PRoblemys of olde liknesse and figures.
whiche ꝓuyd been fructuous of sentens
And haue auctorities grounded on scripture
By resemblance of notable apperannce
with moralitees concludynge on prudence.
Lyke as to the byble rehercith by writynge.
Howe trees somtyme those them a kynge
Firste in their chose they named olyue.
To reigne emong them Judicū dothe expresse
But he him self gan excuse blyue.
That he might nat forsake the fatnesse
Nor the figgetre her amozous swetenes.
Nor the vyne tre his holsom fresshe corage.
whiche yeueth comforte to al maner of age.
And semblably poetes laureat.
By dyrke parables ful conuenient.
Feyne that byrdes and bestes of estate
As a ryol / eglys and lyons by assent.
Sent oute wrytes to holde a parlement
And made the crye brefly for to say.
Some to haue lordeship and some to obeye
Eglys in the eyre heest to take their flight
[Page] Power of lyones on the grounde is seen.
Cedre emonge trees highest is of sight
The laurelle of nature is ay grene.
Of floures al flora ay goddesse and quene.
Thus in al thinges ther been diuersitees
Some of estate and some of lowe degrees
Poetys wryte wonderful lykenesse.
And vndre couert kepe thym self ful close
They take bestes and foules to wytnesse
Of whose saynges fables first arose.
And here I caste on my purpose
Oute of frensshe a tale to translate.
within a pamflet I radde & sawe but late
This tale whiche I make of mencion
In grose reherceth playnly to declare
The grete prouerbes payes for the raunson
Of a lytel byrde taken in a snare.
Wonderful desirous to escape oute of care.
Of myn auctour folowynge the processe.
So as it felle in ordre shal expresse
Somtyme ther dwellyd in a smal vyllage.
As myn auctor maketh mencion.
[Page] A chorle whiche hadde luste and corage
within him self by diligent trauayl.
To araye his gardyn with notable aparayl
Of lenghe and brede y liche square & longe
Hedged and diched to make it sure & stronge
Alle the alyes were made playn with sonde
The benches couered with newe turues grene.
With the sote herbes and condutes at the hunde
That wellyd vp ayenst the sonne shene
Lyke vnto siluer or any cristal clene
The burbyl waues in their vp boylynge.
Rounde as a beral their bemys out shewynge.
In myddes of the gardyn stode a fresshe laurel
Theron a byrde syngyng day and nyght.
With shynyng fethers brighter than gold wyre
Whiche with her song made heuy hertes lighte.
That her to biholde it was an heuynly sight
How towarde euyn and in the dawnynge.
She dyd her peyne mooste amerously to synge
Esperus enforced her corage
To warde ewyn when phebus went to west
Amonge the braunches to take her auantage.
[Page] To synge her compleyn and than to go to rest
At at the rysyng of the quene alceste
To synge agayn as it were her dewe
Erly on morowe the day after to salewe
It was a very heuynly melody
Euyn and morowe to here the byrdes songe
And the swete sugred armony
with vncouthe warbles & tones drawe a longe
That al the gardeyn of the noyse ronge
Tyl on the moro we whan titan dyd shyne clet̄
The byrde was trapped & caught in a pantere.
The chorl was glad that he the byrde had take
Mery of chere of loke and of visage
And in al haste he caste for to make
within his house a pretty lytel cage.
And with her songe to reioyse his corage
Tyl at the laste the cely byrde abrayde.
And soburly vnto the chorle she sayde
I am nowe take and stonde vndre daunger
Holden strayt that I may natfle.
A dieu my song / my lusty notes clere.
Nowe haue I loste my libertie.
[Page] Nowe am I thralle that somtyme was free.
And trust me wele while I stonde in distresse
I can nat synge nor make no gladnesse
And though my cage forged were of golde.
And the penacles of beral and cristal
I remembre a prouerbe saide of olde
who lesith his fredom he lesith alle
For I had leuyr vpon a braunche smalle
Merely synge amonge the wode grene
Than in a cage of siluer bright and shene
Songe and pryson haue noon accordance.
Trowyst thou I wyl synge in prysone
Nay / for songe ꝓcedith of ioy & plesaunce.
