¶ Here begynneth a treaty se of this Galaunt with the maryage of the bosse of Byllyngesgate. vnto London Stone.
Galaunt.
Ryght as small flodes / encrease to waters fell
So yt narowe furrous / maye not susteyne.
Ryght so pryde vnclosed may not counsell
this new wretchednes yt causeth vs ꝯplayne
How wo hath wrapped vs in a cruell chayne
Our pryde sheweth it well bothe terre and nere
Englonde may wayie▪ that euer it came here
¶ The synne that now regneth / to beholde is ruthe.
Of fraude and dysceyte / grete abhom ynacyon
But nede constrayneth vs / now to saye the truthe
Of pryde and dysceyte / this newe dyssymulacyon
That blyndeth and consumeth / our Englysshe nacyon.
Lucyters progeny amonge vs doth appere
Englande may wayle that euer it came here
¶ Ryght late stode our lande in suche prosperyte
Of chyualry / manhode / and ryche marchaundyse
Thrughe all crysten royalmes / sprange our felycyte.
Of grete welthe and prowesse / in sondry wyse
Our sadnes is chaunged / for the newe guyse
We haue eryled our welthe / I note where
Englande may wayle / that euer it came here.
¶ Pryde hath founde waye to exclude man fro blys
In dysfygurynge nature / by this newe araye
Bothe men and women / can saye what it is
For bothe nede and pouerte / goth nowe ryght gaye
But alas our sorowe / encreaseth euery daye
And yf ye lyue longe ye shall bothe se and here
That Englande shall wayle / that euer it came here.
¶ For pryde hathe our plente / tourned to euyll fare
And fedeth vs as beestes / that draweth in the ploughe
Many a worthy man / bryngeth he to sorowe and care
Where fortune somtyme / fresshely on hym loughe
Examyne thy lyuynge that this worlde vseth ynoughe.
How / nede with synne / groweth euery where
Englande may wayle that euer it came here
¶ For many a vengeaūce as scrypture maketh mencyon
Hath fallen to kyngdomes in sondry wyse
And fynally put the people in dystruccyon
For theyr obstynacy / a newe fangle guyse
Alas englande that somtyme was so wyse.
Other nacyons refuse / hast bought so dere
That thou mayst wayle / that euer it came here.
¶ Somtyme we had Fraunce / in grete derysyon
For theyr hatefull pryde and lothsome vnclennes
Vse we not nowe / the same in our regyon
And haue permuted out welthe / for theyr gladnes
Lechery of our people is become a maystres.
Our gentylnes / for galauntyse haue we lefte there.
Englonde may wayle that euer it came here.
¶ It ye beholde the galauntes progenye byperyous
That out of Fraunce be fledde / for theyr intoxycacyon
Hath nowe vengeaūce consumed / that royalme gloryous
For theyr pryde / and synfull abhomynacyon.
That all the worlde / may wayle theyr desolacyon
O Fraunce / why dyde not these galauntes abyde there
Englande [...]
¶ For in this name Galaunt / ye maye expresse.
Seuen letters for some cause in especyall
That fygureth ye. vii. deedly synnes & theyr wretchednes
By whome man is made / to the deuyll thrall.
Was not pryde cause of Lucyfers fall
Pryde is in hell / and galauntes nygheth them nere.
Englonde may wayle / that euer it came here
¶ O thou gay galaunt / by thyne vnthryfty name
With gabbynge & glosynge / gettest that thou hast
Gyle was thy father / and Ialousye thy dame
In Iettynge / in Ianglynge / thy dayes ben past.
For all thy gloryous goynge / age gnaweth fast
Thy glased lyfe and glotony / be glewed so in fere
That Englande may wayle [...]t that euer it came here
¶ Appetytes of auaryce / be to them so amerous
Abusyon and arrogaunce / ben of one affynyte
Aduenture and angre / ben aye so debatous.
Faynynge estate / of counterfet auctoryte
Adulacyon of aduenture / mayst thou not auaunt the
As a lyer in goodnes / in thyne araye doest appere
Englande may wayle / that euer it came here
¶ For all the lande / lechery lepeth aboute
That good loue and lawe / ben almoost lorne
Of luste and lykynge / ledest thou suche a route
That slouth and lechery / haue elennes to torne
Thou labourest to lose / that thy frendes gat to forne
For lewdenes and lechery / ben so ledde in fere.
Englonde may wayle that euer it came here.
¶ Abhomynable accydye / accuseth all our nacyon
Our aungelyke abstynence / is nowe refused.
Ferthermore of Antecryste / this newe dyssymulacyon
Alas that suche sorowe / amonge vs is vsed
Our auaryce and hatred / haue vs so accused
That dyuers aduersytees / seweth vs yere by yere.
Englande may wayle that euer it came here.
¶ For our wastynge wretchednes / that wades so depe.
In our wanton werynge / of clothes to torne
To wyldenes & wrathe / the worlde taketh moost kepe.
For in wastynge & vanyte / men reken not what is lorne
For wyfe and for women / for to were the horne.
That vertuous vyrgynyte / is deed and layde on bere
Englande may wayle that euer it came here
¶ The noble course of nature / nycete hath deuoured
For nede causeth it to be our desolacyon
So hath the newe fangles / our welth obscured
That neclygence nouryssheth necessyte / to our confusyon.
This causeth our galauntes / by theyr nacyon
Neuerthryfte and thryueles / noye euer vs so nere
Englande may wayle / that euer it came here.
¶ For trygetours & tryflours / that tauernes haunte
Haue trouth and temperaunce / troden vnder foote
Talewes and talkynge / and drynkynge ataunte.
As tyrauntes and traytours / toyllous in moote
Tyll they be tryed out is there no boote
And trysed to baratrum / tossed in fere.
Englande shall wayle / that euer it came here.
