incontynent tourned in to a ryght hidouse lokynge mobyle & sangwynouse to see / the swete balle of the eye whiche is the veraye receptacle interyor of lyght visible / and Iuge of the colours by reflection obgectyf whiche she bryngeth vnto the Impression cogytyue of the entendement / wherof she maketh a present to the suppost indicatyf discernynge without in­terualle the differences abstractyue adherynge to theyr sub­gecte. was sone made obscure & her lyght empesched from the veraye Iugyng in parfyt knowlege / her tendre chykes and vysage that afore was playsaunt & debonnayre of sangwyne coloure to urnyng vpon white / becam alle pale sodaynly in hydouse manere & all mortyfied for the cruelle deth wherof the harde angwysshes had enuahyshed her alredy. & with grete furye betaken & cast went & moūted the degres sll highe vpon her palayce tyl yt she came ther as ye wode was assem­bled for to kendle ther a fyre. In whiche place ye habilemēts the bed & ye other thinges with ye Image of eneas & also his swerde. were brought for to be brēte & cast out of memorye the whiche dydo alle thus vexed & troubled in her wittes drewe ye swerde out of ye shethe for to murder & slee herself. b [...]t or euer she wolde doo this. she dide loke vpon ye habilimētes / the bed & other remenaūt. yt by other tymes afore had plaised her soo moche / & thēne she began somwhat for to lacryme & syghe vpon the bed where she put herself inproferryng her last wordes in this manere: O right swete dispoillynges plaisaūt well loued & honoured of me sōtyme aslōge as god & fortune wolde. I beseche you take my sowle and delyuere her out of thys care And from these sorowfulle peynes / [Page] in whiche I am absorbed in the grete viage of heuynes / I haue lyued vnto this tyme presente and haue fynysshed the cours of my lyffe that fortune had gyuen to me It is now tyme presently that the ymage of my semblaunce be sent vnder the erthe / I haue had of peynes and traueylles by my brother pygmalyon that made to deye cruelly my first husband sycheus. Wherof I haue ben ynonghe auenged by me and holde me content therof. I haue edified my cite fayre noble puissaunt and riche I haue seen the walles and batelmentes & the deffenses accomplysshed O felycyte merueillouse wherof I shulde be well happy and aboue alle other honoured well loued and holden fulle dere yf the nauye of the troyens had not come wythin my stremes of the see O hard cōmynge and cursed recepcion intrynseque / false daūgerouse and full of grete dispite. that hathe brought me in to confusion / O tryste machynacyon of trayson approued full of frawdulouse induction / that hath delyuered me to ashamefull dethe whi­che shall come to me sodaynly and presently without taryenge. And ascryed wyth a hyghe voyce saynge in thys wyse Must I thenne deye thus falsly wythout to be auenged of that traytour theffe and cruell by whome I am vitupered so sore and defyled Nowe thenne sith it is so I will soone deye hastly and sende my goost sodaynly vnto the lowe shadowes / I shulde deye more gladly yf Eneas were here pre­sent for to see the dethe and grete tourment that for hym I muste endure. to thende that he were therof contryste in re­membraunce pardurable aslong as that his lyffe shall laste and syth that otherwise it can not be I goo to my dethe whiche to hym shalbe inputed and represented by the inspeccyon of the grete fyre that soone shalbe kendled in this place /

¶Hw dydo full of grete rage and dyspourueyed of witte [Page] slewe herself with the swerde of eneas / And how be it that aboue is made mēsion of this ocsicōn. it was nothing but for to shewe the diuersite of fortune. And here the execucyon of the dede is shewed / ¶Capitulum xxviij

THe whiche thynges thus made & sayde without eny more langage / dydo full of rage seased thenne the swerde of eneas whiche she helde the poynte vpward & vpon hit dede cast her self so that the swerde entred within her brest vnto the bake of her / This lady thenne felle doune to the grownde sore hurt with a woūde mortall wherof she lost her speche labourynge sore harde atte the entree of her dethe so cruell / as many one doo whan they be atte the poynt of dethe that tormente hemself strongli for the harde distresse that they haue atte the partynge of the spyryte of lyffe fro the bodye that wyl not leue the membres pryncipall of whom he is susteyned / but yf it be by grete violence atte leste whan the cause is meanely sodayne & not all mortyfied attones all thus was this sorowfull lady founde on the gronude that coude not ryse her handes & her persone alle couered & defyled with blood without mesure & the swerde that dropped yet of bloode and alle blody laye by her. wherof a grete sorowe a grete crye and grete clamour was thenne attones sodaynly made thrughe alle the palayce that perced the walles & tours vnto the myddes of the toune / ther shulde ye haue seen make grete lamentacyons grete cryes / grete playntes and grete moone wymen wepe sighe & makyng sorowe & all ye peple was all forsened with wrathe / wherof the cytee was sore moeued in grete desolacyon by suche wise & forme as though ye en­myes capitalle of the towne had entred by force of armes wythin the same for to brynge theym alle to destruction. or as that the grete and auncyent towne of thyr that hath [Page] nourysshed theym. and the same cyte of cartage had be bothe embrased wyth fire alle kyndled in a flāme / By the whiche grete noyse and disaraye anne the suster of dydo that was goon sone for to make redy the thynges yt neded for to ma­ke the sacrifyce / vnderstandyng thenne well / that the sorow & grete moone that was made thrughe alle the towne. was for her suster dydo that had slayne herselfe / wherof she all at­ones forsened as a persone that ys madde & out of her mynde / toke herselfe for to renne as faste as she myghte passyng thrughe the multytude of the people that was there. smytynge her brestes wyth her handes & fustes and alle to cratched her face wyth her nayles / And cryed alle highe & pyetously made grete [...]ewthes. and lamentacyons / callyng vpon dy­do sayeng in this wise / My righte swete suster alas what haste thou doo / and by what maner & rayson hast yu broughte thi selfe thus to eternall perdycyon / and hast deceyued me wyckedly &. falsely wyth a bytter deth whiche I wolde glad­ly haue suffred & endured wyth the / Alas what nede was it to me to make redy the sacrifyces fyth that a fyre for all other obsequyes & a swerde well sharpe slyped myghte haue broughte the two susters to deth bothe ardnes wythout to haue be departed one from the othre. Alas what shalle I saye. ne what begynnynge maye I now take for to make my mone / Why haste you thus dyspraysed me that am thy suster and trye felawe. alle my lyf I haue honoured worshiped serued & praysed the and eke moche loued the. For to folowe the I haue alle habandouned / I haue knowen thy werke. I haue knowen thy wyll / and also thy secretes thou wolde neuer hide from me / Alas now what furye hath ta [...]en the atte this nede / whiche is the sorowe mortalle / for to haue caste me thus abacke from thy presence / by cause yt I sholde [Page] haue had not knowen this faicte. Alas yf I myght haue knowen thesame thynge veraye trouthe I wolde haue deyed with the / O what sorowe I doo supporte whan I haue lost alle my force / and noon ther is that me recomforteth. but of alle sydes is brought to me peyne & traueylle without me­sure / the grete wrathe and the grete care that wrongly and magre myself I doo endure whan I me recorde of the Iniure that my suster hath falsly doon. not onely to me / but hathe defyled vylaynsly the good name and the enhaūsynge of the cytee that she hathe coūmysed and submysed to a grete vilete & shame. for alle tymes shalbe recyted the enormyte of this fowlle befalle whiche euer shalbe imputed to a grete infam­ye wherof they of cartage shalle haue a blame yt shalle torne vnto them to a grete diffamye. And moche more bycause of theire good fame that was knowen / that had be well entreteyned and in grete worshp susteyned / yf my suster had mayntened and kept herself wythout dysperacyon / Wherof alle hope / aswell to theym as to me failleth by her yt hath exty [...]cted oure goode renommee & brought vs in a grete blame & nowe be we without pastoure. as the sheep that is habaū doūed Now thenne. sith that it is thus come / lete vs loke to her wounde and in her face yf she is thrughly passed / and thenne she toke her vp bytwene her armes and with ryght grete sorowe and heuynesse / wasshed the blode awaye from a­bout the sore and made it clene fulle swetly wyth hir owne raymentes / And perceyued and knewe that yet some spyryte of lyffe was wythyn the persoune of Dydo that forced her self for to open her eyen / And thre tymes ma­de her effort to reyse her self vpon her elbowe. But her strengthes sorefa ylled of the dethe that alredy hadde her alle in her rewle myght not therto suffyse but that she [Page] muste falle ayen attones vpon her bedde where she hadde be layd / And knowynge that she wasted alle awaye. she dyd forse her owne selfe for to open her eyen / to see the lyghte of the daye. that gryeued her sorowe well harde and sharpely and by suche a wy [...]e that she entred incontynente in grete peyne to the extreme angwysshe of the dethe where she was ryght longe / Wherof Iuno the noble goddesse conserua­tyue of yongthe that hadde pyte of the longe sorowe mor­talle in whiche was constytuted the fayr Elysse or dydo / sente towarde hir for to brynge atte an ende hir Immense trystesse hir noble messager named Yris / whiche as some sa­en is the rayen bowe wyth hir fayr cote of dyuerse fygures For to vnbynde the rotes of the spyrite vytalle from the membrees of hir body. Whiche were thenne in grete opposi­cyon and debate one ayenste another / By cause that the humydyte radycalle. and other complexcyons in proporcy­on conuenable coenclyued togyder. Dyde receyue the go­oste soo that it coude not goo there from by hit selfe wyth­oute ayde of other / Also that hir deth naturalle oughte not to hauen comen yet of longe tyme / But by accydente and hard [...] fortune / whiche is gladdely euyll and dyuer­se to theym that she byholdeth awrye. was broughte in to suche dysperacyon / not for noo crymynalle cause. not for noon other thynge wherof she ought [...] to suffre dethe / nor to endure ony peyne or sufferaunce / that she slewe her self And thenne after that arose proserpyne wyffe and spou­se to Pluto the ryghte grete god infernalle whiche hol­deth vnder her domynacyon the persones that be Inueterate of euyll dayes / And they that ben in grete sorowes to whom she admynystred alle the deturpacyons and the [Page] hardenesse of olde age / as to some while that they be sle­pynge / she setteth white herres on the grounde of their he­des. Some she maketh scabbed and full of ytche. the fee­te to be grete and swollen / And thenne the gowte or the poplesie. the stytches or the paralesye. The debylyte or feblenes / and of the eyen appayreth the sighte and replenysseth theym alle wyth teeres / and the lyddes of the eyen wyth fylthe. soo that whan they ryse in the mornynge they muste be wasshed wyth wyne or wyth some other lauatorye / And to other she maketh theyr memorye to wexe feble and conuerteth it in to ygnoraunce. She taketh from them the puyssaunce that they hadde fyrste and hath awaye fro theym furtyuely by proces of tyme all theyr strengthes one after another by cause noon shalle be aware of her for do­ubte that she be not deceyued. And after she maketh the­ym croked and boweth theyr bodyes. hangynge theyr hedes to the grounde warde alle full of care and as coun [...]refete aswell the men as the wymmen / to the whiche for to bere to theym a dyffame / taketh theyr fayr colour awaye. and maketh theym as pale as asshes / To other she gyueth rednes wyth a highe coloure ouer excessyue and dyshonneste. and the yelowe heres of theyr heddes she maketh theym to boke lyke rousset / or lyke the coloure of an olde bere / She af­ter shorteth theyr retentyue brethe. and molyfyeth in theym alle theyr bloode: And noon otherwyse it ys to be supposed. but that she doeth in lyke wyse of alle the remenaun­te / For she goeth ledynge alle in equall proporcyon. and maketh theym dystrybucyon by the temples and in the face of grete ryueles and fromples that putte oute the beaulte of the playsaunte vysage that she sheweth all wyth cordage [Page] aswelle in the nek as aboute the temples / We haue ther­of many exemples / Nomore therof we wylle now spe­ke / It is so lothely to here / Also well harde it is to me to telle therof that I haue sayde afore / but to thende that eny gaynsaynge sholde be Imputed ayenst me / to haue obmys­sed for to dyscute som of the condycyons and euyll opera­cyons of the cursed proserpyne that is more sore pryckyn­ge than the thorne / I haue sette thees here for to vnderstande the other better that men shalle mowe take In lyke con­formyte as it is recyted aboue /