And pryson causeth deth ad distruction
Ryngyng of feters maketh no mery sounde.
Or who shulde be mery or iocunde.
Ayenst his wyl that lyeth in cheynes hounde
what auayleth a lyon to be a kynge
To be shyt vp in a toure of stone
Or an egle vndre strayt kepynge
Called kynge of foules euerichone
Fye on lordeshyp whan libertie is gone
[Page] Aunswere herto and let it nat asterte
who syngeth merely that synge nat atte hert
But and thou wylt reioyse of my syngyuge
Suffre me to go fre from al daunger.
And euery day in the gray mornynge
I wyl repaire vnto thy laurer
And merely synge with lusty notes clere
Vndre thy chambre or afore thyn halle.
Euery season whan thou lyst me calle
To be shytte vp and pynned vndre drede
No thynge accordeth to my nature
Though I wer fed with myllr & wastel brede
And swete curdes brought to my pasture.
yet I hadde leuyr to do my besy cure.
Erly on morowe to shrappe in the walle
To fynde my dyner emong the wormes smal.
The labourer is gladder at the ploughe
Erly on moro we to fede him with bacon
Than some man is that hath tresour enoughe
And of al deynties plenty and foyson
And no fredom with his possession
[Page] To go at large but as a bere at a stake
To passe his bondes if he leue take
Take this aunswere for a ful conclusion
To synge in prison thou shalt me nat cōstrain
Tyl I haue fredome in wodes vp and downe
To flee at large on bough rough & playne.
And of reason thou sholdest nat disdeyn
Of my desire but laughe & haue gode game
But he that is a chorl wold eche were the same.
wele quod the chrole sith it wol nat be.
That I desire as by thy talkynge.
Magre thy wyl thou shalt chese one of thre
within a cage mery to synge
Or to the kechyn I shal thy body bryng.
Plucke thy fethers that been bright and clere.
And after roste or bake the to my soupere
wele quod the byrde as to reson I say nat nay
Touchynge my song a ful answere thou hast
And whanne my feders be pulled a wey
If I be rostyd and baken in a paste.
On me thou shalt haue a smal repaste
But and if thou wylte worke after my conseil
By me thou maist haue greate auayl.
If thou wylt to my reasone assent
And suffre me to go fre from pryson
without raunson or any other rent
I shal the yeue a notable guerdon
Thre grete wisdomes accordyng to resone.
More of value take hede what I profre.
Than alle thy gold shyt in thy cofre
Truste me wele I shal the nat disceyue.
wele quod the chorle tel on let see
Nay quod the byrde thou muste afore cōceyue
who that shal teche of reason must go fre
It sytteth a master to haue his libertie.
And at large to teche his lessone
Haue me nat suspecte I mene no treason
wele quod the chorle I holde me content.
I truste thy promysse whiche thou madest me
The birde fley forth the chorle was of assent
And toke her flight vnto the laurel tree
Than thought she nowe stonde I free
with nor panters I cast nat al my lyue.
Nor with lyme tuygges any more to stryue
He is a fole that scaped is daunger.
[Page] Broken his fetters and fled oute of prison.
To resorte / for brent childe dredith fyre.
Eche man be ware of wysdome and reasone
Of sugre strawed whichl hydeth fals poyson
Ther is no poison venym so ꝑlous of sharpnes
As is whan it hath of triacle a lykenesse
who dredith no peryl in peryl he shal falle
Smothe waters ben oftentymes depe
The quayle pype can moste falsly calle
Tyl the qu ayle vndre the nette dothe crepe
A blere yed fouler trust nat though he wepe
Eschewe his thomb of weping take non hede
That smalle byrdes can nyppe by the hede
And I that nowe suche daunger am escaped
I wyl be ware and afore prouyde
That of no fouler I wyl no more be iaped.
From their lyme twygges I wyl fle fer aside.
where peryl is grete peryl is to abyde.
Come nere thou chorle & herkyn to my speche.
Of thre wisdomes that I wyl the teche.
Gyue nat of wysdome to hasty credence
To euery tale and eche tydynge
[Page] But considre of reason and prudence
Amonge many tales is many a grete lesyng.
