NAENIAE in mortem Thomae Viati equitis incom parabilis.
IOANNE LELANDO ANTIQVARIO. AVTORE.
Londini. ANNO. M.D.XLII.
IN EFFIGIEM THOMAE VIATI.
Holbenus nitida pingendi maximus arte
Effigiem expressit graphicè: sed nullus Apelles
Exprimet ingenium felix animumque Viati.
T. V.
Syderei peteret cum coeli regna Viatus
Tempora lustrorū non dum compleuerat octo.
IOANNIS LELANDI ANTIQVArij carmen ad HENRICVM HOVARDVM Regnorum comitem iuuenem tum nobiliss. tum doctissimum.
ACcipe Regnorum comes illustrissime carmen,
Quo mea Musa tuum laudauit moesta Viatum
Non expectato sublatum funere terris.
Nominis ille tui dum vixit magnus amator.
Tu modo non viuum coluisti candidus illum,
Verum etiam vita defunctum carmine tali
Collaudasti, quale suum Chaucerus auitae
Dulce decus linguae vel iuste agnosceret esse.
Perge Houarde precor virtute referre Viatum,
Dicêrisque tuae clarissima gloria stirpis.
Clarus fons.
Caesaris orator Maurentius ostia Falae
Fluminis intrauit vela secunda ferens.
Est data ducendi legatum cura Viato,
Hispanis nullus notior Anglus erat.
Vrbs antiqua tenet regum monumenta duorum
Clarus fons, sedes pontificum que fuit.
Hic per dispositos properantem currere mannos
Inuasit Thomam pestis, et atra febris.
Nobilis Horsaeus morienti lumina clausit,
Quem Durotrigum gens colit, ornat, amat.
[Page] Aeternum peperit Clarus fons morte Viati
Nomen, et illustris fit magis inde locus.
Officium pietatis.
Sint moestae Charites, lubentiaeque,
Et tristes sileant sales, lepôresque.
Extinctus iacet en Viatus ille,
Ille inquam decus vnicum Britannae
Gentis, cuius ab ore profluebant
Musarum numeri rotundiores.
Vos cygni pia turba concinentes
Sublimem medio locate coelo
Vestrum pro meritis suis poetam,
Et famam date candidi perennem.
Coniunctio animorum
Me tibi coniunxit comitem gratissima Granta,
Granta Camoenarum gloria, fama, decus.
Diuidet illa animos mors ingratissima nostros?
Non faciet: longum chare Viate valae
Comparatio
Qualis erat clypei dominus septemplicis Aiax.
Qualis et in bello Troicus Hector erat.
Qualis erat curru celeri conuectus Achilles.
Nostra quidem talis palma Viatus eques.
Immortalis Viatus
Ante suos Titan radios ostendere mundo
Desinet, et nitidas Cynthia pulchra faces.
Desinet ante nouos flores producere tellus
Quam pereat nomen clare Viate tuum.
Delectus amicorum
Candido amicorum numerum dedit aula Viato.
Sed tres praecipuae selegit amicus amicos.
Excoluit largi Poyningi nobile pectus.
Ingenio Blagi delectabatur acuto.
Doctrinae titulo gratus Masonius albo.
Hi nunc defunctum lachrimarum flumine lugent,
Tergemina charum resonantes voce Viatum.
Apotheôsis
Inter coelicolas nuper certamen obortum.
Dissidij vero caussa Viatus erat.
Mars ait est noster iuuenum fortissimus ille.
Phoebus at ingenij flos ait ille meus.
Mercurius virga litem dissoluit, & altis
Intulit exutum corpore syderibus.
Communis dolor
Tristi carmine passerem Catullus
Extinctum queritur parum pudicus,
Deflet Stella suae vices Columbae
[Page] Vates molliculus, tener, cinaedus.
At nos qui colimus seueriora,
Et musas sequimur sacratiores
Lumen iudicij boni Viatum
Abreptum querimur dolore iusto.
Anglus par Italis
Bella suum merito iactet florentia Dantem.
Regia Petrarchae carmina Roma probet.
His non inferior patrio sermone Viatus
Eloquij secum qui decus omne tulit.
Gemitus turturis.
Aeria turtur gemitus tunc fudit ab vlmo
Emedio raperent cum tristia fata Viatum.
Mors victrix.
Tu bellatorum vicisti tela Viate
Nulla manus mortis vincere tela potest.
Vnicus phoenix
Vna dies geminos phoenices non dedit orbi.
Mors erit vnius vita sed alterius.
Rara auis in terris confectus morte Viatus
Houardum haeredem scripserat ante suum.
Vita post cineres
Dicere nemo potest recté perijsse Viatum
Ingenij cuius tot monimenta vigent.
Querela philomelae.
Tempore non solito cecinit Philomela canora
Virtutis caderet cum prima corona Viatus.
Cantrix cantorem merito lugebat ademptum.
Officij memor adsonuit nemus omne canenti.
Mons acutus.
Logueri burgus, quē nomine Montis acuti
Aetas nostra vocat, dominum, gratumque patronū
Solicitis votis optabat habere Viatum.