¶Of the beaulte of dydo ¶Capitulum / xxix

THis proserpyne of whome I speke / how be it that of alle her werkes and subtylle artyfyces wherof she is wonte to vse had not in noo wyse wrought for dydo nor hade not yet enprynted in her persone eny sygne of olde age. nor other thynge wherby she shulde directely haue pretended vpon her eny ryght. Alwayes she wolde force her self to haue for her part the soule of Elysse / sayenge. that she had [...]e slayn herself by dysperacion as for cause of furye and of rage whiche is a thinge Inhumayne dependynge of the operacyons and wodnesses of helle that she herself hathe en­prynted in her persone. Wherunto she hathe subdued and submytted herself. Wherfore by reson she oughte to abyde vnder her / as we see by example famyler whan som body hathe sub­mytted hymself by oblygacion to the iurisdicyon of some Iuge the saide iuge is capable for to haue the knowlege therof how be it that to fore the oblygacyon was made / the persone was exempt of his Iurisdicyon. And aftre thees raysons and othre that were to longe to be recoūted proserpyne sayde that elysse ought to abyde with her as she that had submyted [Page] her self to her lawes and Iurysdyctions / But the fayre Iris that departed from heuene by the commaundement of the goddesse Iuno descendynge by the clowdes with her gylte feders at the oposyte of the sonne ornated wyth a thou­saunde colours / Came and sette her self vpon the hede of Dydo / And for an aunswere to the adlegacyons of Pro­serpyne. sayde to her thees thynges / Thys is of rayson wryton whan eny persone noble is in debate betwe­ne two partyes that the mooste parent heyre of the lyna­ge and that commeth of lawefulle yssue shalbe proserred afore that other partye. and shalle bere the name awaye wyth hym namely whan he is of the fyrste yssue / And also that he hath the gretter parte in the herytage and hath doon many aquysycions amendynges and reparacyons / ¶Now it is soo that the goddesse Iuno whos ryghte for to deffende and kepe I am sent hither / hathe produced in her beynge in this possessyons / that is to wyte Elysse wherof we vnderstande betwix vs two / And hathe made her to be borne hathe brought her to the worlde and hathe alymen­ted and noryshed her from the owre of hyr birthe vnto this tyme present / And hathe gyuen vnto her soo many fay­re yestes of nature / As is beaulte corporelle / yongthe well made of her membres eche in his qualyte and ryght egall in proporcyon without eny dyfformyte / the hede well sette by mesure vpon the nek fayre herys and long yelowe tresses. hangyng betwene two sholders to the heles of her / her forehed brod and highe ynoughe / the browes traytice and broun and the lydes of the eyen acordyng to the same. the eyen grene & open by mesure lawghynge and of swete loke afayre & well compassed visage ouer the forhede all ynoughe coloured / A [Page] meane noose not to grete nor to lytell wythout ouer grete openynge / A lytell mouthe with roddy lyppes / And atte the chickes two lytell pittes / & one Inlykewyse at the chynne / The tethe whyte / smalle and well Ioyned togyder / A rounde chynne that was not ouer longe. A whyte coloure with a byrght hew there with alle some what tendynge to the rede / the necke longe ynoughe by goode mesure bygge ynoughe towarde the lowest part and traytyse on the backe syde / the throte quycke and without spotte or macule / lon­ge armes and smalle. the sholders and the backe flat. the brestes well sette with a grete space betwix bothe the pappes that be rounde and sette of a heyght / smalle of body and large atte the raynes / The thyes harde and grete withoute eny blemyshynge / Fatte ynoughe aswelle the body as the membres / The legges well Ioyned and somwhat small on the noder parte / lytelle feet and smalle with the toes well e­uyn sette togyder / white vnder clothes and fulle swete and smothe of skynne / smale handes soupple and thynne with long fyngers and smalle and the naylles well euyn. swete voyce of fayre eloquence and well in langage sadde of behauoure and of symple contenaūce / plaisaūt for to see & reple­nyshed of all good condicyons. like as it were one of ye wy­men best accomplished ye nature had produced syth her begynnyng vnto that tyme. Wherfore thenne sith that thou proserpyne can not shewe noon other rayson but the sayde submys­sion wherof thou hast spoken here afore I saye for to kepe e­quyte / that ther was som deceptyon or frawdulent inducti­on that hath made her to condescende therunto as men may manyfestly apperceyue by the premysses a boue writon that see theym all alonge wherfore the falle well vnderstande well [Page] assoylled well & deffended may welle haue releuement / But a nother waye I shall take with the yf thou wylt be of acoorde and content / bicause thenne that after thy poure and myse­rable descendynge in to helle in the coniunction makynge of the with Pluto. Thy fayre heerys were tourned to In horyble and hydouse serpentes sette vpon thy hede I shall gyue to the theym of dydo for to make sacrefyces therwith vnto the derk shadowes and tygres infernalle / Yf thou wille renounce alle the ryght that thou pretendest vpon her Wherfore thenne Yrys made the fayre herys of dydo to be cutte and toke theym to proserpyne And thenne she toke vp on her selfe for to vnbynde the membres from the spyrite of lyffe wherof the hete was soone extyncted and was anone rauyshed with the wyndes that bare her awaye a grete pas and delyuered her free and quytte to that place after her de­meryte that to alle folke is propyce as it is ordeyned by the prouydence deuyne wherof the regne shalle neuer fynyshe /

¶how Eneas sailled & how by tempest he arryued in cecylle ¶Capitulum xxx

WHat shall I more saye of the quene dydo nor of her sorowe that she made nor also of the grete moone yt her folke made for her after that she was dede / But now I shall telle of Eneas yt went in to Italye for to haue the londe that ye goddes had promysed vnto hym / whan thenne they had rōne & saylled so moche yt they were in the highe see / a stronge weddre arose that brought to them agrete tem­peste soo that they wist not what they shulde doo nor saye & habaūdouned theyr saylles for to bere theyre shippes atte ye wille of ye horrible wyndes in whos power they were ye mayster maryner said after his semynge by ye sterres yt he sawe [Page] that they made waye towarde Cecylle. wherof Accestes was kynge / Whan Eneas herde thus speke the mary­ner. he was therof gladde / and sayd. that to noone other londe he wolde more gladdely goo. yf the goddesse wolde For Accestes was his frende. and of the lygnage of the Troians. And also the sepulture of his fader Anchises was there / Soone after ceassed the tempeste / and they saylled soo longe that they arryued in Accestes londe / that hadde grete Ioye whan he knewe of theyr comynge / And soone after that they were entred in to the hauen / Acces­tes ryght gladdely receyued theym wyth grete Ioye / Whan the morne come. Eneas spake to Accestes the kynge of the londe / and to his barons / and sayd to theym in this wyse / That the annyuersarye of his fader he wolde make and that he was ryght gladde that he was come there soo sone / And that he wyste welle that hit was the wylle of the goddes / Thenne ordeyned and aduysed Accestes and Eneas for to make playes of dyuerse maners abowte the tombe of Anchyses / Wherfore the yonge ba­chelers shewed there theyr prowesse. Tourned theyr hor­ses. and ranne and lepte / and proued theym selfe one ageyn­ste another / And atte this annyuersarye that Eneas dyde doo make for his fader / was made moche of prowesse For alle they that were there dide putte hemselfe in peyne for to doo well. aswell Eneas folke as they of Accestes

¶How Eneas toke the see for to seke the regyon of Ytalye: Capitulum xxxjo.

Whan they were comen ayen from ye sepulture of anchises theyr shyppes were set in a fyre & had ben all brēt yf it had not be a messager yt anoūced this to theym [Page] there as they were / And sayde / that the ladyes that were within the shippes hadde set theym In a fyre / Bycause they wolde fayne make there theyre dwellynge place for they hadde ben seuen yere and more out of theyre countreye and were sore wery and broken of theyre longe vyage ¶Whan they vnderstode thyse tydynges Ascanyus that was sette vpon a ryche courser went with other in hys companye and rescued the shyppes wyth grete peyne / but alle wayes there were thre of theyme loste and brente / After thys was doon Eneas was conuseylled that he shulde begynne to bylde ther a newe cytee whiche he sholde people with the folke that were comen with hym that we­re not able to bere armes nor for to goo to bataylle / And thus he dede it by the wylle of Accestes / And deuysed the gretenes of the cytee and sayde that it sholde be called the newe troye / But they of the countrey named her af­trewarde Accestre for the worshype of Accestes by who­me alle the lande was gouerned In thesame cytee lefte E­neas the wymmen and the chyldren and the olde men / and helped hymself with thoos that were stronge and that myghte welle endure the traueylles of bataylle for to ha [...]ue theym with hym In Italye / A fewe men he hadde but they were gode and socourable bothe by see and by the lande / whan this was doon and that Eneas hadde doo make the tombe of hys fader / He toke hys leue of the kynge and of hys owne folke that he leste behynde for to enhabyte there that made grete sorowe for hys depar­tynge / Thenne retourned Eneas with his folke that sholde goo with hym In to Italye and entred hys shyppes that were well appareylled And made the saylles to be [Page] hyssed vppe. toke vp theyr ancres / and departed from the rode. Thenne myghte ye haue seen the ladyes and other wepe full sore / makynge grete moone for their frendes and theyr chyldren that they sawe departe from theym. E­neas wente streyghte / towarde ytaly / but one thynge hap­red euyll to theym / For theyr chyeff maryner. that vpon a nyghte was halfe a slepe vpon the forcastell / felle doun in to the see. and was drowned. wherof Eneas was ful sory. and alle his folke also / And soone after they lan­ded in an yle whiche is called Tulyola where was a cyte that was named Thetys after Thetys the neuewe of E­neas that gatte hit / and peopled it after that he hadde con­quered alle Ytalye ¶I haue broughte this cyte to memorye. by cause that many haue harde speke of Deda­lus that fleded there for fere of the kynge Mynos of Cre­te that wolde slee hym ¶I shalle telle you the cause why and shalle leue awhybe to speke of Eneas / The wyffe of kynge Mynos of Crete was named Pasyfa that was a grete lady and a fayr aboue alle other ladyes of the roy­ame / Dedalus dwelled that tyme in Crete / and was a wyse man called and a goode man of werre. The quene Pasyfa was wyth chylde by kynge Mynos / and whan her tyme was comen she was delyuered of a creature that was halfe a man and halfe a bulle. whiche was called Myno­thaurus / and was norysshed by the commaundemente of the kynge that wende hit hadde be his sone. And became soo terryble that the kynge was counseylled for to shytte hym vp som where in a stronge holde / And for this cause was dedalus sente for to the kyng Mynos / by whos requeste & cōmaun [...]ment. this dedalus deuysed & made a house of [Page] merueyllouse composicyon where were as many walles as were there chambres that were in grete nombre. and euery chambre was walled and closed rounde aboute. and yet myghte one goo from one to a nother. And yf some body had be shette therin / he coude neuer fynde the firste entree therof for to come oute ayen. For an hondred dores were there. and whosomeuer wente in. after he was ones paste the firste dore he myghte neuer come oute ayen / and wyst not where he was. Wythin this place was Mynotaurus broughte / They of Athenes muste sende eueri yere for a trybute to the kynge Mynos of Crete as to theyr souerayne lorde seuen men and seuen wymen / vndre the age of xxv. yeres / And whan this foureten persones were come to Crete / the kyng made theym to be putte wythin the forsayd house wyth his monstre that deuoured theym full soone / Egeus was at that tyme kynge of Athenes whiche was sore an angred in his herte of suche a seruage / And by cause he myghte not amende hit / he wente and soughte after an aunswere to the temple of Mynerue / for to knowe what he sholde doo of this thynge ¶The goddesse Mynerue gaaffe hym ans­were / that he sholde sende his sone Theseus in to thraldome to the kynge of Crete. This Theseus was a fayr knyg­hte / preu. valyaunt / and hardy / And sayd to his fader that he sholde goo there / Syth that the goddes were soo playsed he thenne made hym redy and toke his waye / And whan he toke hys leue of his fader / he commaunded to hym that he sholde bere whyte saylles in his shyppe. yf he happed to retourne sauffe wythoute pereille / In sygne of vyctorye.

And theseus sayd he sholde doo soo. yf the goddes wolde beynge hym ayenne alyue. kynge Mynos hadde a dou­ghter that was called Adryane / whiche whan she sawe [Page] Theseus that was so fayre and so amyable and that was come for to be in thraldome vnder her fader / she hadde pyte of hym / and for hys honneste behauoure / Began to be taken with his loue / And vnto hym vpon a daye she sayde / that yf he wolde brynge her in to his countreye with hym / She shulde soone delyuere hym from the handes of her fader My­nos / Theseus made this couenaunt with her and promysede her for to kepe it truly and well / The lady went anone to Dedalus and requyred and asked hym how she mygtht delyuere Theseus / Dedalus tolde her / that the­seus shulde medle pyche and towe bothe togyder and that he shulde bere the same with hym / And whan he shul­de come afore the monstre he shulde cast it before hym whi­che anoon sholde come for to ete it. But he shulde neuer conne chewe it so moche that he sholde not swalowe hit nor haue it out of hys mouthe / And whyles that the mon­stre were thus besy and sore occupyed / theseus myght slee hym lyghtly / And whan he shalle come to the fyrst dore of the house he must take wyth hym a botom of threde and the ende of hit. he shalle make fast to the fyrste dore and so goo forthe wyndynge of this botom of threde tyl he be come to his aboue of hys entrepryse. And by the threde that he shalle wynde vp to gyder he shalle mowe retour­ne lyghtly to the fyrst dore where he went ynne / Thus dyde Theseus by the counseylle of the lady and slewe the monstre and came ayen oute of the place full soone / And anone after he toke Adryane wyth hym. and se­cretely entred in to his shyppe / and made as goode waye as the wyndes wolde / wythoute the knowleche of Mynos the kynge / Theseus was soo gladde of this good [Page] te aduenture that was happed to hym) that he forgate for to doo as his fader hadde commaūded hym atte his departyng from Athenes / that yf he scaped he sholde sette vppe white sailes. and yf he were perisshed his men sholde come home ayen berynge blacke saylles / and thus he sholde be in certayne of his lyffe or of his deth:

¶How kyng Egeus lete falle hym selfe in to the see for ye deth of his sone Theseus. Capitulum xxxijo.