¶ O galaunt vpon galaunt / & o thou galaunt gaye
And thou ruskyn galaunt / that pouerte doth menace
For all thy warrocked hoode / and thy proude araye
And thy parrocked pouche / that thou so fast doest brace.
Thou busyest the / to counterfet Lucyfers trace.
Thynke not to longe / or thou dwell with hym there
For the cursed ensample / that thou shewest here:
¶ So many barefote people / & so fewe good lyuers
Hath no man sene / syth the worlde began
So many styroppes / and so fewe good chyuallers
And so many braynles / that lytell good can
Men arayed as women / and woman as man
This causeth deth / & that all thynge is so dere
Englande maye wayle / that euer it came here
¶ So moche rychesse and araye / and so moche nede
So many bedes borue / and so lytell deuocyon
So moche fasrynge for hungre / and so lytell nede
So moche paynted worshyp / and so lytell reason
I trowe no man hath sene / in this regyon
Our synne asketh vengeaunce / I am in grete fere.
In shorte tyme we shall wayle / that euer it came here.
¶ Howe many poyntes were they nowe a dayes
And yet a good poynte / amōge them were harde to fynde
Daggers of vengeaunce / redy to make frayes.
With longe taters downe to the ars behynde
Tryppynge wt small shankes / as lyght as lefe on lynde.
To make it toughe & fresshe / as it were the newe yere
Englande may wayle that euer it came here
¶ So many purfled garmentes / furred wt non sequitur
With so many penyles purses / hath no man sawe.
Small gyrdynge in the waste / wt all theyr other mustur
That we go all backewarde / from hyghe to lawe
Y florysshynge mede of our welth / we haue begō to mawe
But we beseche god / amende vs another yere
Or elles we shall wayle that euer it came here
¶ Our women are dyspoyled / & gyue them to wantones
Our men with cloutes / at theyr brest lyke a pye
Our women haue debated / with shamefastnes
And our men with vnclennes / it I shall not lye
O englande thou mayst wepe with Ieromye
Seynge the people thus ledde by the ere.
Englande maye wayle that euer it came here.
¶ Our women in theyr parte / laboure as they may
In theyr aray with chere and countenaunce
Our men on theyr syde make them fresshe and gay
And laboure to purchace / womens pleasaunce
Thus bytwene bothe groweth moche myschaunce
Eche seketh synne as dothe appere.
Englande may wayle / that euer it came here.
¶ Our galauntes lyue / in lustes as beestes.
Maynteynours of quarelles / and vnthryftynes.
Our shameles women with theyr hyghe crestes
Extorcyon / robbery / and our vngentylnes.
Prelatis necligēce lordis rauayn & marchaūtis deceytes
These asketh vengeaunce / this lesson must ye lere
Elles shall ye wayle / that euer it came here.
¶ Beholde these dayes / the people of our nacyon.
Are charged with synne / and gouerned by folye.
Howe nede wyll compell vs / by transmygracyon
With very wo / dryue vnto Babylonye.
O englande / where is nowe thy glorye
That somtyme shone / thrughe the worlde so clere.
Well mayst thou wayle / that euer this sorowe came here.
¶ All people laboure of this newe dysguysynge.
In forgynge theyr fantasyes / to maynteyne pryde.
He is nowe wysest / that can moost of deuysynge
Good makynge of a man is nowe layde on syde
This newe araye is brought vp / in this lande so wyde
And yet for all that it may not last a yere
Englande may wayle that euer it came here
¶ Beholde the rolled heddes / stuffed with flockes.
The newe broched doublettes / open at the brestes
Stuffed with pectoll / of theyr loues smockes.
Theyr gownes and theyr cotes / shredde all in lystes
So many cappes as now be / & so fewe good preestes
I can not reken halfe the route of theyr marde gere.
Englonde may wayle that euer it came here.
¶ These galauntes / vse also full abhomynacyon.
Theyr typpettes be wrythen / lyfe to a chayne.
And they go haltered in them / as horse in the stable
It is a peryllous pronostycacyon certayne
For synfull soules / shall be bounde in payne
Hande and fote in perpetuall fyre.
They shall curse the tyme / that euer it came here.
¶ All these newe bulwarkes / they were at theyr knees
They laboure sore in theyr wyttes / fantasyes to fynde
No man holdeth hym contente / with his degrees
Pryde goth before / and shame cometh behynde
Alas that Englysshe men / sholde be so blynde
So moche sorowe amonge vs and so lytell fere
We may wayle the tyme that euer it came here
¶ Forget not lyghtly / howe many straungers.
Haue entred this kyngdome / and kepte the possessyon.
Fyue tymes / as wryteth olde cronycles
And chaunged our tunges / in sondry dyuysyon.
O elergy / praye for our Englysshe nacyon
That god for his mercy / of this synne make vs clere
Elles we shall wayle / that euer it came here
¶ Effectually pray god / for his reformacyon.
Of welth / manhode / and of marchaundyse.
And tresoury of peas / that Cryst in his passyon
Lefte bytwene god and man / whan he sholde dye.
The comynalte in loue / conserue perseuerauntlye
With charyte bothe hyghe and lowe to Ioyne in fere
In voydynge of synne that tourmenteth vs here
¶ O englonde / remembre thyne olde sadnes
Praye god thou maye reioyce / thyne olde felycyte
Exyle pryde and releue to thy goodnes
For synne hath consumed / this worldes humanyte
That thou may resore / agayne to thy gladnes
And his blessyd moder / as this lande is her dowere
For we haue cause to wayle that euer it came here