Vnde suas coepit paulatim expandere cristas.
Ast animis nunc spe sublata concidit omni,
Ingentem totis tectis patiturque ruinam.
Hinc Murotriges crudelia fata vocare
Non cessant, subito quae subtraxere Viatum.
Cantij desyderium.
Extinctum perluge tuum generosa Viatum.
Cantia, quo viuo lumine maior eras.
Vagafluuius
Nuper clara Vagae facies: nunc fuscula nympha
Est luteis turbata vadis, dominumque Viatum
Sublatum queritur salebroso murmure tristis
Quid. quod & infelix lachrimis indulget obortis,
Verberat & curuas violento gurgite ripas.
Alaunodunum
Magnanimus dum vixit Alaunia castra Viatus
[Page] In pretio stabant: sed nunc tutore remoto
Deponunt animos, & culmina celsa reclinant.
Clades eloquentiae
Eloquij flumen, lumen, fulmenqne Viatus
Concidit, argutum nunc silet omne melos
Lima Viati
Anglica lingua fuit rudis & sine nomine rhythmus:
Nunc limam agnoscit docte Viate tuam.
Nobilitas debet Viato
Nobilitas didicit te praeceptore Britanna
Carmina per varios scribere posse modos.
Viatus psaltes
Transtulit in nostram Dauidis carmina linguam,
Et numeros magna reddidit pares.
Non morietur opus tersum, spectabile, sacrum.
Clarior hac fama parte Viatus erit.
Elementorum luctus
Non facit officium solitum vis ignea coeli.
Irriguas aer soluitur in lachrimas.
Turbine ventorum montes consurgit in altos
Pontus: terra macram tristitiam (que) refert.
Caussa quidem iusta est, sensere elementa Viatum
Delicias orbis deperijsse meras
Calculus Caesaris
Carolus eximias vires laudare Viati
Caesar, & eloquium est solitus laudare Viati.
Ingenuos mores Caesar laudare Viati,
Ingeniumque probum solitus laudare Viati.
Caesaris vnius multorum calculus instar.
Prosopographia
Si quis in hac nostra non vidit gente Viatum
Haec legat, atque viri formam sibi colligat omnem.
Corpore procerum finxit natura Viatum,
Eius & inuictis neruos dedit illa lacertis.
Addidit hinc faciem, qua non formosior altra.
Laeta serenatae subfixit lumina fronti,
Lumina fulgenteis radijs imitantia stellas.
Caesariem iuueni subflauam contulit: inde
Defluxit sensim crinis, caluumque reliquit.
Sylua sed excreuit promissae densula barbae.
Quisquis erit posthac syncerus cultor honesti
Laudibus emeritis felicem tollat ad astra
Nobile solertis naturae plasma Viatum.
Viatus aquila
Summa petit magni Iouis ales & ardua tentat.
Talis naturae dote Viatus erat.
Viatus ornamentum patriae.
Cedrinae decori sunt celsis montibus vmbrae,
Malaque solicite paradiso punica culto.
Sunt teretes decori foecundis vitibus vuae.
Purpureaeque rosae, violaeque nitentibus hortis.
Ingenuis decori cunctis patriaeque Viatus
Viuus erat, patriae mortuus ille decus.
Corona Viati.
Castalij fontis cum margine forte sederent
Ex hedera Musae nuper texere corollam,
Auro pingentes solito de more corymbos.
Circulus & postquam iustum coijsset in orbem
Quaestio Cyrrheas est inter oborta sorores
Festa poetarum quis tandem praemia ferret.
Virginei quae prima chori sic ora resoluit
Calliope: docto sunt munera digna Viato
Dixerat, & placuit reliquis sententia nymphis.
Atrapos has illi laudes inuidit acerba,
Infestaque manu vitalia stamina rupit.
Confectum Musae crudeli vulnere mystam
Eluxere suum lachrimis, gemitusque dedere
Talia dicentes: potuit mors tollere corpus
Viuet at ingenium nostri sine fine Viati.
Nobilitas animi.
Intumuit nunquam fortunae dotibus amplis.
[Page] Nec se felicem duxit splendore Viatus
Aulae, nec strepitu rerum, procerumue fauore.
Rectius ille animum studijs cordatus auebat
Exornare bonis, coeloque reponere curam.
Nobilitas haec est animi verissima magni.
Est hic thesaurus longe pretiosior auro
Nomine quo mundo distractus in aethere viuit.
Quid iuuat immenso nunc indulgere dolori,
Aut desyderio rapti languere Viati?
Curemus potius studijs imitarier illum
Sanctis, inque viros forteis euadere. Tandem
Sic nos efficiet quoque gloria vera Viatos
Annulus Viati.
Annulus in digito solitus radiare Viati
Fabre factus erat, gemmaque superbus achate,
Caesaris effigies in qua verissima Iuli
Sculpta, occludendis signum spectabile chartis.
Caesaris ad summam virtutem calcar imago
Ingenitas auxit vires animosque Viati.
Epitaphium
Vrna tenet cineres ter magni parua Viati,
Fama per immensas sed volat alta plagas.
LONDINI. Ad signum aenei Serpenti.