WHan Egeus sawe the shippe of his sone comyng a­yen wyth ye blacke saylle spred abrode / lyke as whā he departed from hym / he wende verely that he hadde be ded / And for grete sorowe that he hadde / dyd caste hymself oute of the wyndowes of his castell in to the see and loste his lyf in this wyse. And whan kynge Mynos wyst that Theseus was escaped by dedalus / he put hym in pryson and his sone wyth hym / But Dedalus made wynges and fastened theym to his armes. and to his sones armes of fede­res of pytche and of wex connyngly made / and floughe oute at the wyndowes fro the prison where they were. But sycarus the sone of dedalus floughe alle to highe wherby the wax wexed hoote & beganne to melte. and the feders to falle of. wherfore he felle doun in to the see. and was drowned but his fader floughe soo longe▪ as Salamon telleth. that he ca­me in to the isle of Sardayne. and after went he to Thebes And alle thus eschaped dedalus oute of the pryson of Mynos kynge of Crete / Now shalle I leue to speke of this mater and shalle telle of Eneas and of his werkes

¶How Eneas arryued in Ytalye Capitulū xxxiij

[Page]WHan Eeneas and his folke were arryued in the saide yle of Enlyola they landed anone / And eneas went to a forest where was a ryche temple that deda­lus had founded there / In to this temple went Eneas / and there he wolde reste hym self awhyle There dwelled the god­desse Cryspyne whiche shulde haue brought eneas in to helle for to see the sowle of Anchises his fadre / and the sowles of alle his meynee that were decessed / but this mater I leue for it is fayned and not to be byleuyd / who that will knowe how eneas wente to helle late hym rede virgyle claudyan or the pistelles of Ouyde. & there he shall fynde more than trouthe. For whiche cause I leue it and wryte not of it. Whan Eneas had taken his reste there awhile / he and his folke departed from thens / And went so moche that they came in ytalye in a grete forest where the ryuer of the tonyre renneth and falleth there in to the see thenne cōmanuded eneas his maryners that they shulde sette hym alon [...]e there and alle his folke / and they dyde somoche that they came and entred wthin the hauene. for they sawe the countrey fayre and de­lectable. and the forest grete and full of bestes / Of this lande was lorde kynge latynus that had noon heyre but afayre doughter that was named lauyne / The kynge latyne her fader was of grete age / and many one had requyred his doughter to be theire spouse. And amonge other a bacheler of ytalie shulde haue had her whiche was called turnus yt was moche preu and hardy / but kynge latyne wolde not gyue her to hym though the pucelle was in age able to be maryed to a prynce of a lande /

¶Here It is shewed how many kynges had ben In ytalye afore that eneas came ther fyrst ¶Capitulum xxxiiij

[Page]Afore that Eneas was come in to ytalye there had be seuen kynges that successyuely hadde kepte the londe The firste was Lanus whiche. dyde enhabyte there firste & peopled the contree / and after hym Saturnus / but this was not the fader of Iupyter of whom the auctours speken. After saturnus was Pyrrus kynge of thys londe. after hym came Famus / and after hym his sone Latynus that then­ne was a lyue. and kepte the royame. There reygne lasted a hondred & fyfty yeres / afore that Eneas wedded Lauyne by whom he had the royame / And after theym regned eneas in ytalye / and they that yssued of hym foure hundred and seuen yeres. vnto romulus tyme / and thenne seuen kynges reygned there after hym / that is to whyte. Pympeyns. Iulyus us hostylius / Marcus ancus / Pryscus tarquynus / Suluyus / Tullyus. Lucyus / thyse kynges reygned two hundred & xlo. yeres / vnto Brutus that fyrste was made consulle of the londe / And fro brutus & theym that after hym reygned. vnto Iulyus cesare that was the fyrste emperour. was v. hondred & iiij yeres ¶Now wyll I telle of eneas & of his folke & that assone as that they were come a londe / they sette hemselfe atte dyner & made trenchers of brede for to putte the­yr mete vpon / For they had nother dysshes ne trenchers / and atte laste they hadde soo lytell brede that they ete alle theyr trenchers. and all that was lefte / And whan ascanyus sa­we this. he began to lawgh / And soone whan eneas vndrestode it / he wyste well that he was come in to the contre that the goddes had promysed to hym / For his fader hadde tolde hym in a vysion that where he sholde happe to ete the releef or brokelyngrs of his borde. there sholde be his dwellynge pla­ce / Eneas hadde this thyng sore faste in his mynde. And whan he sawe that this was soo fallen / he was right gladde [Page] in his corage / and sayd to his folke that he wyste well for certayne that they were in the royame that the goddes hadde promysed vnto theym. and that theyr traueyll sholde be fynysshed there. Thenne they made grete Ioye togyder. and broughtte oute theyr goddes from the shyppes that they hadde broug­hte wyth theym oute of Troye. and to theym they made sacryfices. and their orysons & prayers. that they wolde helpe theym Thenne demaunded Eeneas of som folke that he met by the waye who kepte the contrey / and who was lorde therof / And they tolde hym the kynge Latyne that was sore auncyente and hadde no children but a doughter / and that dwelled not ferre from thens. that is to wyte atte Lawrence:

¶How Eneas bygan to buylde his fortresse vpon the Tonyre Capitulum xxxv

NOw shalle I telle you why this cyte was called Laurence. for she was fyrste named Lamyna / kynge Latynus hadde a brother that was called Lauynus that sounded the same cyte. and sayd that after his na­me she sholde be called lamyna / and whan he was ded / the cyte apparteyned to kynge latyne / that made it more stronge than it was a fore. and was alwayes called Lamyna. tyll that it happed that a laurell tree grewe there vpon a hyghe toure wythin the cyte▪ And therof it fortuned that kynge latyne dyde calle this towne Laurence / whiche he loued ryght moche For it was the chief cite of alle his royame. whan eneas vnderstode that the cyte where the kynge of the londe dwellynge was soo nyghe / and that this cyte was soo no­ble / and soo well peopled. he was ryght gladde therof. And after he loked abowte hym where a place was moste strong and there he broughte alle his ooste / and rounde aboute this place he dyd make diches & barreys for to defende hemselfe if [Page] nede were / And for certeyne wythin a lityll space of tyme they made the place so stronge that thei doubted no body that coude hurte theym: nor take theym vnbeware

¶How Eneas sente his messagers towarde kynge La­tyne: Capitulum xxxvij

WHan Eneas had begonne his fortresse / he called to hym a hondred of the wysest men that were in his ooste / for to sende theym towarde kyng Latynus in his cyte of Laurence for to requyre hym of peas & of alya­unce. and that he was not arryued in his londe for to doo to hym nor to the contrey ony dōmage / but besoughte hym that he wolde not lette hym of that he had enterprysed to make a castell vpon his groūde that was begōne / For he made this for to rest hym and his folke / and for to dwelle wythin his royame by the commaūdemente of the goddes wythoute to doo hym ony hurte nor greuaunce. The messagers wente soo longe wyth theyr ryche presente that they bare from E­neas / to kyng Latynus and wyth garlandes vpon theyr hedes made of olyue tree / and also in theyr handes braūches of the same / that peas and loue sygnyfieth / that they came to the cyte of Laurence. where they fonde alityll wythoute the towne a grete feest of yonge men / that proued and as­sayed theyr streyngthes in dyuerse wyses / Thenne entred ye troians wythin the yates of the towne / and one of the Io­uencellys that thus dyde sporte hym selfe there wente a pase afore theym. and cam & shewed to kyng latyne / how that a companye of noble men / and to his semyng of ryght hygh astate / were entred wythin his cyte. for to come speke wyth hym / & yt they semed well to be riche & pesable folke / for they bare braūches of olyue tre in their handes / the kyng cōmaū ded anone whan he knewe of it / yt they sholde be broughte [Page] vnto hym / And so it was doon / The messagers come before the kynge Latyne to whom they made reuerence pruden­tly and hym dyde salue in theyre lordes byhalue / The kynge that satte highe in his throne withyn hys halle where as were purtrayed fulle rychely alle the kynges of his lynage connyngly made. how they hadde kept ytalye one after a­nother / with the aduentures that were come to theym and the grete bataylles that they hadde made. Answered well peasibly to the troyens / For alredy he hadde well vnderstande that they were of troye that was alle distroied / and asked theym what they sought and what nede had brought theym in to the londe of Lombardye / whether the tempeste hadde chassed theym / or yf they hadde lost theyre waye / For in many maners comen peyne and traneylle often vpon / but how so euer ye be arryued and comen hyther sith that ye re­quyre peas ye be ryght welcomen to me. The londe is go­de & fayre and the countrey swete and delectable / And well ye may ease youre self therynne / and also ryght and rayson requyreth that ye doo soo / For dardanus that fyrste kept the regne of troye was of this countrey borne / Thenne gaffe the kynge seassyng to hys wordes / And dyoneus one of the troyens that were there beganne to speke / saynge In thys wise / ¶Gentylle kynge and of hyghe lynage and puyssaunt prynce / Thou shalte vnderstande well that none stronge wedrynge ne tempeste / hathe constrayned vs for to comme In to thys londe. but we are comme hether with oure goode wylle / For we ben departed from the ryche cytee of troye / That of lorde­shyppe surmoūted alle other cytees that were In her tyme. And after the destruccyon of the same that was soo grete as / thou haste well herd telle. We departed fro thens [Page] and haue hadde syth soo moche of peyne bothe by see and by londe that longe after we hadde lefte and habandouned our owne contree / we were cōmaunded of the goddes that we sholde come in to thyse partyes for to haue therin our resi­dence / And we requyre onely to haue a lityll plotte of gro­unde where we maye dwelle in peas / and no hurte domage ne greuaūce shalle not be doon to the of vs by no maner of wyse / And ye muste knowe that we myghte haue be receyued in many places and in a good contrey for to make there our dwellynge / But the destynacyes of the goddes. sente vs in to thy reygne for to haue our permanente residence there / as Dardanus was borne. And appollo cōmaunded vs the same / and for this thynge sayd Dyoneus we are arryued in this londe / And also Eneas that is our kynge sendeth vnto the of his Iewelles that he hath brought with hym oute of troye. where he was in grete honour. and a prī ­ce of grete lordeshyppes. And thenne he toke to the kynge a riche maūtelle & a crowne of fyne golde all sette wyth precyouse stones and a cepter royall that kyng pryamus dyde bere often in his honde ¶How kyng Latynus made grete ioye & good chere to ye messagers of eneas: Capo. xxxvij

THe kyng latynus receyued the ryche present. and dydneus helde his peas / & the kyng latyne praysed moche the troians. not for the present that eneas had sent to hym. but for loue of the maryage of his doughter / And why he dyd soo. it was for bycause that he had graūted his dough­ter to a worshifull knyghte that was called Turnus the sone of kynge Darynus of the cyte of Darda / that was not ferre from Laurence / To hym he hadde couenaunced his doughter Lauyne / but theropon he had an answer of y goddes. that he sholde not gyue her to hym / but he sholde gyue [Page] her vnto a knyght straunger. And whan kynge Latyne hadde mused alytyll in hym selfe / he ansuered to the messa­ge. Fayre brother the gyste that thou hast brought to me from thy lordes byhalue I shalle not refuse / but I receyue it gladly / and so telle hym that I am ryght glad of his com­mynge and that my londe whyche is goode / Is atte hys wille. and yf yt playseth to hym he may herberrowe hymself wyth me within thys cytee / And also ye shalle▪ telle hym that I haue a doughter whiche the goddes deffende me that I shalle not gyue her to no man of this countreye and wyl that I gyue her to astranger of whome shalle come a roay­alle lygnee and of grete name thrughe alle the worlde. and but I be deceyued. It most be he.

¶How kynge Latyne sent hys presentes to Eenas / ¶Capitulum xxxviij.

