LESSVS IN FVNERE RAPHAELIS THORII MEDICI ET POETAE PRAESTANTISSIMI,
QVI LONDINI PESTE EXTINCTVS BONIS ET doctis omnibus triste sui desiderium reliquit, Anno 1625.
LONDON, Printed by Edward Allde for Thomas Walkley. 1626.
LESSVS IN FVNERE RAPHAELIS THORII MEDICI ET POETAE PRAESTANTISSIMI,
QVI LONDINI PESTE EXTINCTVS BONIS ET doctis omnibus triste sui desiderium reliquit, Anno 1625.
TEnê Thori obscuris clarum caput addidit vmbris
Pestiferi vis saeua mali? non abs (que) querelae
Et tanto inuidiae cumulo saeuire profanam
In plebem, & solo magnos abdomine Patres
Caeca lues poterat? Cur tu pars maxima cladis?
Cur de te tantum licuit? te maxime vatum
Te Medici Coryphaee gregis? certè illa nocentem
Plus fecit se morte tuâ quàm mille potentum
Funeribus, quàm si totam grassante veneni
Profluuio ignauis vacuasset ciuibus vrbem.
[Page 2] Amusae leuis est turbae iactura, resurgit
Abs (que) labore filix, lolium (que) renascitnr agris
Semine non iacto: sed si Narcissus ab imâ
Euulsus radice fuit, si frigore adusta
Vel Rosa, vel Violae, vel mollis Amaracus, aegrè
Nec nisi post multum veniunt exculta laborem.
Quae nobis nunc gleba dabit, quae cura secundum
Substituet Thorium? potis est Natura beare
Ingenio, Genium ingenio superaddere curtas
Naturae transcendit opes, Heroica virtus
Rarò habet haeredem, doctos dat quaelibet aetas,
Non quaeuis Thorios, concurrant sidera oportet
Omnia coniunctis pariant vt viribus vnum
Vel Medicum insignem vel plenum Numine vatem:
At Thorius fuerat tam foelix, vnus vtrâ (que)
Vt pariter foret arte potens, promittere vitam
Poeoniâ, Aoniâ poterat promittere famam.
Rarus honos paucis (que); datus producere vitae
Fila vel inuitis (si fas est dicere) Parcis:
Et mage rarus honos, Parcam exarmare secantem
Cùm medicina nequit, pereuntis stamina vitae
Supplere aeterno famae subtemine, & istam
Quae pars est melior, viuendi & ca [...]sa, perennem
Transferre in telam, quam nec liuoris iniqui
Stigmata, nec possint senij corrodere dentes.
Hoc alijs hoc ipse sibi praestare valebat
[Page 3] Versipotens Thorius: quod erat mortale sub vmbras
Ante diem si permisit descendere, fati
Crimen erat, non artis iners vel culpa, vel error
Artificis, quem Naturae non vlla latebant
Arcana: herbarum cunctas cum nomine vires
Nouerat, omnigenûm rixas & foedera rerum,
Quicquid & ad Medicos Chymicus calor excoquit usus,
Quinetiam aethereis quicquid descripta maníplis
Lumina mortales influxu operantur in artus.
Vos animae, vos O animae, quas ille minaci
Eripuit monstro cum grassaretur Erynnis,
Spargeret & totam virus ferale per vrbem▪
Vos testor; meministis enim & memorare potestis
Quàm bene de vobis meruit, quàm fortiter aegris
Adfuit, & quoties Libitinam elusit hiantem.
Non Cous plus ipse senex deuinxit Athenas
Afflictas contage graui, & lethalibus auris,
Vnde grauem tulit ex auro radiante coronam,
Quàm Thorius Luddi dictos de nomine ciues:
Et cunctatur adhuc tanto defuncta periclo
Reddere protractae statuam pro munere vitae
Plumbea gens? certè talem si prisca tulissent
Secla virum, non effigies satis vna fuisset
Non vmbris satis vllus honos mortalibus addi
Consuetus, certê Thorius superaddita bustis
Templa, & fumantes habuisset odoribus aras.
[Page 4] Sed saecli vitio nec sint sua praemia viuis
Nec morte ereptis, iaceat sine vindice virtus:
Non ingrata tamen penitus nostra audiet aetas
Chare Thori, non haec omnes infamia tanget:
Nos tibi, queis tecum communia sacra fuerunt,
Symmistae Aonij, tibi nos aeterna laborum
Praemia mansuras & consecrabimus aras,
Non structas mortali operâ,
[...]icum 4. [...]liae Re [...].
sed Numinis arteQuo plenum tibi pectus erat, dum ingente cothurno
Aut Magnum infami traiectum pectora ferro,
[...]nricum [...]liae Prin [...]em.
Ereptum aut nobis crudeli funere Daphnín,
Aut caneres laeti ludens miracula fumi.
[...]ma de Ta [...]o.
Ipse ego de tanto minimus grege carmen ad Aras
Appendam, leget appensum sic forte viator:
Nil opus est hospes biiuges exquirere cliuos
Vt Phoebi afflatum captes per somnia; Diuus
Hîc colitur Thorius, totum qui pectore toto
Et Phoebum & Phoebi natum congesserat; istas
Tantùm Aras ornare velis violis (que) rosis (que)
Et Maneis placare pios: his functus abibis
Et Medicus foelix, & anhelus Apolline vates.
R. A. E.
THorius, Poeta quo nec vllus dignior,
Dignum Poetam nactus est.
Gemella virtus laude sociauit pari
Ʋiuum hunc, & illum mortuum.
Sic ille solitus canere, sic voluit cani:
In morte solum hoc commodum.
Sic approbauit imprimenda dexteri
Equitis Poetae carmina
T. G.