BONONIA GALLO MASTIX. IN LAVDEM FELICISSIMI VICTORIS HENRICI OCTAVI ANGLICI, FRANCICI, SCOTTICI HIBERNICI.
Ioanne Lelando Antiquario autore.
❧BONONIA AD CANDIDOS LECTORES.
Gallica tota fui, nunc sorte Britannica martis.
Perplacet eximium coniugium (que) mihi.
Audiat applausus uestros Henricus acutos.
Victor io uiuat dicite Victor io.
❧EXCVDEBAT LONDINI IOANNES MAYLER.
❧Anno Domini. 1545.
MAxima nuper erat clarus mea gloria Gallus.
Nunc decus at nostrū dulce Britannus erit.
Ludit in humanis rebus sic alea martis,
Et uarias patitur praecipitata uices.
Belgica gens laetis successibus inuidet Angli.
Non tamen inuidiae causa probata liquet.
Laurigeros cecinit celeberrima fama triumphos
Henrici Quinti, fulmineas (que) manus.
Tempore quo laeto uictores moenibus Anglos
Inclusi tuto, continui (que) loco.
Non secus ac proprios Burgundos, credita quorum
Antiquae fidei, subsidio (que) sui.
Senserat haec Gallus, cui tunc Burgundio fautor,
Simplicis hinc Sexti praesidium (que) leue.
Continuo festa repetit mea moenia pompa,
Imperio Gallum sustinui (que) Ducis.
[Page] Cordus erat uarius facti praestructor iniqui.
Sordidus, & domini proditor ille sui.
Moesta recessuris submissa haee uoce Britannis.
Praedixi, certam quae meruêre fidem.
Viuite magnanimi quondam mea cura. Valete,
Et mea nunc memori condite uerba sinu.
Eadueardus Quartus mihi bella minabitur hostis.
Confecta instabili pace recedet ouans.
Concutiet (que) meas Henricus Septimus arces.
Octauus Sexti maximus ultor erit.
Haec ego fatorum serie perdocta canebam,
Credidit & dictis turba Britanna meis.
Defluxêre mihi felicia saecula. Clio
Extulit eximium nomen ad astra meum.
Ecce renascetis uirtutis palma Britannos
Inclytus Octauus sub ditione tenet.
[Page] Ille rebellanteis Morinos, Belgas (que) feroceis
Dissipat, atque iugo colla superba premit.
Ille meum fractis ui multa turribus orbem
Ingressus Scythico conspiciendus equo:
Ac auidis lustrans delecta serenus ocellis
Audijt à laeto milite Victorio.
Vinitor autumnus calcatas presserat vuas.
Victorem recipit Doris amica suum.
Concitat insigneis reparato marte tumultus
Henricus Galli filius, acer eques.
Et subita spoliat mea fraude suburbia noctu.
Hoc impune tamen non tulit ille scelus.
Delphini pedites fusi, partim (que) fugati.
Iusta dies uindex caedis & illa fuit.
Nobilium numerus refluo confectus in aestu,
Intinxit syrtes purpureus (que) cruor.
[Page] Natus ad arma potens Bessus reuocare parabat
Me comitem notam, participem (que) tori▪
Nil mihi cum Bessis. Friget Veruinius. Vnus
Anglus multorum nobilis instar erit.
Semarius Pontem belli Dux inclytus, atque
Graius euincunt. Gallica turba ruet.
Duddelêgus amor Martis, Dux impiger armis
Prouolat, & stricto fulminat ense ferox.
Victores abigunt Gallos, castris, spolijs (que) potiti.
Saucius accepto uulnere Bessus abit.
Egestae tumulus terrae confringitur ingens,
Praesidium Galli quem statuêre suum.
Nescis quanta tuae Dominae sint robora Besse.
Aucta quidem forti munia nostra manu.
Exemplo tibi sit Poiningus strenuus ultor
Praesidium nostrum, carnificina tua.
Dij bene fecerunt, quique statuêre nouercam
Gallorum, matrem Brutigenûm (que) piam.
[Page] Prouehat Henricus cumulate robora nostra.
Plorabunt Morini, diffugient (que) procul.
Haec quoque confecto geminabunt pectore tristes,
Et feriet luctus sidera summa grauis
Vae Morinis, nimium uicina Bononia, fractis.
In medijs portus nauigat Anglus aquis.
❧BONONIA ILLVSTRISS. HENRICVM OCTAVVM ALLOQVITVR.
Romani rerum Domini Rutupina petentes
Littora, traiectus me coluêre Ducem.
Quid mihi cum uictis Romanis? palma Britanne
Inclyta me totam possidet, illa tua.
Officium (que) meum, quod Gallo displicet, omne
In tua transfudi numina celsa lubens.
Floreat aeternum felix uictoria patris,
Filius Eduerdus sustineat (que) parem.
FINIS.