¶ Thus endeth this galaunt.

¶ Here begynneth the maryage of London Stone and the fayre pusell the bosse of Byllyngesgate.

HErken vnto me / bothe lowde and styll
And to this matter / laye to your eere
And of your aduyse & also your good wyll
Of this lytell prosses / yt after doth appere.
Of .ii. yt haue dwelte ī londō many a yere.
And nowe is dysposed / to be man and wyfe
Helpe thē with your charyte / to bye theyr weddynge gere
For they be bothe naked / & not worth an halfpeny knyfe.
¶ To you theyr names / I wyll declare
If ye knowe ony Impedymente.
The one is the bosse of Byllyngesgate of beaute so fayre.
And the other London Stone / curtes and gente
This is theyr purpose and hole entente
To be maryed / as soone as they maye
He that wolde let them I wolde he were shente
It wolde do you good to se them daunce and playe.
¶ For now ye grete loue / yt is bytwene them twayne.
And neyther of them loked other in the face.
London Stone answered / full wysely agayne.
Where is no loue / there lacketh grace
But euyll tunges is so vnmylde
And of late hath sayd / in a place where they dydemete
[...]ow the Besie of byllyngesgate / hath had a chylde.
By the well with two buckettes in bysshop gate strete.
¶ It were able to make ony woman wepe
To be so deedly belyed as is the good Bosse.
The man is in synnes depe
That robbeth her so of her good lose
[Page] For to his soule it is daungerouse.
Thus sayth London Stone / of prudence so wyse
He that in sclaunder / ony wyll dysclose.
Of the deuylles rewarde / he shall not mysse
¶ Therfore let my wyfe and me alone.
For by my study and wakynge many a nyght.
I knowe by the sterres / that shone by the moone.
That fayre Bosse / hooly was in my syght
And that to my nature / she sholde be coequall.
And remayne as my fere / euer in my syght.
By the purueyaunce / of the goddes Imperyall
To my comforte shynynge as the sterres bryght
¶ Wherfore I beseche you / in humble wyse
To reporte the beste in euery place
And saye no worse / than maye be to your prayse.
Whiche Iupyter had ordeyned of his grete grace
Longe or that we came in to this towne
For our comforte / and for our solace.
As man and wyfe by dyuyne prouysyowne
Therfore are we greed to remayne in this place.
¶ Syth the goddes aboue / hath destyned them so.
Let vs be mery and thynke howe they daunce
For it is a goodly couple of them two.
For in theyr behauoure / was neuer founde varyaunce
As knoweth all that here be present
Whiche brynge the herers / to lyfe eternall.
Where god is regnynge permanent
Amonge his aungelles celestyall
¶ Finis.

W

[numerals 7 and 4]

C

Wynkyn · de · Worde.

This keyboarded and encoded edition of the work described above is co-owned by the institutions providing financial support to the Text Creation Partnership. Searching, reading, printing, or downloading EEBO-TCP texts is reserved for the authorized users of these project partner institutions. Permission must be granted for subsequent distribution, in print or electronically, of this EEBO-TCP Phase II text, in whole or in part.