Hasty credence hath caused greate hyndrynge.
Reporte of tales & tydynges brought vp newe
Caused many a man to be holde vntrue.
For one part take this of my raunson
Lerne the secounde grounded on scripture
Desire thou nat by no condicion
Through whiche is impossible to recure
worldly desires stonde in auenture
As who desireth to clymbe hye on loft
By sodeyn turne he falleth vnsofte
The thrid is this beware bothe euyn & morow.
Forgete it not but lerne this of me
For tresoure loste make neuyr to grete sorowe
whiche in no wyse may recouered be.
For who so taketh sorow for loue of any degre
Rekyn his loue and ofter his payn.
And of one sorowe he maketh sorowes tweyn
Aftre this lessone the byrde began a songe
Of her escape gretly reiosynge
And she remembred also the greate wrouge.
[Page] Done by the chorle firste at her takynge
Of her affray and her imprisonynge
Glade that she was out of drede
Saide vnto him houyng aboue his hede
Thou were quod she a very natural fole
To suffre me departe of thy leudnesse
Thou ought cōplayn & make dole
And in thy hert to haue grete heuynesse
That thou loste so passinge grete richesse
whiche myght suffised by value in reknynge
To pay the raunson of a mightye kynge
Ther is a stone whiche is called a iacounce
Of olde engendred in myn entrayl
whiche of fyne golde passith a grete vnce
Citryne of colour like a garnet of entable
whiche maketh men victorious in batayl
And who soeuir beryth on him this stone.
Is fully assured ayenst his mortal fone
who that hath this stone in possession
Shal suffre no pouerte ne noon indigens
But of al treasoure haue plenty and foyson
And euery man shal do him reuerence.
[Page] And noon ennemye shall do to him offence
But fro thy hondes nowe that I am gone.
Pleyn if thou wylt for thy part is none.
If causeth loue it maketh men gracious.
And fauourable in euery mannys sight
It maketh accorde bit wene men enuyous.
It ꝯforteth soroful it maketh heuy hertes light
Lyke to poyson in colour shyneth bright
I am a fole to tel al at onye
Or to teche a chorle the pryce of precioꝰ stones.
Men shulde not put a precious margarite.
As rubyes saphires and other stones ynde
Emeraudes nor rounde perles whyte
A fore rude swyne that loue draffe of kynde
For a sowe delyteth as I fynde
More in foule draffe her pigges for to glade
Than in al the pery that cūmeth of garnade.
Eche thinge draweth to his semblable
Fysshes in the see bestes on the grounde.
The ayr for foules is cōmendable
And to the plough man for to tylle the londe
And a chorle to haue a muk forke in honde
[Page] I lese my tyme any more to tary.
Or to teche a chorle of the lapidary.
That thou haddest thou gettyst nomore ayen
Thy lyme twygges and thy panters I defye.
To let me go thou were foul ouirseen
To lese thy richesse only of folye
I am nowe fre to synge and to flye /
where that me lyste he is a fole at alle
That gothe at large & maketh him self a thral
To here to wysdome thyn erys been deef
Lyke an asse that lysteth to an harpe
Thou maist go pype in an yue leef
For bettre is to synge on thornes sharpe
Than in a cage with a chorle to carpe.
For it was saide of follres yere a gone
That a chorles hyrde is often woby goue
The chorle felt his herte at weyn
For very sorowe and asondre ryue
Alas quod he I may wele wepe and pleyn.
As a wretche neuir lyke to the nor thryue.
But to morne in pouerte al my lyue
For of folye and of wylfulnesse
I haue loste holy al my richesse
I was a lorde I cryed oute on fortune.
And had greate tresoure late in my kepinge
whiche myght haue made longe for to ꝯtynue.
with that stone to haue lyued lyke a kynge
Or if that I hadde set it in a rynge
Borne it vpon me I hadde gode ynough
Me nedyd no more to haue goon to plough.
whanne the byrde herde the chorle thus morne.
And howe that he was heuy of his chere.
She toke her flight and gan ayen retorne
Towarde him and saide as ye shal here.