WHan the kynge latyne had thus spoken / he made to be brought afore hym a honderd fayre horses welle ryche­ly enharnyshed and nobly arayed / and to euery messager troyen he gaffe one of thys horses / and sent to Eneas a ryche chare alle appareylled for to fyght In a bataylle / Thenne toke the messagers there leue of the kynge latyne after that he hadde made theym goode chere and ryally fested. and ca­me alle ayen gladde and Ioyouse to theyre lorde / And recounted to hym altogyder as it was sayde and doon / Wherof ene­as was ryght gladde & made grete Ioie / The tidynges were spred alle aboute the londe of lombardye and was annoūced vnto Turnus that the troyens that were escaped out of Troye were aryued in that londe and hadde a lorde that was called Eneas / To whom kynge Latyne hadde habaundouned alle hys londe and also hys doughter that Turnus sholde haue by maryage / But the kynge wolde [Page] gyue her to the troians for to enheryte his royame of the ly­nce of troye / And that kynge Latyne hadde all redy consented to theym for to buylde and sette a castell vpon the ryuer of Tonyre / soo that they sholde not be cast oute lightly from the royame by force. Assone as Turnus wyste of thyse tydynges. he was sore an angred in his herte. And was ouermoche wrothe for the damoysell that hadde be graunted and gyuen firste of all vnto hym / And well he swore that Eneas sholde neuer haue her as longe as he were man on lyue. Turnus by the counceyll of his fader sente for his nyghe frendes and kynnesmen. for to haue coūseyll vpon this thynge / And whan he had assembled theym togyder. they did counseyll hym that he sholde goo towarde kyng Latyne atte lawrence & towarde the quene / for to knowe whi they wolde gyue theyr doughter to a nother. contrary to their promyse that they hadde made to hym. Durynge that these wor­des ranne / Eneas and his people wroughte stylle to make vp theyr fortresse / And ascanyus by the lycence of eneas his fader wente to the foreste that was nyghe by Lawrence and dyuerse of his knyghtes wyth hym. for to hunte the wylde bestes / Turnus hadde two sones and a fayr dough­ter. whiche was named Syluya. this siluya had norisshed a herte tyll that he was onergrowen and grete. that her bretheren had broughte to her from the foreste / soo yonge they had take hym awaye fro the moder. This herte was soo tame yt he suffred well that the damoiselle layed her hande ouer him for to make hym fayr and euyn / and that she shold make him a garlonde aboute his hornes. he was well fed and moche loued of her / and also of Turnus her brother. And whan that this herte had be longe atte home. he wente in to the forest among the other / and cam ayen atte euyn. The houndes of [Page] Ascanyus founde thys herte and hunted hym sore tyll that Ascanyus hadde espyed hym and shotte an arowe att hym and rought the sydes of hym. This herte alle thus woun­ded and sore hurt came home ayen as fast as he myght there as he was noryshed and cryed and made mone after hys manere. Syluya came fyrst there where he was whiche was ryght sory whan she dyde see the hert that bled sore and was a deynge. Thenne caae there turnus that was moche an angryd and wroth therfore & founde the wounde and blew a horne for to moeue his folke ayenst theym that had slayne this hert. And no moo wordes were made there. But they went toward the forest alle armed where they fo­unde the troyens that were come after the hert: And the churles ranne soone vpon theym with suche armures as they had / The troyens deffended theymself with theyre bo­wes and with theyr swerdes. but the most strengthe was styll with the men of the countree / Neuertheles the medlee wexed so strong that ascanyus kylled there the eldest son of Turnus with an arowe. Thēne rose ther a grete crye Soo that the troiens were of the wors syde / And whan Eneas wist of hit in his fortresse he came & brought there a grete part of his folke /

¶How turnus sente for his folke for to chasse & dryue Eneas out of his londe / ¶Capitulum / xxxix

FOr this occasion bigan the bataylle to be grete and mortall that was not apeased anone / There was grete effort made & bigge estoure after that Eneas was come there / For of that othre part of the bataylle they of Laurēce came there and of alle the other contrees about that cursed the kynge Latyne that so euyll folke had receyued and lodged In his contree / To this sorowe came Tur­nus [Page] / and whan he sawe alle the folke of laurence so moe­ued ayenst the kynge Latyne / he bigan then̄e to swere and saye that euyll shosde come therof to the kynge Latyne and to the troyens for yf he had not Lauyne to his wyff he shol­de doo brenne the cyte and the palays also / And thenne he ascryed his folke and alle theym of the cyte in whiche were many knyghtes. and sayde that hym self and theym of the cyte sholde yssue in bataylle / Thenne spake kynge Latyne to his folke and to Turnus and tolde theym that ayenst the wille of the goddes and without rayson they wolde fyght aienst the troyens / But for thise wordes / turnus nor the other wolde neuer withdrawe theym self the kynge that sawe they wolde noon other wyse doo he lete theym shyfte / & fought tyll that the euyn departed theym / Thenne came ay­en they of the londe to laurence / & eneas & ascanyus went ayen to theire fortresse / turnus had sent for his aide in the cen­treye all about & made grete folke / first of all came to him mescayus of cusye & causus his sone & brought folke wyth them. & thēne came they of lōbardye. of to scane & of the ualles of ytalie. besides all thees came ther canulla a mayde yt was lady of prouerne & medabus was her fader this damoyselle brought with her grete cōpanye of medeus all in arm­es for to gyue socours to turnus yt she loned sore. whan she was come to laurēce she was gretly loked vpō of ye ladyes ef the cyte bicause that she mayntened herself lyke a knyght she was stronge & hardy more thenne eny other creature /

Hw eneas wēt to seke socours of ye kynge euāder[?] / capo. xl

THus had turnꝰ assēbled his folke for to chase eneas & his folke out of lōbarde / for he wold haue ye doughter of ye kyng latyne / eneas had wth him litil aide but of them yt he had brought with hym. he toke no care nor abashed hym not bicause yt ye same lōde was promysed to him for to dwelle [Page] in hit / vpon a nyghte cam to hym a vysion that tolde hym that he sholde goo to seke helpe to a kynge that was called Euander. whiche was neuewe to kyng Thalamus of Archade. This euander slewe his fader by exhortynge of his moder that vyceta was called / and for this cause he lefte ar­chade / and came in to ytalye / and dyde so moche that he her berowed hym selfe and his folke that came wyth hym vpō the mounte palatyne. Vpon the tonyre. Where Euander beganne a lityll cyte that he named Palence / after the name of kyng Palantyne of Archade that now is called Ro­me / thys kyng Euander had a doughter. whiche was cal­led after the name of his cyte Palencya / and also he had a sone that was pre [...] and hardy. that had to name Palas ye whiche werred euer ayenste turnus / and the ytalyens / Al­so turnus wolde neuer haue concorde nor peas wyth this kyng Euander / Eneas sayd then̄e to his folke. that he sholde goo fette socours and helpe. And then̄e he entred his shyppes and his felawes wyth hym / And rowed so moche that they cam to Palence where kyng Euander receyued theym wyth grete Ioye & honoured moche eneas and sayd to hym that he had well knowen his fader Anchises / Soo longe they spake one to thother that euander sayd that he sholde helpe eneas & shold take to him his sone palas & foure thousād men good fyghters / Eneas thanked the kyng right moche of the good wyll that he had to hym. And whan the mor­nyng came. & that they had cōcluded togyder of ther befines they toke leue of kyng euander / & they yt were most in age ē ­tred in to the shyppes / And the other that were strong wente by londe:

¶How a grete sorow was made / whan Eneas and Pa­las departed fro palence: Capitulum xljo.

[Page]WHan tyme came that they sholde departe the quene wepte sore tendrely and the kynge also that called hys sone full swetly saynge / Ha a fayre sone yf I were as yonge as I was somtyme / with grete peyne I sholde la­te the goo without me / And I promytte the that Turnus sholde neuer make so good watche to kepe hym self but that I sholde doo to hym demmage ryght grete / But olde age reteyneth me here that happeth to hym well. Now praye I oure goddes that of the. they make vs gladde / And that I may see the agayn alyue afore that I shalle decesse. For I hadde moche leuer deye / than to see thy dethe. ¶And thanne Pa­las and Eneas made sacrifyce to the goddes & prayed theym ye they wolde be to theym socourable. & this doon they toke the­yre leue of ye kynge euander & walked so long that the nyght was come & thēne they herberowed themself behīde amōtayne

¶Hw turnus came afore the castell of eneas for to saw­te hym. ¶Capitulum: xlij

[...]Han that Eneas was goon toward kynge euander / cam turnus afore his fortresse ascanyus was with ye troyens for to wite yf he coude take theym or entre within ye castell / but the troyens that sawe theym come putte theymself in to theire fortresse and made hem redy vpon the walles for to deffende theym of their enmyes well and vigorously. and visus & eryalus two valiaūt knyghtes & hardy kept the ga­te turnus yt was well horsid came & eight felawes with him vnto ye walles & called & saide yt yf there was eny man that to him wolde fight in the playne. that he sholde come out / and that he sholde haue no harme but onely of him body to body / And they of wythin ansuered not wherfore he laūched theym his dart ouer the walles & went agayn In the playne felde for to make a tourne of grete chiualrye. & he & the other [Page] eyght that were come wyth hym ascryed theym / of the cas­tell wyth an hie voys / and sore merueylled that they were of the troians soo coward. that they wolde not iuste wyth soo fewe a folke as they were / and whan he sawe that thei wolde not come oute of theyr castell / He wente rounde aboute it where he myghte ride for tosee and knowe of what parte the place myghte sonest be take / And whiles that he dyde thus. approched the ooste that came towarde the fortresse / & Turnus apperceyued the shyppes that were nyghe the shore for the men to come a lande. wherof he hadde grete Ioye. and cōmaunded soone that the shyppes of the troians sholde be sette all in a fyre / by cause that thei of the castelle sholde not flee thyderwarde for to saue theym selfe. They dyde thenne as turnus hadde cōmaunded / and brenned alle the shyppes sauffe some of whom ye cables brak & escaped away / wherof they of the [...]ost had grete merueylle / turnus sayd that the castell must be take wyth stregthe of armes / And also he knewe well that Eneas was not there but came faste ayenste hym accompanyed of Palas. and of many other knyghtes Whan the nyghte cam on / turnus ordeyned xviij knyghtes for to make good watche / of whom Mesapus was chieff / and thenne they made grete Ioye and ete & dranke & made goode chere / The troians byhelde theym / and garnysshed theym selfe in the best wyse that they coude. Menestus & seges­tus that Eneas had made constables. hadde theyr folke wel ordeyned for to fyghte / and for to defende the fortresse / And made redy for to sende to Eneas / But noo body durste not auenture. for to goo to hym. by cause that they knew not the contrey:

¶How Vysus and Eryalus made theym redy for to en­tre vpon the oost of Turnus ¶Capitulum xliij

[Page]WHan came toward the mornynge the ytalyens that assured were not doubted of ony body that myght greue hem / felle aslepe alle fulle of metes and of wynes / Thenne visus that kept the gate bethough hymself and sayde to hys felawe. Goode brother loke how the ytalyens be welle assured In theyr tentes / there is nowe no lyght atte alle and they be alle a slepe / I wylle goo In to theyre oost for to make slawghter of theym / And after I shalle goo to Eneas In pallence / For I shalle fynde well the waye thyder. and yf I may brynge thys myn entrepry­se to purpos I shal be rewarded ryght welle therfore / Whan Eryalus vnderstode hys felawe that spacke soo / he ansue­red hym anone in thys manere / Ha a goode and true fe­lawe we haue be so famylier and haue hadde so goode fely­ship togyder. and nowe ye wyll vndertake this thynge wi­thout me / ye shalle knowe that without my companye ye shalle nowhere goo / They bothe togyder went to Ascanyus and to the other that were in coūceylle for to wyte whom they myght sende to Enas / Thenne spake visus and sayde how they had entreprysed ye waye for to goo to eneas / and whan Ascanyus vnderstode theym he toke theym in his armes alle wepynge / and sayde to theym. O ye knyghtes who shall mowe yelde to you so grete a meryte of so grete har­dynes yc ye haue enterprised for to doo. the goddes shall rewarde you / first therfore / & after my fader eneas & also my self that neuer shalle forgete thesame whiles that I shall lyue / and also I telle you. that yf ye brynge me my fader agayn I shall neuer haue so grete a lordsip / but that ye shalle haue part of thesame / and ye shall be proferred In alle maneres /

¶Hw visus and eryalus entred in ye tētes of turnus oost & made grete slawghter & destruccion / ¶Capitulum. xliiij

[Page]WHan vysus and eryalus his felawe were armed & arayed. they yssued oute of the gates moche richely appareylled and well mounted vpon two goode horses. stronge & able and well rennynge / And thus they en­tred in to the lodges of theyr enmyes. whom they fonde a slepe / Thenne spake Vysus to / Eryalus. and sayd felaw myn this thyng so moneth vs for to proue oure hardynes Now holde the behynde. & kepe that none escape. and I shalle goo forthe and shalle make large the waye / And whan he hadde that sayd he loked wythin a tente / and sawe a kynge lyenge. that was grete frende wyth kyng Turnus / For he entermytted hymselfe for to telle that. that was to come & of many other thynges / The same dyde vysus smyte his he­de of / and thenne they made grete occysion soo that no bodye durste moeue. for they sawe theym armed / and theyr swer­des all blody / Thus lasted this euyll aduenture almoste to the daye / thenne came they to Mesapus tente & sawe fyre lighte. thenne sayd vysus. good felawe late vs take on our waye for it is almost daye. we haue hurte our enmyes ful sore. and also we be wery / then̄e went they awaye & left there moche rychesse yt they myghte haue taken. yf they had wolde but they wente oute of the tentes & walked streighte ye wa­ye towarde palence for to goo to eneas then lorde that was departed thens alredy wyth palas the valyaunte and noble knyghte:

¶How the two felawes loste eche other in the forest / whā the knyghtes of laurence chased theym ¶Capitulū xlv

ANd whilis that they wente faste awaye from the tentes. Foure hondred knyghtes were yssued oute of lawrence all armed / & wente to turnus for to bere t [...]dynges from the kynge Latyne / And whan they werre [Page] comen nyghe the tentes they sawe ouer atte the other syde the two felawes that went the waye to Palence / Also they per ceyued theym by theire helmes that they hadde on theyre hedes that resplendyshed ayenst the mone / Bolcus thenne went ayenst theym and called Abyde ye. And telle me what ye be and from whens ye comme / They answerde not but withdrewe theymself toward the forest. And than botcus and his men spored there horses and chassed theym / bul they were alredy withyn the forest. Where as they lost eche other ryghte soone / For vysus dyde putte hym self in tyl a path and was soone goon ferre from hys enmyes And E­ryalus entred in to a thilkke busshe where he founde nothre pathe nor noo waye atte alle. and so he coude not flee ferre from hys enmyes that chassed hym / Vysus that alredy was escaped sauf loked behynde hym and sawe not his felawe nor Erialus were. wherof he was ryght sore angri. And sore sighynge he began to saye. O swete felawe where ha­ue I lost the. where myght I seke the And whan he hade sa­id this he retourned ayen bak that waye that he came. And he had not gon longe that he herde the noyse of the horses about erialus that his enmyes had taken alredy. and aslong as he myght he had deffended him self but alle that he coude doo auaylled him not / visus went so longe rennynge tyl yt he sawe his enmyes about his felawes whiche they helde / Thenne he wist not what to doo nor how he myght delyuere hym from theyr handes. And whan he had aduysed hym ynoughe he loked vpon a dart that he helde in his hande and threwe it with alle his strengthe and smotte a knyght betwene two sholders therwith alle so that the yron went thrughe the body of hym whiche felle doune ded to the gro­ūnde frome hys horse / Hys felawes that sawe thys loked [Page] alle aboute theym / and had grete merueylle / and wyste not fro whens that myghte come / And whiles that they merueylled theym selfe of suche a fortune that was co­me thus sodaynly to theym. Vysus casted ayen a nother darte. and smote a nother of theym in the breste and soo slewe hym and fell doun ded afore his felawes that were ther of sore abasshed

¶How Bolcus slewe eryalus. & how Vysus his felawe slewe Bolcus / Of the deth of the sayd Vysus / & how ye hedes of the sayd two felawes eryalus & vysus were brought vpon two speres afore the fortres of Eneas Cap. xlvj

THenne beganne bolcus the conestable to be alle forcened wyth grete rage for to knowe fro whom these strokes cam / & in a grete anger sayd to eryalus who euer hath doon ye same ye peynes therof shall abyde vpō ye / & with y swerde all naked in his fust cam nygh hym / & wold slee hym. & whan vysus sawe this. he coude no lenger suffre it by cause yt he wolde not see hys felawe to be slayn / but he began to crye. late hym be in peas / & take me & putte me to dethe. For he hath forfayte nothyng. While that vysus spake thise wordes / bolcus smote eryalus wyth his swerde tho­rugh the body of hym & wythoute moo wordes kylled hym And whan vysus sawe the same. he ranne ayenste theym alle. and adressed hym towarde bolcus wyth his swerde in his fuste. and so nyghe he approched hym / that whan he dyd ascrye vpon his men that they sholde take hym / vysus smote hym wyth his goode swerde thrugh the mouthe that he made hit to come oute at the necke of hym / soo that he slewe hym and fylle doun ded afore hym and all his folke / His knyghtes that sawe hym thus slayne ranne alle vpon vy­sus oute of alle sides / soo that they gaaffe to hym his deth [Page] wounde / and neuertheles he defended hym selfe vygoryous­ly as longe that he myghte stande. But his enmyes charged hym soo often wyth grete strokes of their swerdes wel sharpe cuttynge / that he spred hym selfe vpon his felawe Eryalus / and soo fynysshed there his lyff / Thenne toke the y­talyens their armures. and that they bare / and the body of theyr lorde Bolcus / amd departe wyth grete heuynesse and wente to the lodges of Turnus ooste: And whan they cam / they sawe there theym that made grete sorowe & grete cryes for theym that were slayn wythin the tentes / Whan thenne the daye was come / Turnus cōmaunded that alle the ooste sholde be armed / And that euery prynce sholde orde­yne his folke for to assaylle the castell / And they dyd soo by grete wrathe / And thenne turnus made the hedes of eryalus and Vysus to be smytten of from theyr bodyes / and sette vpon two speres. and broughte theym afore the castell wyth a grete noyse & grete callynge / for to fere and abasshe the troians therwyth. that were wythin wyth Ascanyus the sone of eneas. Whan they of the castell sawe theym they were full sory & sore tryste / and anone they ordeyned theyr folke & putte theym in araye for to defende the place. And thenne they of the ooste blew vp their trompettes for to gyue a sharpe sawte / And taried not. but dyde hie theim for to fylle the dyches / and for to dresse vp the ladders ayenste the walles / And they that were there vpon the walles brake theyr sheldes and theyr pauesses / And the hardy kny­ghtes troians that had lerned for to defende / casted vpon theym grete logges wyth sharpe yron atte the ende and gret stones. They that cam firste to assawte the place myght not suffre no lenger the strengthe of the troians that were vpō the walles of theyr fortresse. For they brake theyr sheldys & [Page] helmes and theire līmes & all to burst theyre bodyes / whan Mesancus sawe this he made fyre to be cast to theym / and Mesapus made the diches to be filled vp & the ladders to be sette vpward ayenst the walles /

¶How the assawte was grete atte the gate of the castel / ¶Capitulum xlvij

BEfore the gate of the castell was a grete toure. and knyghtes were within that deffended it: they that were without assailled strongly & by grete rudesse / and all they that were within deffended theymself ryght well & vigorousli / but they of ye oost made so grete force ayenst them that they dyde sette the toure on afire / and whan they of with in sawe the toure that brenned alle in aflame they were a­ferde to be brente there ynne so that they most nedes haban­doūne it. And thēne they wolde haue yssued out aienst them of the oost. but the toure fille soone doun / And thus alle they that were within were ded fauf two of hem Elenor and Elecor / And whan elenor sawe hymself amonge his enmyes he ranne vpon theym with his swerde in his hande as he yt wolde not escape nor saue his lyffe / But elecor that was ryght swyfte & lyght fled toward the castel for his waraūt

¶How Eneas came ayen from palence with moche folke for to socoure his sone & his folke ayenst turnus / ¶Capitulum xlviij

MAny were there slayne of one part of the other / but the assawte was lefte for the nyght that came thenne vpon toke awaye fro theym the light of the daye. The troyens kept well theire walles / For they knewe well that on the morowe they sholde be assaylled agayn. Eeasn thenne that was goon for to seke helpe and socours and had with hym alle the barons and namely the kynge Carton / [Page] abode not longe after this / But that he came wyth .xxx. shyppes well laden wyth men of armes. whiche approched soo moche that they came to the socours of theym / that awayted sore after theym. And that hadde grete nede of helpe / whan Turnus vnderstode thyse tidynges. he wente aga­ynste theym wythoute taryenge. Alle the sayd shippes entred wythin the hauen excepte the shippe of kynge Carton that was to grete. Turnus peyned hymselfe full sore and his knyghtes also for to lette theym of theyr landyng / But Eneas that wyth his barons that were in his ship wyth hym. was landed first of alle / And defended the porte ayenst the ytalyens. tyll that all the folke were come alande / Thenne beganne the bussynes and the trompettes for to blowe of the one parte / And of the other Eneas atte his comynge vpon. he ouerthrewe & slewe Sythera that was moche rychely armed. and of noble and ryche armes / And after Latam & also the geaūte / that bare a clubbe / wherwyth he hadde take the lyff awaye of many troians. there sholde haue eneas adō maged turnus ryght sore yf it hadde not be a heuy aduenture that happed. For Turnus slewe there Palas the sone of kyng euander / & whan he was ded he toke awaye from hym a riche rynge of golde / Whan Palas was slayne there was made grete sorowe for hym of Eneas / and of his fe­lawes / But therfore ceassed not the bataylle. his men bare hym oute of the bataylle / And made for hym grete sorowe Whan Eneas knewe it. he came all wrothe and sore an angred vpon his enmyes whiche he hewed and slewe wyth his swerde as preu and hardy that he was

Thenne yssued oute of the castell Ascanyus his sone / and the goode knyghtes troians: that were enclosed therin / and that hadde suffred grete assawtes the daye afore:

¶How Eneas sought Turnus alle a boute In the bata­ile for to slee hym for the dethe of Palas. ¶Capo. xlix

ENeas was thrughe the bataille sekynge a bout after Turnus that was ryght valyaunt / preu and har­dy In bataylle / The fende that sawe that Eneas sought Turnus for to slee hym / that wolde not that he shol­de be ded so soone to thende that he sholde doo yet moche harme and euylles more than he hadde doon all redy dyde transfor­me hym self In to the fygure of eneas & came a fore turnus that forced hym self for to make grete occision of the folke of Eneas / whan Turnus apperceyued hym he wende ve­rily that it hadde be Eneas hym self and ranne vpon hym with alle his myght and whan he was approched nyghe hym he launched a darte atte hym. and the deuyll tourned to hym his back & beganne for to flee awaie thrughe ye mul­titude of the people that faught. whan Turnus sawe that wenyng to hym that it had be Eneas that durst not abyde hym he began to enchaunte hym sore with wordes / but he yt fled sette nought by hys enchauntementes. & fledd so longe afore turnus that alwayes folowed him that he lept in to one of the shippes of Eneas that was nyghe by the shores lyke as it had be for grete feer of his lyffe Turnus that helde his swerde in his ryght hand and his shelde fast afore his brest and that had grete Ioye in hym self / For he wende that Eneas had fled for fere of hym and that he durste not abyde hym / went and entred after the deuell that was in liknes of eneas within the shippe full vigorously for to haue killed hym / but whan he was come within he foūde there noo body with whome he myght fight: And sought alle about bothe behinde & before within ye shippe / but he fon̄de nothinge / so was he thēne sore abashed & wolde haue cōme out [Page] ayen for to retourne to the bataylle / but the yssue was to hym full euyll redy / For the cables of the shyppe that heelde hit were broken and fallen vnder the water.

¶How Eneas smote Merencyus wyth his spere in his thye a grete stroke: Capitulum. L.

DVrynge this while that Turnus wende to haue chassed Eneas / was eneas in the thyckest presse of the bataylle callynge after Turnus wyth a hyghe voys / and broughte many ytalyens to their deth wyth his swerde. Turnus that sawe hym selfe brought ferre from the shores / knewe well thenne that he was deceyued. and wyste not what he myghte doo. nor where he sholde become / soo sore an angred he was / whan he founde hym selfe in that plyght Thenne he heued vp his handes towarde heuen swetly and began to calle vpon Iupyter / why he hadde broughte hym to this grete sorowe / that he sawe his folke that were kylled & slayne afore his eyen / And that he myghte in no wyse socoure theym / one tyme he thought for to slee hym selfe / another tyme he wolde haue drowned hym selfe / And while yt he was thus in this thought for to doo the one or thother. Ye ship̄ went doūe the ryuer of tonyre wyth the streme yt was so bygge tyll that it cam in to the hauen of the cyte of dar­da. where as kyng daryus the fader of turnus was. Merē cius was yet in the batayll & forced hymselfe to dystroye & sle eneas folke / & wyth hym was his sone Lansus yt was preu & hardy / this merēcyus ranne vpon the troians with grete force. his swerde in his hande & made grete fayttes of armes / he slew acren & Merēde & many other / mesapus ma­de also grete slaughter of the troians / for he slewe Lamon & lycormon cycartem & many other worthi folke. thus were medled ye bataylles. merencyus confoūded & distroyed wyth [Page] his swerde alle that he fonde afore hym / And whan Ene­as sawe hym. he beganne to come towarde hym. and Merē ­cyus byhelde hym comynge / whom he doubted not / And ene­as auaunced hymselfe soone / and launched at hym his grete espyotte or spere / and smote hym thorughe the thye / whan Merencyus sawe the bloode come oute he was therof fore an angred / And anone ranne vpon Eneas / sayenge that he sholde auenge it vpon hym / But his knyghtes toke hym and hadde hym awaye fro the bataylle / for his wounde bled alle to sore / and yet was a parte of the spere wythin / that greued hym ryght sore:

¶How Merencyus made grete sorowe / whan he sawe his sone ded Capitulum Lj

WHan Lansus sawe his fader merencyus thus sore hurte. he wexed therof all full of wrathe / And asse­mbled ayen alle the bataylles togyder / and ranne vppon Eneas. There was slayne many knyghtes of the one parte / and of the other eneas smote Lansus wyth his swerde vpon his helme. and cloue hym vnto the teeth. there was grete sorow made whan lansus was ded / Durynge the while that this happed Merencyus wyth a grete flote of knyghtes. was descended vpon the ryuage of the Tonyre and made his wounde to be shwed vppe that was yet full sore / Thenne asked he after his sone Lansus. and comma­unded that he sholde be broughte from the ooste. And that he wolde wyte how he hadde mayntened hym selfe im the ba­taylle. For he wolde here and knowe of his proesse /

And as he spake thyse wordes / They came wyth the co [...] pus / makyng gret mone & cryeng full heuely. merēcyus knewe soone yt it was his sone / for his herte was heuy & full of tristesse / who thēne had seen hym cōplayne & sighe. wolde [Page] haue hadde grete merueylle / He rented his clothes and tare hys herys from his owne hede and / was an angerd and wrothe without mesure / And whan he hadde sorowed longe ynoughe he made hys thye to be dressed and bounden vp / And commaunded that hys hors sholde be brought to hym for to goo to the batayll to auenge ye dethe of his sone vpon Eneas / And whan he was sette ahorsbacke he toke a darte for to launche or cast / and thenne he went streyghte to the bataylle / And as a worthy knyghte smote amonge hys enmyes. And anone he dyde call Eneas with ahyghe voyce / Eneas herde hym and came toward hym / and whan he sawe hym he sayde to hym / Nowe Eneas that hast slayne my sone I am here present and wote not whether I shall here deye / but or that I deye I shalle gyue the suche strokes yt shalbe to thy grete grief / And thenne he launched to hym a darte sore harde. And syn another and after the thirde Eneas ranne about that durst not abyde hym / And after this Eneas myght suffer hym noo lenger but went vpon hym with a spere and wende to haue stryke hym with it / But he myssed of hym & smote his hors so that he fell and Merencyus vnder hym / Thenne rose there a grete noyse and agrete crye of Merencyus folke that came there alle to gyder with theyre swerdes naked: But Eneas that sawe Merencyus agrounde came towarde hym or euer he coude be vpon hys fete and gaffe hym suche a stroke with his swerde that he slewe hym. Thenne were they of the oost all dyscomfyted And more dommage they sholde haue hadde yf the nyghte hadde not departed theym one from another

¶How Eneas sent the body of Palas In to the shyppe & sente It to his fader / ¶Capitulum: .lij.

[Page]THenne went they of the ooste towarde laurence and Eneas toward his fortresse / but they coude not entre alle wythynne. But lodged theymself without vp­on the ryuere. And whan the mornynge came Eneas made to take the corpus of palas and made it to be moche rychely appareilled as to a sone of a kynge apparteyneth & putte it in to a shippe / and sent him ayen to his fader with the gay­ne of the knyghtes & wyth the proye that they had goten a fore that he deyed / The messagers that bare hym recounted well his grete proesse: and retourned ayen assoone as they myght cōme / Ouer longe a thynge it were for to reherce the son w [...] that his fader Euander made & his moder in lykewyse for hys dethe / And in this maner while came messagers out of Laurence with bran̄ches of olyue tree & asked trye­wes of eneas for to take vp the dede bodies & gyue theym sepultures / eneas graūted theym theire request gladly for / xij dayes. And whan this tri [...]ws were graūted eneas saide to the messagers / ha a lordes latyne what aduenture is it that maketh you to fyght ayenst me that wolde be your frende Ye requyre me of peas & tryewes for theym that ben deed / but ye shall vnderstāde that more gladli I wolde gyue them to theym that lyue. For I [...]rowed not for to haue fought here / nor I come not hither for to fight yf ye wolde leue me in peas / but I come here by the cōman̄demēt of the goddes for to haue a dwellynge place. Nor I fight not with theym of laurence. but I make were aienst turnus that wold haue lauy­ne the doughter of kynge Latynus ayenst the wille of the goddes. And yf turnus wyl haue vs out of this royalme me semeth that it were fulle couenable a thynge that he & I sholde fight togyder body ayenst body / & that he that sholde ha­ue the victorye ouer the other / he sholde haue the pucelle lauyne [Page] & her faders good wylle with alle / and the other that were ouercome sholde lese his lyffe. And thus they that be not gylty sholde not deye nor ye lōde shold not be dystroyed / Nowe goo youre waye & reporte to the kynge that that I haue saide & that I wyll abyde by. And that he doo me to knowe yf Turnus will be agreable to the same / The messagers were moche merueylled of hys fydelyte & of that that he had sayde and they toke theire leue and retorned ayen toward the kynge / to whome they declared all alonge alle that eneas hadde sayde vnto theym. and that the triews were gyuen. And incontyent they made theym redy for to brenne the bodyes ded and lyke wise dyde eneas of the other syde & ye ought to knowe that grete sorowe was there made by theym that hadde lost theire frendes in the bataylle. The ladyes of the cyte cursed turnus & the owre in whiche he bigan first the bataylle for to haue the doughter of kynge latyn / Thus lasted the soro­we thre dayes and thre nyghtes that they neuer dyde ceasse /

¶Of the messagers that Turnus hadde sent to dyomedes Capitulum .Liij

THenne assembled agayne kynge Latynus his ba­rons for to haue coūceylle what he myghte doo agaynst Eneas that wolde not but peas and concorde / And while that they were comynge to this counseylle the messagers that turnus had sente to Dyomedes / whan he soughte his ayde for to fighte ayenste Eneas / and that ba­re to Dyomedes ryche presentes in to the cyte of Agryp­pa. whiche is in one of the partyes of Puylle / where Dyomedes hadde dwelled euer syth the tyme that he was depar­ted frome byfore the cyte of / Troye And helde there the cyte and the lordeshyppes. After that he came agayne [Page] from puylle: The kynge commaunded that they sholde com­me afore hym for to telle what they hadde founde / vernylus began to speke ahyghe and sayde / Barons and lordes we dyde see Dyomedes and a grete parte of theym that were with hym afore Troye / we made to hym due reuerence and tolde hym what we were and who hadde sende vs / And also tolde hym ayenst whome we wolde make werre. And dyde presente vnto hym the yeftes that we bare vnto hym from the kyng Latyne / & whan kynge dyomedes hadde herde vs / he dyde answere to vs peasybly and sayde / Ha a fol­ke of ytalye. what aduenture commeth nowe to you I lette you wite for certayne that we that dyde fyghte ayenst the Troyens and that theyre londes we dyde dystroye. Gatte nor wanne therby nothynge / For howe be it that Prya­mus the kynge was dyscomfyted and his knyghtes distroyed. Right soo was Agamenon loste and slayne that cheffe gouernoure was a boue vs alle by the meanes of his wyf that loued more another than she dyde hym whiche holdeth nowe the londe what shalle I telle you. of the vnhappy. Pyrrus nor of the other grekes nor of my self / wyte well that I shall neuer fyght ayenst the Troyens yf I may. For more wors it is to vs happed in dyuerse maner of that we dyde fyght ayenst theym than it is to theym for to haue be dyscomfyted by vs. But goo youre waye ageyne and be­re thees gyftes vnto eneas & ye shall doo wysely / & I lete you wite yt wyth hym I haue foughte body ayenste body / and by cause yt I haue foūde hym of so grete strengthe and proesse I saye yet that yf he had nowe with him two hoūderd knigh­tes suche as he is & in theyre cōpanye hector & troylus / alle gre­ce myght be soone bi theym alle wasted & distroied. and well ye oughte this to beleue of me for I haue assayed hym / And [Page] Also ye muste vnderstande for veraye certeyne that all the recystence that was made ayenste vs grekes afore Troye it was made by the strengthe of Eneas of Ector and of Twylus / that socoured and reioysed the other. And were almoste equalle Hector Eneas and Troylus. But eneas was of more symple corage: Retourne agayn towarde eneas and make peas wyth hym yf ye be sage

¶How kynge Latyne coūseylled for to make peas wyth Eneas Capitulum Liiijo.

WHan the messagers hadde thus reported their wor­des / grete spekynge arose thrughe all the halle / And whan it was ceassed the kyng spake and sayd / Lordes I wolde we hadde goode counseyll afore that more dō ­mage sholde come to vs / We be not wyse for to fyghte agaynste eneas. as longe as that the goddes wyll be on his side: Nor ayenste his folke that neuer were wery for no batay­lle that they hadde. Now truste nomore vpon Dyomedes sete vs thynke and see how we shall mowe eschewe this pareyll / For vpon vs falleth the werke / and I maye nomore helpe my selfe. Wherfore I haue bethoughte me of one thinge / that is to saye a pece of londe ye marcheth towarde cecylle Lete vs gyue that grounde to the Twians / and accorde vs to theym. And yf they loue the countrey. lete vs suffre theym for to buylde there townes cytees and castelles: And yf they wyll not doo soo. but wyll go in some other countrey I shall doo make for theym ryche shipres and goode / And shall doo delyuere vnto theym all that they shall nede / And I shalle nowe sende vnto Eneas ryche presentes for to knowe his wylle in this byhalue. Thenne rose vppe an hondred knyghtes yt sayd they shold goo to eneas & also drastes yt loued not turnus sayd in this wyse to ye kyng / haa goode [Page] kynge alle they that ben here knowe well whereonto the thynge is come but none dare speke hyt / Alle we oughte to putte ourselfe in peyne for to haue peas / For many a man is all redy ded / wherby Eneas is wexed more stron­ge / Graunte vnto hym your doughter / for she shall be well employed wyth this two yeftes that ye doo promytte to hym: And thus shall we haue peas / And yf ye dare not doo it for Turnus / I shall mow praye hym fyrste. that he haue mercy of me and of other / And that he take the har­dynes vpon hym for to fyghte hym selfe alone / For folke ynoughe are all redy stayne / wherby the lande is dystroyed / And yf he feleth in hym selfe ye vertue & strengthe for to haue your doughter and the royame by force / Lete hym fyghte body ayenst body to his enmye that calleth hym therto / and that he wyll not see that the poure people be dystroyed / and that he haue in to his remembraunce the proesse of his fa­der. and that he goo ayenste Eneas for to fyghte wyth hym hande for hande / And whan turnus that was come ayen to Lawrence herde the erle Drastes speke s [...]o. he toke it in a grete anger. For he knewe well that he loned hym not / and thenne he spake by grete anger and sayd. Thou haste grete habondaunce of wordes wyth ye. Whosomeuer syghte thou wylte not come nyghe yf thou mayste kepe the a side / But in the plees amonge the senatours thou wylte be the firste that shall speke / and therof we haue not to doo nowe / And yet sayd Turnus to Drastes afore kynge Latynus that he neuer sawe dyomedes fyghte wyth eneas / but and yf E­neas came ayenst hym / he sholde not refuse hym nor flee ferre from hym / But sholde gladly fyghte wyth hym thoughe he were as stronge as the deuyll:

¶how eneas came afore the cyte of laurence Capo.