O thou dulle chorle wisdome for to lere
That I the taught al is lefte behynde
Raced awey and clene oute of thy mynde
Taught I the nat this wysdome in sentence
To euery tale brought vp a newe
Nat to hastely to yeue credence
Vnto the tyme thou knewe that it were trewe
Alle is nat golde that shewyth goldisshe hewe.
Nor stones al by nature as I fynde.
Be nat saphyres that shewyn colour ynde
In this doctryne I haue loste my laboure
[Page] To teche the suche ꝓuerbes of substance
Here maist thou se thy lewde blynde erroure.
For al my body paysed in a balaunce.
weyeth nat an vnce rude is thy remembrance.
I to haue more peyse closed in myn entrayl
Than al my body sett for the counterayl.
Al my body weyeth nat an vnce /
Howe might I than haue in me a stone.
That peyseth more than doth a grete iaconce.
Thy brayne is dulle thy wytte is almost goon
Of thre wisdomes thou haste forgoten one.
For thou sholdest nat after my sentence.
To euery tale to gyne to hasty credence
I badde also be ware bothe euyn and morow.
For thynge loste by soden auenture
Thou sholdest nat make to moche sorowe
whan thou seest thou mayst it nat recurne
And here thou faylest that doste thy besy cure.
In thy snare to cache me ageyn
Thou art a fole thy laboure is in veyne
In the thryd thou doste raue.
For I badde thou sholdest in no maner.
[Page] Coueyte thynge whiche thou mayst nat haue.
In whiche thou haste forgoten myn empryse.
Thus I may say playnly to deuyse
That thou hast of madnesse forgoten al thre
Notable wysdomes that I taughte the.
It were folye more with the to carpe
Or preche of wysdomes more or lesse
I holde him mad that bryngeth forth an harpe
Theron to teche a rude dulle asse.
And madder is he that syngeth a fole a masse
And he is moste madde that both his besynesse
To teche a chorse termys of gentylnesse
And semblably in apryl and in maye
when gentyl byrdes maken mooste melody
The gucko we syngeth but one lay
Of other tones he hath no fantesye
Thus euery thynge as bokes specifye
As foules bestes of euery age
From whens they came thy take talage
The vyntener tretyth of his holsom vynes.
Of gentyl frutes bostith the gardener.
The fyssher cassiteth his bokes and his synes.
To cache fisshe in euery fresshe ryuere.
[Page] Of tysth of lond tretyth the labourer
The gentylman tretyth of gentrye
And the chorle deliteth him in al rebaudry.
Alle one to the a faucon as a kyte.
As gode an owle as a popingay
A donghyl ducke as deynte as a snyte
who seruith a chorle hath many a careful daye
A dieu sir chorle fare wele I fle my weye
For I caste me neuir hensforth in my lykynge
A fore a chorle any more to synge
ye folke that shalle this fable see or rede
Newe forged tales I counseyl you to fle
For losse of godes take neuyr to great hede.
Nor be nat sorye for noon aduersite
Ne coueyt thynge that may natt recouered be.
And remembre where euyr ye goue
That a chorles byrde is euyr wobigone.
Vnto purpose this prouyd is ful ryue
Rede and reporte by olde remembraunce
That a chorles byrde and a knaues wyue.
Haue oftentymes grete sorowe & myschaunce
And who that hath fredom hath al suffisance.
[Page] For bettre is fredome with lytel in gladesse.
Than to be thralle with al worldly richesse
Go lytel squyer and recōmaunde me
Vnto my master with humble affection
Besechynge him lowle of mercy and pyte
Of this rude makyng to haue compassion.
And as touchynge the translacion.
Dute of frensshe howe so it englisshed be
Alle thinge is saide vndre correctioy
with supportacion of your benignynte

Here endeth the tale of the chorle & the byrd. Emprentyd by me Richarde Pinson.

This keyboarded and encoded edition of the work described above is co-owned by the institutions providing financial support to the Text Creation Partnership. This Phase I text is available for reuse, according to the terms of Creative Commons 0 1.0 Universal. The text can be copied, modified, distributed and performed, even for commercial purposes, all without asking permission.