DVryng that thise wordes were the sayd Eneas had ordeyned his folke for to come afore the cyte of lau­rence / thenne came a messager cryinge to the kynge & to the barons that the troiens were departed from theire tentes for to comme and take the cyte by force / ¶Thenne was the cyte alle in a rore and sore moeued the cyte; eyns ranne to fette their harneys and made stones to be borne vpon the walles for to deffende theym / ¶Turnus went and armed hymself and commaunded to his folke that they sholde be re­dy right soone for to yssue out with hym / Turnus dyde putte his folke in araye & made his bussynes and trompettes to be blowen and yssued out to the bataille ¶The queene A­matha and lauyne her doughter bicause of this euyll aduenture that was moeued and the other ladyes went vp in to the temple of Mynerue for to see the assembles & who shol­de flee and who sholde abyde and who sholde doo moost of ar­mes / And sore they cursed Eneas and alle his felyship. ¶Whan Turnus was yssued out of the toure alle ar­med / The quene Canulla with alle companye of knyghtes and of maydens alle armed came toward hym. And demaunded the fyrst bataylle ayenst Eneas and hys kny­tes and that Turnus sholde abyde wythin for to kepe the walles of the cyte / And she sayde syre lete me doo with the bataylle / Turnus behelde her thenne and sayde Ha a Lady that are alle the proesse of Ytalye. Who shalle mowe rewarde you the meryte of the goodewyl­le that ye shewe nowe vnto me / I lete you wyte that to me are come messagers whiche doo telle me that Eneas sendeth here afore one part of hys folke and of hys knyghtes: And that the other commen alle awaye by the [Page] mountayne. and wylle assaylle the towne atte the other side And I shall telle you what I haue thought for to doo / I shalle putte my selfe wyth my folke vpon the moūtayne emonge the busshes that enuyronne the grounde there wyth maniarchers and my crosbowes and my knightes. And whan our enmyes shall be come in to / the narow waye / we shalle thenne sette vpon theym / and shall bere to theym gret domage. and ye lady wyth your folke ye shall abyde atte this side for to goo vpon the troians whan they shall come / And thenne came there Mesapus wyth a goode bande of folke whiche Turnus exhorted for to doo well / and that he sholde fyghte that daye vnder the banner of the noble & preu lady Canulla / And after that he hadde sette all his knyghtes in goode arraye he departed wyth his felawshippe for to goo wayte a [...]ter Eneas. atte the descendynge of the hille / And the quene Canulla and Mesapus & conroe & his broder caules rode all armed in fayr ordonaunce vnto the barryeres▪ Thenne the troians hasted themselfe for to come afore the towne / But assone that they myghte espye eche other. they ap­proched for to fyght togyder. they thenne lete renne theiyr horses / And gaaff grete strokes. the one to the other wyth the­ir sp [...]res. And atte their comynge hande to hande togyder there was grete noyse of horses and of harneys / And they launched and shotte soo thycke and soo faste. the one partye ayenste the other. that all the ayer was troubled / The Latynes hadde the wors atte the firste comynge togyder / For the troians rebuked theym / and caste theym abacke vnto the gates of the towne ¶Thenne retourned agayne the chyeff capytaynes of the Latynes wyth theyr companye well horsed vpon the twians. and beganne the medle and the crye of newe / And the Latynes bare theym selfe full well a [Page] while that by force of armes they made the troyens to re­tourne bak / But atte the last the troyens that were ne­uer wery of bataylles / made there merueylles of armes so that the latynes myght susteyne noo lenger the weyght of theyre swerdes / but were ageyne putte abak /

¶How the queene Canula was slayne In bataylle ¶Capitulum / lvj

THus It happed that tyme that the Latynes were putte twyes abacke by force of grete fayttes of ar­mes / And whan came to the threde tyme that the bataylles were all ordeyned thēne was ther grete destruction and grete slawghter made bothe of men and of horses byfore the barres of the towne where the valyaunt knyghtes made merueylles of the one part and of the other / but aboue alle other that were ther the queene Caunle dyde best In ar­mes and kylled and slewe the troyens on eyther syde of her. For with the swerde she had a [...]owe and a sheeffe of arowes hangynge by her syde. One tyme she shotte / Another tyme she smotte grete strokes with her swerde and hewe cleued and cutted of hedes and armes clene from the bodyes / ¶In the bataylles of the twyens was aryche man that was called Cleonis that afore hadde be a byshop In troye of the temple of one of theyre goddesses / He hadde lefte his offyce and hadde taken hym self to the fayttes of knygthed This man hadde moche ryche armes alle couered with fyn golde and of pre [...]yous stones / ¶And whan the queene Canulla sawe hym she dyde coueyte sore moche his armures and made her self redy for to slee Cleonyus / ¶A Twyen that was named Anyus apperceyued the same / And with this he was also wrothe for the grete ocysyon that this queene Canulla hadde made of the noble [Page] troians: this man began for to praye Iupyter that he wol­de gyue hym strengthe poure and hardynes for to auenge his wrathe / and his frendes that Canulla hadde slayne: And whan he had thus finysshed his owysen he lete go his horse towarde the quene / whiche was not aware of hym. he smote her vpon the lefte sholder wyth his swerde a venga­ble stroke / soo that he dyde cutte the harneys / and made his swerde to entre in to her white flesshe ferre wythin the body of her / soo that anone after she felle ded to the groūde: And after as lightly as he myghte he departed awaye. For he doub­ted sore the quene / But nought auaylled hym his sleynge for a mayde slewe hym in vengeaūce of her lady the quene:

¶How Turnus cam to the feelde & his folke wyth hym ¶Capitulum lvij

WHan Canulla was fallen doun from hir horse. thenne was there gret sorow made. and the bataylles of Latynus began all for to tremble and shake for fe­re: and noo recoueraunce was there more / but cam agayn wythin the barreers / and many of theym were thenne ouer throwen and cast doun in to the dyches. And the ladyes of the cyte moūted vpon the walles for to defende the towne And whan they sawe bryng the body of Canulla the worthy quene. they sette nomore by their lyues. but gaaf theym selfe to traueyll for to defende sooner than dyd the men. thē ­ne was sente a messager towarde turnus that was at his wat. he wyth his chyualre vpon the moūtayne as it is sa­id afore / Whiche shewed vnto hym the grete sorow of the batayll and how Canulla was ded. turnus toke soo grete a sorow therfor that he wyste not what to doo / But lefte his watchyng after Eneas / and came to the batayll / After this taryed not long that Eneas came and descended from [Page] the moūtayne for to come afore the towne for to conduytte his folke / And thus came Eneas and Turnus almoste bothe togyder attones to the medlee / But it was soo nyghe nyghte whan that they came there. that lityll faytte of knighthode was there made / But the Turnyens and the La­tynes wythdrewe theym selfe in to the cyte / And Eneas and his folke dyde lodge hemselfe withoute the walles of the towne / where they dyde pyghte theyr tentes. And whan the mornynge was come / Turnus that was full sory and wrothe for his folke that he sawe dyscomfyte and slayne. came byfore kynge Latyne in a proude manere / And sayd that he was redy for to doo the bataylle body ayenste body a­yenste Eneas / But sende for hym syr sayd Turnus. and take his othe. and doo deuyse the couenaunte / And yf he o­uercome me lete hym haue the lande. and the pucelle lauyne to his wyff / And yf I maye conquere hym lete hym goo his wayes. and leue me in peas wyth Lauyne your dough­ter / and wyth your royalme / The kynge thenne sayd peas­sibly to turnus. Ha ha valyaunte bacheler I doubte sore the aduentures of bataylle / and yf thou bethynkest well thyselfe how grete a londe thou shalt haue in thy holde after thy fader is deceassed and also that thou haste conquered grounde ynoughe by thyne owne proesse. And how many ryche maydens ben in ytalye of noble blode / and of highe estate. of whiche yu myghtest chose one to be thy wyff / Syth that the goddes wyl not nor graūte not that I gyue my doughter to no man that is of my royame. how be it that for the loue that I ha­ue vnto the. I had graunted her to the for to be thy wyf / and namely atte the request of my wyff / I haue taken her ayen from Eneas the preu & worthy knyghte. and haue suffered the for to vndertake the cruell bataylle. wherby I haue loste [Page] myn owne folke / and thou haste hadde grete dōmage / and we are atte this owre in soo grete peyne. that we maye no­more / and no longer we may not well abyde wythin this cyte / Also the feldes ben all couered wyth our men / that lye ded vpon the erthe. what shall I reherse all our euyll fortu­nes: were it not thenne better for the that thou were wythin thy londe whiles that thou arte hole & sounde in good plygh­te and ioyouse / and also afore that thou had lost thy liff / Loke & beholde the aduentures of the bataylle. how they ben grete. haue mercy on thy fader / whiche is in grete age /

¶How the couenaunte of the bataylle was made bytwene Eneas & Turnus Capitulum lviij

WHan Turnus herde the kynge speke thus / he taryed tyll that he had finysshed his wordes / and sone whā he myght speke / he sayd good kyng haue no drede for me nor no doubte / but suffer that my honour and praysinge be encreassed / Am I thenne soo feble: and doeth my swerde cutte soo lityll / that I dare not fyghte wyth Eneas. and is my flesshe more tendre & the bloode of my body more nyghe goon / more than is his / And I doo hym well to wytte that yf he come so nyghe me that he be woūded / he shal be ferre frō ye goddesse his moder / to whom he trust moche yf I fyght wyth hym: To thise wordes came there the quene Amatha that was sore troubled. and all a ferde of the bataylle & of the siege of the cyte. And whan she sawe turnus that wolde fyghte wyth eneas. she beganne to wepe & make grete mone and sayd / Turnus I praye the by the teeres that thou seeste falle fro myn eyen / and by the honour that I haue alwayes borne and doon to the. that thou fyghte not wyth Eneas / For yf thou deyed I sholde neuer lyue after nyght ne daye. For that owre I wolde neuer see that eneas shelde haue my doughter [Page] to hys wyffe / Whan Lauyne sawe her moder wepe she was therof fulle sory and wrothe and with this she be came rede In her face / And whan Turnus sawe her / the more that he dyde beholde her / The more he was taken of the loue of the pucelle. And more wyllynge and sore chaffed for to fyght with Eneas. And sayde to the queene / Madame wepe not for me / Nor doubte not of no thynge / For it is better that we two fyght togyder / Than that oure folke sholde slee eche other. Whan turnus had spoken thus he dyde make his [...] to be broughte afore hym and his harneys & armed himself moche rychely as of custome was after the facyen & mane­re of the londe atte that tyme / And the kynge Latyne had sent his messagers toward Eneas: for to announce vnto hym that Turnus was alredy appareylled for to fyght body to body aienst hym / Of the bataylle was eneas ryght glad and anone armed him. And of bothe partyes they assembled theym alle In afayre playne afore the cyte for to see the ba­taylles of this two barons whiche sholde haue be merueyl­louse. And the ladyes & the pucelles were moūted vpon the walles & the quene also. The kynge latyne was yssued out of the cytee with Turnus and with hys men / And of bo­the sydes they made sacrefyces for hym with whome they helde / And the kynge Latyne and the other barons deuy­sed the couenaunces / That who some euer were vanquys­hed. Other Turnus or Eneas / that he and hys hoost sholde voyde out of the Londe and sh [...]lde goo In to another coun­treye. ¶Whyles that they spake thus and that the con­uenauntes were deuysed and made and that rested theyre nothynge. But for to goo bothe togyder / An auenture happed there a merueyllouse thynge whiche appiered to all theym that were there / An egle grete and ouergrowen came [Page] fleynge hyghe bytwene the cyte and the tentes: And then­ne lighte hym selfe doun harde among a grete many of swā nes. that were in a water nyghe by / And toke one of the­ym bytwyx his clawes. whiche were grete and sharpe / and bare hym vpwarde by grete force. And anone all the hepe of theym arose / For they were aferde. and floughe all highe towarde the clowdes. And were soo many that all the ay­er was couered-wyth theym. And soo moche they dyde enuyronne all aboute the egle / that she lete falle the swanne oute of her clawes in to the water / And the egle fledde and heelde on his waye:

How Tholomeus made the bataylle to begynne ayen grete and horryble Capitulum lix

WHan the Turnyens and the Latynes sawe this thynge / they hadde therof grete Ioye / For they trowed that it hadde be to theym a goode bytokenynge: And therof arose thorughe all the ooste a grete murmure & a grete noyse. and houered in theym selfe soo sore / that for a lityll / they wolde haue ro [...]ne vpon the troians / Thenne spa­ke a deuynoure that was called Tholomeus: and sayd in audyence / Lordes turnyens this was that I desired for to see some tokens from the goddes / That egle that lighted amonge the hepe of swannes sygnyfieth our enmye stran­ger. that is Eneas that wasteth and dystroyeth our londe / But lete vs aduyse also that we enuyronne hym rounde a­boute wyth goode men of armes. as the swannes dyde the egle / And lete vs deffende Turnus agaynste hym / and well I wote that he shall flee awaye oute of oure countrey And thus shall we be delyuerde of hym. And thenne whan he hadde thus sayde. He shotte an arowe towarde the tro­ians / and smote a knyghte and ouerthrewe hym to the [Page] groūde bytwyx the other that were therof all abasshed

¶How Turnus dyde grete dommage to Eneas folke: Capitulum Lxo.

TEnne beganne agayne the bataylle of the one parte / And of the other Eneas ascryed to theym and sayd. Lordes why doo ye fyghte / Ye knowe well that the couuenaunte ys deuysed and made / That Tur­nus and I shall fyghte for you alle / Whyle that e­neas sayd thyse wordes. and cryed vnto his folke that they sholde not fyghte / There was a quareyll launched in to his hande / and wyste neuer who shotte hit. Thenne departed Eneas from thens / and Turnus and his folke ranne soone to fetche theyr armures. And thenne Tur­nus smote hym selfe in to the troians / Turnus atte his comynge on dyde grete dommage to the troians For he was a ryghte valyaunte knyghte of his / body. And desyred moche for to dyscomfyte theym. He satte vpon a charyette wyth foure wheles and foure whyte horses dy­de lede hym He hadde wyth hym the dartes for to launche and caste / And hys other armures for to assaylle and fyghte from ferre and of nyghe ¶Soone after that he was come to the medlee. he slewe Thelemon and Thamy toun and Potym and Glathome / and Tasdome / And after came there a troien towarde hym / that was sone of O­zon of troye / that was ryghte well armed of ryche armu­res / And to the same lauched Turnus a darte / and ouer­threwe hym full sore wounded. And assone as he sawe hym a grounde / he made his horse to tarye. and alyghted do­un from his charyotte. and sette his fote vpon his necke and shoued his swerde in to his throtte / And after he sayd to hym. Troian here is the londe that thou hast requyred for [Page] to fyghte ayenst me / whefore I shalle gyue to the thy fylle therof / and with the same he toke hys hand fulle of erthe fro the grounde and fylled hys throte therwithalle. while that he was apassynge / And wite for veraye trouthe sayde Turnus to hym. that alle thus I shall rewarde theym of thy nacyon that shall comme ayenst me In bataylle Anoone af­ter that he hadde sayde thyse wordes to the troyen / He recountred another that was called Habitem and was the felawe of hym to whome he had thus spoken / And slewe hym in­contynent and after hym many other moo / And while that Turnus went thus thrughe the bataylle alle att hys wylle sleynge the troyens. Eneas and Menesteus and Achates and Ascanyus came to the medlee / For Eneas hadde be alonge espace therfro for cause of the wounde that he hadde had In his hande and spored hys horse atte that syde where he wist that turnus was. And he and hys knyghtes made roome afore theym and slewe doune many of the Latynes and turnyens att euery hande of hem and soone aba­shed the Ytalyens so that they trembled for feere. Eneas slewe Afram and Osanum Achetym and Pulerum and gyas and also Atherantum / And tholomus that be ganne the medlee lost there hys lyffe / for a scanyus slewe hym atte firste stroke that he smotte hym with the glayue / Thenne a rose the noyse and the crye sore grete of bothe sydes / But the Latynes myght noo lenger endure and tourned theyre bakkes and went awaye / Eneas that chassed wolde not slee theym nomore. But dyde calle and sought after Turnus In the grete presse / And with noon other he welde fyght. Turnus taryed not longe In one place. But went euer here and there alonge the wynges of the bataylles wherby he dyde grete dommage to the troyens / thenne [Page] dyde Eneas assemble alle the grete bataylles / And aduy­sed hym selfe / that he sholde drawe towarde the cyte. that was all abasshed / Thenne called he to hym Menesteus and Sarestum that were connestables of his folke / and of the bataylles. And sayd to theym / make oure folke to wythdrawe theym from the bataylle. And brynge theym towarde the mountayne nyghe to the cyte. For I wolde take hit yf I maye / or elles Turnus shall fyghte wyth me / And they dyde soone as Eneas hadde commaun­ded theym. They made theyr folke for to drawe towarde the walles of the towne or cyte / and broughte ladders wyth theym / Eneas was a fore. and cryed on hyghe to kyn­ge Latyne / that full ylle he kepte his couuenauntes. ¶Amonge theym wythin the cyte moeued thenne. a gre­te dyscorde and varyaunce. For some wolde haue opened the gates to Eneas. But the other wolde not soo / but wol­de defende the londe ayenste hym / For they heelde theym selfe of turnus partye:

¶How the quene Amatha hanged herselfe by dyssperacyon: Capitulum lxj

WHan Amatha sawe the thynge goo thus / and ap­perceyued the ladders that the troians dyde sette vppe to the walles / And the fyre that they casted in to the cyte. and sawe not Turnus that sholde defende her / Wherefor she wende that he hadde be slayne. Thenne hadde she her thoughte sore troubled / And anone she wente in to a chambre wythoute companye / and toke the lyffe from her and hanged her selfe And whan the tydynges ther­of were knowen in the towne. they were soo affrayed that lytyll deffence was made there. Who thenne hadde seen Lauyne pullyng and rentyng her yelowe heeres [Page] hadde hadde of her grete pyte / And kynge Latyne that more abasshed was than Lauyne rented his roobes / And pulled of his heeres. And blamed hym selfe ryght sore that he hadde not gyuen his doughter to Eneas / Duryng this Turnus vnderstode the grete sorowe that was made wy­thin the cyte by a kynghte of his. that was smyten wyth a glayue thorughe the thyhe. and came ayenste hym as faste as he myghte spore and waloppe his horse / And sayd / Turnus haue mercy on thy men / For in the is oure laste hope / Eneas fyghteth harde ayenste the cyte. And threteneth all the tow [...]es to be broughte doun / And wytte that he dooth fyre to be caste in to the towne / And the kynge Latyne blameth hym selfe moche. and knoweth not what he shall do / But to tourne hym selfe ayenst the wyth Eneas. and gyue hym bothe his doughter and his royame And that more is Amatha the queene that loued the so moche and that was to the so good afrende hathe kylled her self her owne hande wherof the towne is sore moeued / And afore the gates is noon of thin that defendeth ayenst the troyens. Sauff Mesapus and Acyllas they withs [...]ande and kepe thentre ayenst the bataylles of the troyens / And thou art here gawrynge aboute nought. Whan Turnus herde the same he was ashamed and ryght sore wrothe and on angerd / And loked toward the cyt [...]e and sawe the flame of the fyre within the towne. Whan he saw that. he lyghted doune from his charyot and went toward the gate where we­re the grete bataylles. Thenne beganne he to make a signe to hys men that they sholde drawe backe For he wolde fight for theym with Eneas hande to hande In a felde as it was deuysed afore /

¶How Eneas and Turnus faught body to body In a felde one ageynst the other. ¶Capitulum Lxij:

ANoone as Eneas herde turnus speke / he made noo taryinge atte alle but went assoone as he myght toward the felde / and lefte the sawtyng of the walles and of the toures that they hadde enuayshed Thenne depar­ted from the assawte the one partye & the other for to see the bataylle of the two barons. Eneas and Turnus were bo­the In the felde all alone well appareyl [...]ed and aproched eche other ryght harde lyke two bulles / and drewe out theyre sharpe swerdes / Thenne was there noo sparynge. But that euerych of theim smote his enmye so that ye sheldes wherwith all they couered theymselfe were alle to hewen and broken alle to peces / the bataylle was fyerse and cruelle for they hated eche other ryght sore / But atte the laste turnus was ouercomme / and he cryed mercy to eneas that he sh [...]lde not slee hym. And wytte that Eneas sholde haue pardoned hym that yt he hadde mysdoon ayenst hym. if it had not be the [...]ynge & the gyrdell of palas that turnus dyde were vpon hym for whan eneas dyd see theym / the sorowe that he made for ye dethe of Palas that turnus had slayne was renewed in his herte / whiche redoub [...]ed thenne hys grete wrathe / and sayde to turnus thou shalt abye nowe the gladnes that thou had of the dethe of Palas / For thou shalt here deye for his sake / And anoone he shoued his swerde thrughe the body of hym wherout hys sowle departed / All thus was conquered alle Lombardye and the pucelle Lauyne by the hande of eneas /

¶Hw eneas wedded Lauyne and hadde the royalme of Ytalye. ¶Capitulum / Lxiij

[Page]ANoone as Turnus was slayne / his frendes departed ryght sory and wrothe / And many other wyth theym / that loued hym for his proesse ¶The kynge Latyne that was ryght sore of his grete myschaunce. Came to Eneas / his noble men wyth hym. and gaff hym his doughter / and all his royame / And receyued hym wyth grete I [...]ye / and thenne was the peas made towarde theym that hadde be agaynste hym / Anone the troians and the latynes togyder wente for to brenne and reduce to asshes bodyes ded that were yet in the feeldes / And whan that was doon / the quene Camula was sente in to her londe. and the quene Amatha was rychely broughte to her sepulture. Thenne was ceassed all the sorowe thorughe all the royame of ytalye Eneas that had hadde many a sore peyne by the space of seuen yeres. syth that he came from Troye toke to his wyff Lauyne the doughter of kynge Latyne that heelde laurence. the maystresse cyte of lombardye atte that tyme / And moche Ioye was there made atte theyr weddynge /

¶How kynge Latyne deceassed / And Eneas soone after hym / And how Ascanyus was called Iulyus Capitulum lxiiij

AFter this abode not longe. but that the kynge La­tynus deyed / and deceassed oute of this mortalle worlde / Thenne heelde Eneas all the royame But werres ynoughe he hadde there. For Merencyus that heelde Cecylle werred ayenste hym / But Eneas va­ynquysshed hym not / By cause that dethe toke hym sooner than he wende But after the deth of Eneas. his sone Ascanyus faughte wyth Merencyus body [Page] to body & sleewe hym / and thēne he was called ascanyus iulyus by cause hys fyrste berde was but yonge whan he slewe Mezencyum / whan eneas had brought yt lōde in peas & had delyuered it from grete myserye / the dethe yt noo body spareth ranne hym vpon In suche a manere / that noo body coude neuere knowe how he loste hys lyffe / Some sayen that he was slayne wyth the thonder bolte the other sayen that the god­des hadde rauyshed hym / the other sayen hys body was fo­unde wythin a ponde or a water that is nyghe the tony­re whiche is called Munycum of theym of the countreye / Eneas lyued but thre yere after that he hadde wedded La­uyne the doughter of kynge Latyne thus as we haue saide

¶How Ascanyus helde the royalme of Ytalye after the dethe of Eneas hys fader / ¶Capitulum. Lxv

AFter the dethe of Eneas helde the royalme Ascany­us hys sone that he hadde of the doughter of the kynge Pryamus of Troye / And Lauyne abode grete wyth chylde of a sonne. Wherfore she doubted sore lest that Ascanyus sholde make hym deye In treyson for to holde alle the royalme / Therfore was she ryght sory / And for feere that she hadde of it / She fledde awaye In to the fo­rest wythyn the lodges of Errorus that was a pastour And there she was tylle that she was delyuered of her sone that hadde to name Syluyus postumus / whan Asca­nyus wiste where hys stepmoder was goon and that she hadde a sone whiche was hys brother / he sent her worde that she sholde comme to hym wythout eny feere / She retourned & came ayen to herstepsone ascaniꝰ berynge her son siluy­us betwene her armes: ascanyus gaffe by ye coūseill of hys [Page] barons of his londe to his brother Syluyum the cyte of Lawrence wyth the appartenaunces. Ascanyus buylded firste the towne or cyte of Albe in lombardye. And there was his resortynge / by the space of xxxviij. yeres that he heelde his reygne. after the dethe of hys fader Eneas. And of thys cyte ben many in doubte who buylde it vppe. Ascany­us or elles Syluyus postunus his brother / By cause that all the knyges of lombardye that were syth Ascanyus vnto Romulus that founded rome hadde to name Syluyus for the hyghnesse of hym. that fyrste heelde and buylded Albe. This Syluyus was ryght valyaunte / and mayn­tened well the royame / And therfore all they that came after hym were called Syluyus / lyke as after Cesar Au­gustus / for his worthynesse. all the emperours of rome that were after hym are named Augustus. Ascanyus hadde a sone that called was Iulyus / but whan Ascanyus deyed Iulyus was to yong for to rewle the royame / And therfore he gaaff hit to Syluyus postunus his brother by Eneas his fader. whiche he loued moche. and taughte hym well and chastysed hym well as longe as he was a lyue / ¶And wytte that after that he was ded / the quene La­uyne hadde a sone by Melompodes that hadde to name Latynus siluyus. After Ascanyus regned Syluyus postunus his brother ¶Of Iulyus the sone of Ascanyus yssued Iulyen / of whom descended Iulyus Cesar / And knowe that from the tyme that the children of ysrahel came oute of thraldome fro the kynge of Egypte Pharao. Whā they passed the red see / vnto Ascanyus tyme. that was was kyng of Lombarde was .CCCC.lxvij yeres / After Syluyus postunus that was kyng .xxix. yeres / helde the royame latynus syluyus .l yeres in the tyme that eneas & his sone [Page] Ascanyus came in lombardye. regned in Iherusalem kynge Dauyd the fader of Salamon that the scrypture pray seth soo moche. After Latynus Syluynus regned in lombardye Arbasylyus xxix. yeres / After hym regned Egystus siluyus xxvij. yeres. After regned Capys siluy­us xxiij. yere / After regned Ehiberynus syluynus viij yeres. After regned Capestus xiij yere / After regned Syluynus agryppa lx. yeres ¶In this tyme was O­merus moche made of / and renommed of scyence in Gre­ke / After Agryppa regned Armelyus syluynus xix. ye­res / This kynge was vnhappy. and was slayne wyth the thonder / After hym dyde reyne Postyus siluynus / In this kynges dayes byganne the historyes of the romayns. and of theym that founded roome. But therof I shall telle now nomore / but shall here make an ende of this lytyll boke / named Eneydos:

HERE fynyssheth the boke yf Eneydos / compyled by Vyrgyle / whiche hathe be translated oute of latyne to frenshe / And oute of frenshe reduced in to Englysshe by me wyllm̄ Caxton / the xxij. daye of Iuyn. the yere of our lorde .M.iiij Clxxxx. The fythe yere of the Regne of kynge Henry the seuenth


This keyboarded and encoded edition of the work described above is co-owned by the institutions providing financial support to the Text Creation Partnership. This Phase I text is available for reuse, according to the terms of Creative Commons 0 1.0 Universal. The text can be copied, modified, distributed and performed, even for commercial purposes, all without asking permission.